قصه قطريه في منتهى الروعه ((احزان قلبي))

[bnt aldo7a]

الجــــــزء الــسابــــع عـشـــــر

-------------------------------



مرت الشهور ومابقى شي على امتحانات الثانويه العامه..في هالشهور قلت اليمعات بين الاهل..بوعيسى منشغل وبو بدر الشركه على راسه والشباب في اشغالهم وطلعاتهم..والبنات يشوفون كتبهم ومقالمهم..الكبار والصغار..محد فيهم فكر يلعب ويتهاون في الدراسه عشان ينجحون ويوصلون للهدف..خصوصا بنات ثالث..يمكن قلت اليمعات بس الترابط زاد..كل واحد منهم يتصل في الثاني ويسأل عن احواله..في هالشهـر..المشاعر تغيرت..وبعضها نفسها ماتغيرت..

ساره....تهتم في الدراسه ومخها مشغول..لانها مشتاقه حق رجعة فيصل الغالي...مع انها ماتدري متى بيرجع..
دانه...عقب آخر لقاء لها مع محمد حست بفيضان في قلبها..وصارت تعترف لنفسها..ان نايف ملــك جمــال العالم..وملك الاحترام والاخلاق الطيبه..بس محمــد..مـلـك قلبهـــا

عاشه...نحل جسمها واليأس سيطر عليها..وكل ماتتذكر بدر تحس بالاختناق..بس الأمل يرجع لما اتذكر ان الدينا مانتهت

نايف...على ماهو واهتمامه في اخته كل يوم يزيد عن قبله

بدر..الابتسامه ماتفارق ويهه ونشاطه في عمله يزيد كل مايتذكر..عاشه..صارت مصدر طاقه له في عمله..والشي اللي يعطي دفعه للانسان للشغل والاجتهاد..يكون الأمل..اوالطمـــوح...واللي عطت بدر دفعه للامام هي عاشه..باختصار.. هي أملـــه

محمد..ناسي الشغل واهله..بس يتذكر الحب مخه يتخدر..يحاول يقنع نفسه ان المسكينه دانه ماخانته..نظراتها اثبتت له..وهو اقتنع ان كل اللي كان بين نايف ودانه مجرد..السلام عليكم وعليكم السلام..والدور عليه الحين..شلون بيراضيها بعد مااهانها...

------

امتحانات نص السنه للثانويه العامه ابتدت..وفي آخر يــوم...اول يوم ساره اتم فيه لين الفجر وماتخلص الدراسه
كانت خايفه من الامتحان خصوصا ان هالماده صعبه وكلها حفظ..كل ماتقرا كلمه تنسى اللي قبلها

الساعه 3:40 الفجـــر

قام نايف على صوت منبه الجوال..صار زالزال في مخيخه من المنبه..سكر المنبه وهو يتأفف...راح الحمام تيدد وطلع لبس ثوبه..عشان يروح المسيد ويصلي الفجر..مر على محمد وطق عليه الباب

نايف وعيونه مغمضه وهو ساند نفسه على عمود الباب: محمـــــــــد
محمد :..............
نايف وهو يطق الباب : صلااااااه يالله
محمد :..............
نايف بيسندر محمد الحين : ان الصــلاة خيــــرٌ من النوم
محمد طلع له وهو مضيع : شتبي ياااااااخي ازعجتني ؟؟
نايف : مب انا اللي ابيك..الصلاه اللي تبييييك
محمد : بصلي هني
نايف : مابتي يعني ؟؟ خلاص كيفك..بس هااااااا..مب تروح ترقد
محمد صكر الباب في ويه نايف : ان شاءالله

نايف راح صوب غرفة ساره وهو يحوس ببوزه من هالاخو محمد

طق الباب : ساره....؟؟
ماردت..فتح الباب بشويش..شافها قاعده على طاولة الدراسه وتصيح بصمت : شفيييج ؟؟
ساره بخوف : مافيني شي
نايف دخل الغرفه ووقف عند الباب : ليش تصيحين حبيبتي ؟؟
ساره : ماااا..كملت الدراسه...قاعده ادرس من..من..الساعه 7..ومن الساعه 1 الظهر لين 7 كنت ادرس الماده الاولى..وللحين...مااا..ما..خلصت
نايف انكسر خاطره عليها : حبيبتي لا تخافين..شنو الشي الصعب عليج ؟؟
ساره وهي تمسح دمعه وتنزل وراها ثانيه : كل الكتاب
نايف راح لها : مب لازم تحفظين اقري المعلومه مره ومرتين وروحي الدرس الثاني..بس افهميها بدون حفظ
ساره : ماااا..تـ..دش مخي
نايف مسح على راسها بحنان : جدامج 3 ساعات اقسميهم على كل وحده واقري المعلومه وافهميها بدون حفظ..
ساره امسحت دموعها وهزت راسها بإيجاب
ابتسم لها وخلاها عشان تدرس بس لما وصل عند الباب..لف راسه وشافها تشوفه بأمل انها تخلص هالكتاب..
نايف يوصيها : لا تنسين تصليييين...وفي كل ركعه وسجده بدعي لــج..بس توعديني بالـ 99.9 ؟؟؟
ساره ماوعدته..لكن اعتمدت على الله : ان شاءالله
نايف ابتسم لها : خلاص عيل..صلي ودرسي عدل...الله يوفقــح
بعد ماخلاها..وسكر الباب عشان تدرس بهدوء وتركيز وطيب خاطرها بهالكلمتين اللي يبعثون الامل في القلب..قالت وهي تتنهد : الله يسمع منك يانايــف

-------

الساعه 7 الصبــح

محمد وساره على طاولة الطعام والسوالف من بيناتهم وهم يتريقون ريوق غربي

محمد : اقول ساره
ساره وهي تمسح الزبده على التوست : نعم
محمد : امممممممم..رقدتي شي ؟؟
ساره : هههههههه..لااااا
محمد بعصبيه مزيفه : ليش ؟؟ مب زين السهر ترى مابتقدرين تحلين شي
ساره تخرعت : وي لا تفاااوول..وبعدين لما ارجع برقد عادي اليوم آخر يوم
محمد : انزين..ممكن طلب ؟؟
ساره قبل ماتاكل من التوست : انت تاااامر
محمد ابتسم : طلب بسيط..بدون مقدماااات...ابي توصلين شي حق دانه ؟؟
ساره شوي وتغص في القطعه اللي كلتها : خيييير ؟؟؟ ماستحي انا ؟؟
محمد ببساطه : شفيها يعني..بس توصلين لها شي مابتتعبين
ساره : وان شاءالله شنو هالشي العظيم ؟؟
محمد : ابيات شعر
ساره كشرت : مابوصلهاااااا زين
محمد زفر : يااااااااااه ليييييش ؟؟
ساره : عشان تقول عني اني ماستحي واصير مطراش اودي واييب
محمد : بي بي بي ماقلت لج شي وبعدين هذي اول مررره
فتحت ثغر فاهها بدهشه: يعني في ثاني مره وثالث ورابع وعاشر بعــــد ؟؟

دخل نايف وسلم عليهم وصبحهم بالخير وسال عن احوالهم..قعد على الطاوله عند ساره وسمى باسم الله وتريق

محمد يرفع حاجب : بتسوين الشي اللي طلبته ولا ؟؟
ساره بدلع : لا عيوني شوف حد ثاني
محمد من بين ضروسه : يالــ....زين..معليه

قام محمد وهو يفكر بحل..تولع الليت في مخه..ياته فكــره!!

راح صوب الرفوف وقعد يدور في الكبتات المتداخله في الرفوف..لقى ورقه بيضه..طلعها وراح بعيد عن ساره ونايف...طلع القلم من مخباته وقعد يفكر..ويتذكر..ويتذكر..ويتذكر..ليما تذكر...كتب الابيات وطوى الورقه..وقف على حيله ورتب نفسه وخلى شكله طبيعي...تسلل بهدوء لشنطة ساره الصغيره مالت المدرسه..حط الورقه فيها..تنفس الاوكسجـــين ورجع لساره ونايف..عقب دقايق قاموا كلهم عشان يروح كل واحد لدوامه..وساره بيوصلها نايف اليوم..على عكس كل يوم..لان الدريول هو اللي يوصلها في العـاده...


---------


بعد الفتره الاولى..البنات كانوا قاعدين يراجعون في ساحة المدرسه الاماميه..بعيد عن الازعاج وقريب من الهدوء..

دانه تتكلم بسرعه : ساروه بسرعه علميني شنو يعني(تأشر لها على المسأله) ذي ؟؟
ساره : افففففففففف..دنوي هاي يبيله وقت وعقل
دانه تخرعت : امبييييييييه بسقط
عاشه : ههههههههههههه
دانه التفتت عليها : شفيج انتي ؟؟ هبله ؟؟
ساره : نطري نطري

راحت ساره عند اللجنه وطلعت من شنطتها ورقه فاضيه وقلم عشان تفهم دانه المسأله..قبل لا تسكر الشنطه شافت ورقه منطويه بشكل مرتب..فيها شذى عطر...رجااالي ؟؟
فتحت الورقه شافت ابيات شعر.. قرت من المرسل..لقت اسمه...مايووووووز هالصبي...يالله دامه حط الورقه في شنطتي...مافي الا..سكرت الشنطه وخذت الورقه وحطتها في شنطة دانه..هههههههههههههه عاد وناسه لما دانه ترد البيت وتشوف الورقه ويهها بيتم مصفوق نص ساعــه..

رجعت حق دانه وبدت تفهمها المسأله..رن جرس الفتره الثانيه وكل وحده دشت اللجنه اللي هي فيها..يالله ان شاءالله يعدي الامتحان على خير

-------

انتهـــى الدوام..وانتهى النصف الاول..وانتهت المدرسه مؤقت..بكل مراحلها..واوجاعها..واذيتها..وحلاوتها

الساعه 2 الا ربع...ترست بطنها وحمدت الله وكاهي الحين بتنسدح ع السرير بــس.!!
اتجهت لشنطتها عشان تفضيها وتمحـــي ذكرى المدرسه والى الابـــد
وهي إتحندى..فتحت الشنطه : فكــه..فكــــــه..فكـــــــه..واذا في كلمه احسن من فكه بقولها..(شافت الورقه)..من هذي الحلوه اللي حاطه ورقتها في شنطتي ؟؟؟

طنشت وهدت الورقه وراحت صوب السرير..بس وقفت في الطريج وهي تفكر..وحواجبها معقوده..وعيونها تضيق بغمــوض ....

تشوف شفيها الورقه احسن..!!!

خذت الورقه..فتحتهااا...وقرت اول كلمه..تليها ثاني كلمه...وصلت آخر كلمه !!

عيونها رمشت بغير تصديق...ياهذي لعبه مسويتها ساره ولا هي تحلم ؟؟

معقـــــــوله

هالابيـــــــات...يهديها لهاااااا ...!!
ومن بعد غيبه دامت شهــور...!

قرت مره ثانيه وهي تركز على الخــط

والله ما هو رخص فيهم إنما زود لغلاك أغفر لقلبٍ يودك .. لو بدا منهم يغير
لي أماني مستحيل .. أعيشها إلا معاك لي فؤادٍ شاري قربك ولي أنا طرفٍ سهير
من هويتك قلت والله ما يداويها سواك آه يا ما أقسى جروحٍ ساكنه بأقصى الضمير
وأن ذكرتك عطرت دنياي نفحة من شذاك من عرفتك وأنا في عالم من الوجد المثير
لا متى وأنا اتصبر ؟؟ وأحلم عيوني تراك !! ألتقي بك في منامي وأصحى والخاطر كسير
في خفوقي أشتياقٍ فاق حده من جفاك كل لحن وكل غنوة حب أسمعها تثير
يمكن تهّدي قليبٍ ما يبي إلا رضاك أنتظر منك رساله بس أعرف انك بخير


سـامحينـــي.....> محمـد<

لالالالالا..هاي مب خط ساره..الدنيا تدووور بعيونهااااا..الارض تدور..وقلبها يضرب..ابتسمت وقربت لقلبها الورقه وهي تدووور حول نفسها من الفرحه..ومع دورانها..قلبهاااا طاااار ومشاعرها طارت حتى شعرها طار ولعب فيه الهوا...

وقفت فجاه وهي حاطه يدها على حلجها : صج اني صرت مينونه رسمـــي !!...بس شلون وصلت الورقه لشنطتي؟؟..بسأل ساره واستفسر...بس خلاص..شيرقدني الحيــن ؟؟؟

-------


العيــد..عيد الاضحى..كل الناس يكونون مستانسين وفرحانين والكل يزور اهله في هاليوم ويعيد عليه..بس عيال بو محمد...قاموا الصبح..وشافوا البيت فاضي..هذا اول عيد اضحى يمر عليهم بدون ابوهم..وبدون مايسلمون عليه الصبح ويعطيهم العيديه..مع انهم كبار بس هو يستانس بهالشي وهم ينبسطون..اول يوم من ايام العيد..مروا على عمامهم ونفسية كل واحد منهم تعبانه..خصوصا ساره..ماكانت مهتمه في نفسها ولبست لبسه عاديه..مو مثل كل مره..كل مره اتكشخ وتجهز حق العيد قبل بشهر..بس الحين..الذكرى رجعت لكل منهم..وتركت اثر عميق في نفوسهم..

وبعد مرور يومين على اول يوم..ساره كانت في غرفتها..حاطه راسها ع المخده ومتكوره حول نفسها ولامه كتوفها..وهي تسمع انغام اغنية..(ماما)..تذكرت البابا والماما في نفس الوقت
نزلت دموعها وهي مب حاسه فيهم..من اثر الكلمات..

Mama thank u for who I am..Thank u for all the things I’m not
Forgive me for the words unside
For the time I forgot


مانتبهت لنايف ومحمد والشخص الثالث اللي سمعوا صوت المسجل وكانوا واقفين عند الباب وشافوا مظهرها اللي يقطع القلب..راح لها عمها بهدوء وقعد حذاها ومسح على شعرها بحناااان..اعتدلت في جلستها والتفتت لعمها منصور..لمها وهو لا زال يمسح على شعرها ويهديها ويهدي نفسه..لان دموعه منحبسه في مدامعها..لمته لانها حست فيه بريحة ابوها..

نايف تنهد وهو مب عارف شيسوي غير انه يدمع ...ومحمد مال جسمه وتسند على الباب..ترى في اثنين يصيحون مب محتاجين ثالث بعد ؟؟ بيصير عزا ترى ؟؟
تنهــد بقلة صبر وهو مب مستحمل هاللحظه..محد فيهم يقدر يصبر على فراق ابوهم..امهم تحملوا..بس الابو..لا...مشتاقين لشوفته ولهدوءه لما يقرا الجريده ولما يسكت فيهم..ويبون يقولون له((..كل عام وانت بخيـر يباااا..))...الله يرحمـــك يابو محمد

عشان يهدى الجو..اقترح عليهم نايف انهم ينزلون تحت ويشربون جاي ويسولفون على ما اييب المصاحف..عشان يقرون القرآن وترتاح قلوبهم..كل واحد فيهم كان يقرا صفحه وطبعا ساره كانت النمبر وان في التجويد بعدها نايف وبعدهم محمد ومنصور نفس النسبه

[bnt aldo7a]

فيصل رجع من السفر قبل العيد بيومين..رتب له ابوه موعد مع محمد..الاخ الكبير لساره..عشان الخطبه..وعشان يتفقون على موعد الملجه وباقي التجهيزات اللازمه...هذا اذا وافقوا !!

المغرب

في صالة البيت التحتيه..سكر التلفون وهو يزفر..شاف نايف ياي صوبه

محمد : اوووووف
نايف قعد حذا محمد وفتح الجريده : شفيك ؟
محمد بغشمره : مابغينا نفتك منها
نايف ابتسم : من هذي ؟؟
محمد : ساره بعد من ؟؟
نايف : ليش شصاير ؟؟
محمد : واحد يبي يخطبها لولده
نايف يقلد محمد : واحد يبي يخطبها لولده ؟؟ بمنتهى السخافه جنها لعبه ؟؟ زين من هالواحد ؟؟
محمد : فيصل بن عبدالله...ابوه يعرف ابوي..تعرفه ؟؟
نايف بتفكير : لا..ماسمعت بهالاسم في الميلس..
محمد : ولا انا اعرفه
نايف : وشقالوا ؟؟
محمد : بيمرون علينا..وعطيتهم موعد بعد اسبوع
نايف استغرب : بعد اسبوع ؟؟ ليش مستعيل ياخي ؟؟
محمد : ابوه مستعيل يقول مافي داعي نطول المسأله
نايف بيذبح محمد : لا والله عيل خل ياخذها ببلاش مره وحده احسن ؟؟
محمد يستهبل : انا بعد قلت جذي بس هو ماسمعني
نايف بصراخ : محمـــــــد
محمد : ههههههههههههههههه
نايف بجد : لازم نسأل عنه
محمد : بنسأل وكل شي بس خنشوفه اول شي وبعدين نسأل عنه
نايف بتنهيده : والله ويا اليوم اللي تتزوجين فيه ياساره
محمد : وتشيل شلايلها وتطلع
نايف بعتاب لمحمد : الله يسامحك تخطط عليها من الحين وهي ماتدري عن شي
محمد : يسامح الجميع..خلاص عيل بكلمها اليوم ان شاءالله
نايف رجع للجريده : اللي تشوفه

-----

هييه يادنيا..ساره ..الطفله..اللي كانت في يوم تحبي قدام عيون محمد ونايف..وكانت تحاول تمشي بس تطيح..ولما دخلت الروضه..والاول..والثاني..وكاهي في الثانويه العامه ! الدنيا تركض ومحد حاس بها..والحين بتتزوج..وبتحمل..وبتربي عيال يكبرون وينادون محمد ونايف..خالي محمد..وخالي نايف !..آآه ياساره..الله يرزقج بالذريه الصالحه..هذا اللي كان يجول في بال محمد ونايف..

-----

محمد كلم ساره في الموضوع ولاحظ ردة فعلها..هي استغربت في البدايه..وعرفت ان فيصل رجع من السفر وهي ماتدري..وخطبته لها اكبر مفاجأه..محمد سألها شرايها ؟؟ استحت شوي وقالت له يعطيها وقت تفكر فيه.. بس اهم شي تسأل عنه وعن اخلاقه وشغله شلون

بعد ماهدها محمد وسكر الباب وراه ساره نقزت راحت صوب المنظره وشافت نفسها بشك..اناااااااا في حلم ولا علم.؟؟؟؟...عشان تتأكد انها بعلم ضربت خدودها بكف خفيف خلتهم يحمرون زياده وبينت عروجها اللي تمشي فيها الدم..تحس انها طاااايره طاااايره طاااااااايره..فوق...فوق السما..على الغيمه..ولها جناحين..واللي كانت تحلم به..بيتحقق..وبعد طول انتظار..صار جزء من اللي تمنته..اهم شي عشان الانسان ينال اللي يبيه..الصبـــر..والامــــل

-----

بعد 6 ايام من مكالمة بو فيصل لمحمد..اليوم عاشه بتكون بين الحياه والموت..من اللي بتسمعه واللي بتشوفه

في بيت عاشه..وفي الصاله..والسوالف تدور بين ام راشد وام بدر ودانه..وريحة الهيل ماليه المكان..ويمتزج بريحة الهيل ريحة البخور

دانه بابتسامه : خالتي وينهي عاشه ؟؟
ام راشد : بدارها..مب راضيه تهدها مادري شفيها..؟؟
دانه : هذي وهي عروووس ؟؟
ام راشد : مادري والله يما روحي لها فوق شوفيها ورتبيها ونزلي معاها
دانه قامت : ان شاءالله خالتي

وهي تمر في الممر اللي يودي للدري..شافت نفسها في المنظره اللي كانت على جنب وهي تقووول...قمر والله قمر فديت عيوني والله..(كملت طريجها)..الا شفيها هذي عويش؟؟ لا يكون ماتدري انها بتاخذ اخوي العزيز ؟؟..اشك في ذلك

شافت باب غرفتها مصكوك..فتحته ولقت عاشه قاعده وتشوف نفسها جدام المنظره...

عاشه كانت تتوهم انها شافت حد من المنظره..سمت بالرحمن وتعوذت من الشيطان ولما رجعت نظرها للمنظره شافتها مره ثانيه..تخرعت والتفتت : انتي...شيايبج ؟؟

دانه وهي اتخصر بيد واليد الثانيه على مسكة الباب : اناااا شيايبني ها ؟؟؟ قومي تعدلي شوفي عيونج من معطيها بوكس ؟؟

عاشه تشوف نفسها في المنظره وتقول بألم : شوية أرق
دانه دخلت الغرفه وصكت الباب وراها : ياعمري والله حرام عليج شمسويه فــروحج..؟؟عيونج مافيها رونق..خدودج راحت الحمره عنها..ويهج مصفر..ضعفتي..شمنه ذي كله ؟؟
عاشه تنهدت واكتفت بالسكوت
دانه قربت منها : انتي تدرين انج مخطوبه ؟؟
عاشه هزت راسها : اي
دانه بهمس : وتعرفين من هو خطيبج ؟؟
عاشه ببرود : مايهمني
دانه بغير تصديق : لااااااا ؟؟ شكلج مارضيتي تسمعين اسمه
عاشه تشوفها بنظره : مابيه اصلاً
دانه : قولي الصج..تعرفينه ؟؟
عاشه بلعت ريجها..وبتأنيب ضمير : لا
دانه ابتسمت بخبث : خلاص عيل..حصل خير..(خذت المشط ومشطت شعر عاشه..وعاشه تشوف نفسها وتفكــر..دانه مالعبت في شعر عاشه بس هدته مفلول..حطت لها ميك اب بسيط وركزت على السواد اللي تحت عيونها وحاولت انها تخفيه..كحلت عيونها..ولما انتهت : عوووش حبيبتي..قومي لبسي لج لبسه حلوه جذي مثلج عشان ننزل
عاشه كشرت : ليش ننزل ؟؟
دانه : ياااه..ماتدرين ان ام ريلج..آآ قصدي خطيبج تحت ناطرتج ؟؟
عاشه تضايقت : انزين...بلبس وبنزل
دانه وهي تبتسم لعاشه بخبث..: ناطرتج....عاشه ماتدري ان دانه يمكن تذبحهاا من الفرحه اليوم..اهم شي انها تفرح وترجع مثل ماكانت قبل


كلها دقيقه وخلصت عاشه..رافقتها دانه للطابق السفلي..ولما دشوا الصاله..وقفت عاشه بذهول ورجعت خطوات لورى وابتعدت عن الصاله..
عاشه : امج هني ؟؟
دانه ضحكت : اي عيل تبينها اتيي بروحها ؟؟
عاشه مافهمت : شدخل ؟؟ وينهي ام...مادري شسمه ؟؟
دانه تجاوب على سؤال عاشه الغير مباشر عن اسم المعرس : ام بــــــدر
وقف قلبها..تبققت عيونها..ربطت ام دانه في دانه وفي بــدر..وتكونت المعلومه : انتي..؟؟؟ وامج..؟؟..ووو؟؟؟
دانه بدون مقدمات : اي بدر اخوي خطيبج وانا يايه مع امي نزوركم اليـــوم
عاشه انربط لسانها..لما درت انه بيتزوج كرهت نفسها وكرهت العالم..شافت شكلها شلون صاير..لانها ماتقبلت تعرف من بيكون زوجها..وعرفت الحيــن..والمرض..والتعب...والالم..ذهب في لحظه...والدموع اللي كانت لها رفيقه طول الشهرين اللي فاتوا..دموع الحزن..بتنقطع صداقتها فيها..بس دموع الفرح..بتلازمها...وفي هالثانيه صارت اول دمعه فرح..تتجمع بعيونها

دانه تفشلت..امها شافت عاشه لما بغوا يدشون عليهم وتراجعوا..مانتظرت دزت عاشه من صوب وجرتها من صوب ودزتها وجرتها لين ماوصلتها الصاله ودخلتها..عاشه سلمت على ام رفيجتها..وام ريلــها المستقبلي..وقعدت حذاها بخجل ودانه لاحظت ان عاشه ماسكه دموعها..بس يالله..كاااااااهي فرحت واللمعه اللي كانت في عيونها رجعت


------

باجــر..بييون الخطاب عشان يخطبون ساره..محمد حاول انه يسأل عن فيصل ونايف راح عند ربعه وخلى المهمه على محمــد..مو هو كل يوم يشوف ساره شتبي وشماتبي..على الاقل محمد يسأل عن فيصل ويريح نايــف

في ميلس جـابر..الربع كلهم متيمعين..وجابر نادى رفيجه اليديد..عشان يتعرف على ربعه وطبعا اهمهم نايف

رفيجه يعرف يدق عود..وهذا الشي اللي حببه في نايف قبل مايتعرف عليه..وصوته حلو..ومشغل برنامج(مايطلبه الربع)..

نايف مب مصدق ان هالشاب قطري..اشقر واحمر وحالته حاله : اقول جبور ؟؟
جابر : آآآمــر
نايف : مايآمر عليك عدو..شسمه رفيجك ؟؟
جابر : شفيك نسيت..يوووووسف
نايف : ايه يووووسف..هذا قطري ؟؟
جابر : ها عيل ؟؟
نايف : شدراني..
جابر : هههههههههههه..ادري يبين لندني بس فيه عرق من هل البيق بين
نايف : لا ياخي..ماقدر اصدق !!
جابر يغمز له : جرب وشوف
نايف : توكلنا على الله...اقول بو يعقوووب

يوسف التفت عليه بابتسامه...ونايف مستغرب انه قطري..لو ماكان خليجي جان مالتفت..

نايف : هه...سمعناااا ودي ابكي
يوسف متلخبط..60%حافظ اغاني انجليزيه : لراشد الماجد ؟؟
جابر : اجل مايكل جااااكسووووون ؟؟
يوسف : ههههههههههه..ابشر يابو عبدالله
نايف : تسلم الغالي
نايف يقرب من جابر ويهمس في اذنه : شسمه الكامل ؟؟
جابر : الثنائي ؟؟..يوسف بن حمــد..اخو فيصل بن حمد
نايف : انا عرفت يوسف عشان اعرف فيصل ؟؟ تعاااال ..لا يكون هذاااا اخو فيصل( وهو يكلم يوسف)..يوسف عندك اخو اسمه فيصل ؟؟
يوسف قبل لا يلبي طلب نايف : اي..شبلاه ؟؟
نايف ابتسم : حيا الله النسيب
يوسف استغرب : الله يحييك ؟؟
نايف : انا ولد المرحوم عبدالله..رفيج ابوك ؟؟
يوسف : رفيج ابوي..؟؟..(وطى صوته)..ابو ساره ؟؟

نايف هز راسه بالايجاب بصمت..ويوسف دق الاغنيه اللي طلبها نايف وحرك صوته الموسيقي وطرب الموجودين..صح ان صوته مب حلو ذاك الزود..ولا انه بشع وماينسمع..صوته مقبول ويقدر يسمع له الواحد

------

جا اليوم الموعود..واليوم فيصل وابوه بييون يخطبون ساره من عمها بو بدر..ومحمد سأل عن فيصل..سمع عنه الشين والزين..وسمع انه طيب وخلوق بس رفقة السوء اللي خربته..بس معلي..كل واحد تجيه فتره تخليه يتغير وبعدين يتصلح

على الساعه 7..بعد صلاة العشا..في الصاله التحتيه..

محمد وهو يدخن نفسه : خليج هني ها مو تروحين يمين ولا يسار
ساره منزله راسها..: ان شاءالله
محمد مد ايده بالمدخن وخذته ساره : يالله..ان شاءالله خير
نايف يصوت عليه من الميلس : يالله يامحمد..حشى معرس !!!
محمد مشى له : ههههههههههه.. ياي ياي

ساره بعد هدت الصاله وراحت المطبخ علشان تجهز العصير وهي حاسه بفرحه..بس بحزن !..شعور متضاد..بس قلبها ناغزها..الله يعين وتعدي الليله على خير

--


في الميلس..الكل موجود..بو بدر وبو عيسى ومحمد ونايف..وطبعا فيصل وابوه..بعد ماشربوا العصير...بو فيصل تكلم في الموضوع..وبو بدر رد عليه بصدر رحب ومدح فيصل وقال انه خوش رجال وماينرد بس بيسئلون ساره وبيردون عليهم خبر..

بو بدر : يالله يامحمد
محمد : سم ؟؟
بو بدر : سم الله عدوك... رح شاور اختك
بو فيصل معارض : لا يابو بدر عطوا البنيه وقت عشان تفكر
بو بدر : بنعطيها خمس دقايق مب اكثر..يالله يامحمد
محمد قام : ان شاءالله
نايف وبو عيسى تموا مستغربين..شدعوه..يبون يشاورون البنت في خمس دقايق في شي كبير مثل الزواج ..فاكرين الزواج لعبه ولا هم غلطانين ؟؟
محمد ماستغرب ولا شي..البنت تدري بهالشي من فتره يعني اكيد فكرت وخذت وقتها كله في التفكير..بعد يطولون المسأله ليش ..؟؟

دش محمد المطبخ ونايف لحقه..

محمد : ساره..تعالي
ساره متوتره من نظرات نايف : نعم ؟؟
محمد : نبي نسمع رايج..نقول عروس ولا ؟؟
ساره استحت : اللي تشوفونه
نايف : لا ! مب اللي انشوفه..اللي تشوفينه انتي..مب احنا اللي بنتزوج ؟؟
محمد : يه يانايف صج انك غبي..ماتدري اذا البنيه قالت اللي تشوفونه يعني موافقه ومستحيه ؟
نايف زفر وهو يتذكر شكل واحد شافه افـ لندن...؟؟.. : ادري !
محمد : خلاص عيل..بالمبارك ياساره
ساره ابتسمت : الله يبارك فيك ياخوي

محمد ترك ساره وراح الميلس وبلغهم براي ساره..فيصل مسك نفسه قد مايقدر..طول هالفتره وهو ساكت مانطق بكلمه وابوه يتكلم عنه..اخيرررررراً..وااااافقت..آآآه ياربي ..ماني مصدق..الحمد لك ياكريم

تموا عشر دقايق..واستأذن بو فيصل وطلع وخذ ولده معاه..وانسحب بو بدر ومن بعده بو عيسى..راح محمد يوصل عمامه للباب ويرافقهم...ونايف...كان واقف عند باب الميلس...يفكر بشي..ساره وافقت فـ دقيقه..بسهوله..بدون ماتقول عطوني وقـ....انقطع الكلام...لأنه تذكــر....
...لندن..
....السكران..!
...فيصل....؟؟....
...الفندق...
الضحك..
.النغزات..الابتسامات اللي كان يراقبها بين ساره وفيصل...!.......قالها بشر : سـاره ؟؟؟؟


ركض لصالة البيت : سااااااااااااره
ساره اللي كانت قاعده تنتظر اخوانها : نعم ؟؟
نايف بصراخ : تعالي هني
ساره راحت له بخوف : شصاير ؟؟
نايف شد على شعرها بقوه مابعدها قوه
ساره : آآآه ..هد شعري....نايف ...شفيييييك ؟؟
نايف بقهر الدنيا : ولج عين اتحجين ؟؟ ياللي ماتستحين على ويهج ؟؟ هذي آخر التربيه
صج انج مامتربيه

ساره اندهشت وقلبها خايف ويرتجف : شسويت ؟؟؟
نايف شد على شعرها ومشى فيه للدري وهي زلقت من يده وعاملها بلا رحمه : سكتـــي..ولا كلمه يالخايسه
ساره بكت بغزاره : نايف شفيك علي ؟؟
نايف خذ عقاله من راسه وضربها فيه و هزها بقوه ومسكها من جلابيتها الانيقه : لا تحجين ..شقلت لج ؟؟؟؟؟؟؟
محمد بعد ماسمع الصراخ : هدهاااا يانايف

نايف : اسكت..خلني اربيها هالجلبه اللي ماعرفوا امي وابوي يربووونهااااااا
ضربها بقسوة النمور والاسود على خدها وشد شعرها وركب معاها الدري وخلاها تزحف وراه ودموعها منهمره كالشلال !!
محمد ماقدر يمسك نفسه ركب الدري بسرعه البرق ومسك نايف من جتفه
نايف التفت له : هدني...ودزه دزه قويه

محمد بعصبيه : هدها ماسوت لك شي عشان تذبحها جذي
نايف التفت له وويه محمر من العصبيه : يالثور..ساره حقيييره وماتستحي
محمد : شتخربط ؟؟
نايف : اختك الخلوووقه...تكلم سكرااااااااااان !!
وقفت دموعها بدهشه..!..: جــــــذااااااااب

نايف كمل طريجه ووصل اعلى الدري وجر ساره وحذفها على الارض وراسها انصدم بالرخام..تألمت ودموعها تنزل : جذاب والله جذاااااااب.. لا تصدقه يامحمد لا تصدقــه
قالت له بتوسل ودموعها تسبق كلامها : نايف...علمني شصاير ؟
نايف شد على يده بصمت ونسى نفسه..كان هادئ دائماً..بس الحين ثار..لانه بركان هااااادئ

مسكها من شعرها مره ثانيه وقومها من على الارض وقالها في اذنها : انا اقولج شصاير ؟؟

مشى فيها للمر اللي يوديها لغرفتها ودزها على الرفوف اللي كانت مصطفه عليها الكتب..حسها تألمت وخاصرتها انجرحت والدم نزف..بس..مابيسكت ..ضربها بقوه مره ثانيه وهي تصارخ من الألم ومحمد جنه محنط

محمد مستغرب وبهدوء: ليش يانايف ؟؟
ساره الضعيفه تستنجد بمحمد ومحمد وعى من سرحانه وشافها بابشع صوره..شعرها منشد بايد نايف والدم يسيل من خشمها والجلابيه تقطعت !

محمد : هدها ياللي ماتسحي..هــد اختــي
نايف : والله لا اربيج يالوصخه..(حذفها بأقوى ماعنده داخل غرفتها ووقف ورى خط الباب وقالها : ان شفتج عديتي هالخط والله ماتلومين الا نفسج
ساره ماسكتت وقالت بألم الدنيا: مالك خص فيني
نايف صرخ عليهااا : جااااااب
ساره قالت بقهر وردت على كل الضرب اللي ضربها بكلمه : انت مب اخووووووي
محمد : عيييب ياساره
نايف تسمر مكانه من كلامها القوي...لحظات وقال بعدها:...صج انج ياهل..تردين مثل اليهال بعد ؟؟
ساره ضحكت بقهر : انت مب اخوووي..اطلع بـــــرع
محمد راح لنايف قبل لا يضربها ومسكه من جتوفه : معلي يانايف..صغيره وكلامها كلام جهال..لا تهتم ؟؟
نايف يلهث ونفس قوي داش وقهر طالع : راجع لج

تركهم ونزل للطابق التحتي وركب سيارته..شغلها بلا وعي..وهو مب مستوعب..ضرب ساره...اخته وحبيبته...طفلته الرقيقه..ضربهــا...بشراسة الحيوانات..؟؟.....شسويت ياربي ؟؟....


----------



يتبــع..في الجزء الثامن عشــر


ولكم اطيـــب التحايــا..

[دلوووعوووه]

مشكورة اختي بنت الدوحة

وننتظر الباقي

[ضباااااب]

يسلموووووووووووووووووووووووووووووو

[دلوووعوووه]

وين الباااقي :(

[دلوووعوووه]

؟؟
؟؟
؟؟
؟؟
؟؟
؟؟
!!
!!

ننتظر البااقي

[دلوووعوووه]

طـــــــــــااال الانتظااار

[غزاله]

مشكووره بس وين تكمله القصه

[دلوووعوووه]

?????????????????

[غزاله]

يلالالالالالالالالالالالالا عاااااد

[فديت قطر]

يسلموووووووووووووووووووووووووووو ويعطيج العافيه على القصه الروعه

روعه من قال روعه والله اكثر من روعه وبصراحه قصه تضحك وتعور القلب في

نفس الوقت بس قصه جميله والله ويعطيج العافيه على النقل الجميل ونتظر الباقي

يالله مافيني صبر بصراحه اكثر من جذي

[راعي الفزعات]

تكفــون كملـــوهــا قلبي متحرقص ابي اعرف شنو بيصيــر

[همــس الورد]

ســـلااام ...
الصراااحه القصه رووووعه بس ارحمينا ونزل الجزء اللي بعده ...
شااركت والسبه ارد ع عالقصه ....