قصه قطريه في منتهى الروعه ((احزان قلبي))

[bnt aldo7a]

الجــــــــزء التــــــــاسع



-------------------------



في هذا العصر الجميل..بوضعية الشمس اللي كانت تميل شوي شوي الي المغرب..وبالوانها الحاره..الاحمر القاهر يخالجه البرتقالي واشعته اللي يرسلها لتنير بها الدنيا..الاشعه الصفراء...كانت مغطيه ارض الدوحه بنورها ..بهذا الوقت وصل نايف ميلس واحد من الربع ..

نايف وهو يسلم : السلاااااام عليكم
جابر صاحب الميلس : وعليكم السلام والرحمه..ياحيا الله من جانا ..
نايف بفرحه لشوفة اعز صديق : الله يحييك ويبجيك..شالاخبار والاحوال ؟؟
جابر : حنا تمام اهم شي انت شخبارك والحمدلله على السلامه والله مشتاااقين لك
نايف بابتسامه عريضه : الله يسلمك ..ويلتفت للاثنين من الربع اللي كانوا جالسين وبعد الترحيب والسؤال عن الاحوال ..وبعد لحظات صمت مرت عليها ذبذبات صوت التلفزيون الواطي اللي كان مفتوح على قناه اخباريه ..رن التلفون وشله جابر

جابر : الووووو...............هلا بهالصوت....... ..ياعمري ..........اخبارج ياحياتي ؟؟؟

نايف اللي كشر بحواجبه ..هالجابر مايوز عن سوالفه دومه مع هالبنات وماتفيد فيه النصايح..

جابر اللي نسى ربعه ودش ع الخط مع الآنسه : طمنيني عن احوالك ؟؟ طيب ..(بابتسامه ملؤها الشر ) وين بتروحين اليوم ؟؟؟

نايف اللي نفخ ذيج النفخه ..حسس بالجالسين بضيقه الا هالثور جابر مااايحس

نايف تعكر مزاجه مايحب يشوف الغلط جدامه ويسكت عنه ياما نصحه ونبهه بس ذاك راسه يابس وفاضي لا شغل ولا مشغله

نايف قام : انا استأذن ..

جابر : الووو........ ..هلا عمري..... ..لحظه................لحظه بس لحظه......... ..والتفت لنايف وهو ينزل السماعه: ..وين يارجال اقعد والله ودنا نسولف معك وتخبرنا عن السفره ..

نايف بعد نظره عن جابر : خلها بعدين في وقت ثاني ..
جابر : يه..ليش بس ؟؟
نايف عيونه على سماعة التلفون اللي بيد جابر : لانك مشغول ماودي اعطلك..بس ارجع لك بعدين ( وطلع من الميلس والشباب ماقالوا شي متعودين على جابر والميلس ميلسهم..يااا حيااا الله الشبااااااااااب ) ..

جابر عقب ماسكر عن الآنسه الحلوه اللي يكلمها وبالززوووور بعد ذل نفسه وعقب سكر وركيييض صوب نايف اللي كان على وشك انه يركب السياره ..


جابر يصوت على نايف وبلهجته البدويه الحلوه : من صدقك انت وين بتروح تعال اجلس ووسع صدرك معنا ..
نايف فتح باب السياره ووقف مجابل جابر : مابي...مابي اقعد بمكان يصير فيه اي شي غلط وجدااام عيوني..احس بتأنيب الضمير اني مانصحت..
جابر من الفشيله مايدري شيقول : اسف والله اسف ماني بعايدها بس تكفى ارجع واشرب لك شاي كرك ..
نايف صكر باب السياره بعصبيه خرعت جابر اللي يصغر نايف بسنتين : جاي كرك ؟؟ وبعدين ؟؟ بترفع السماعه وبتقول ( يقلد صوت جابر الناعم ) الووو.. هلا عمري... هلا فديتج... هلا عيوني.... وعقب شوي ..ولي زين..وطرااااخ في ويها وبعدين ترااااااي اقيييييين !!

جابر : والله العظيييييم اسف وربي اسف بس ارجع يالله ( ويمد يده صوب الميلس ) تفضل ..
نايف تخصر : مابي
جابر يفتح عيونه ويوسعهم بطريقه طفوليه تناسب عمره : افااااااااااااا تردني !!
نايف : لا..مب رادك..بدش وبسولف معاك وبنفرفش وبنكسر حب وكل شي بس الاهم والاهم والاهم ..الشي اللي ودي اعرفه ..ليش نصايحي تطير في الهوااااا وتضرب في عرض الحااائط ..تشوفها غلط ؟؟
جابر بخجل من تصرفاته.: تدري بي ياهل وعقلي صغير وماعندي غير هالسوالف انشاءالله بستعدل..بأذن الله ..
نايف : ترى بيي يوم وبتندم..اشـــد الندم وبتدعي ربك ووتركع وتسجد مليون مره عشان يغفر لك هالذنب..اللي تشوفه بعيونك صغير وتافه وكل الشباب يسوونه..بس تراه ذنب كبير وماينغفر بسهوله(جابر منزل راسه ..يدري ان هالكلام صح..بس شيسوي ؟؟..متعووود ) وكمل نايف

نايف : خصوووووصاً وانك تدري ان هالشي غلط وتظل فيه..
جابر يمسح على جبينه اللي حمر من الفشيله : ادري والله ادري بس بالتدريج انشاءالله ..ولا تحن علي ترى اهووووون
نايف باستنكار لجملة جابر الاخيره : انشاءالله..الله يثبتك على الخير
جابر : امين يارب..بس انت ادخـــــــــــل وعط اللي داخل محاضره تراهم مثلي مب بس انا اللي عندي حركات زين..(وبطريقه ضحكت نايف ..خلا صوته اشبه بصوت الباكئ ) حرام عليك على بالك انا (وبرفع السبابه ) الوحيـــــد على سطح الكره الارضيه اللي عندي حركات..الله والحركات بس تلفون مسكين انا فقـــير ..(ويناظر نايف وهو مظيج بعيونه ومتكتف ) بس ياااااااما تحت السواهي دواااهي ..

نايف المسكين فتح عيونه باحباط : افااااا ..الله يساااااااااااامحك ..بس تدري شلون ؟؟
جابر : شلون ؟؟احمر ولا اسود ؟؟
نايف : رياني ..بس خيراً تعمـــل شراً تلقــى
جابر يدفع نايف اللي كان يضحك.. لداخل البيت : مع ذاااا الوجه اقوووول..تقول كنه حب مصرري..


*****


في مكان يبعد عن قطر..


في قاره ثانيه..


وفي طياره محلقه في الجو..


مابين السماء والارض..


وفي بال مشغول.
.

وقلب مهجور..


وروح تتساءل؟؟

ليه الناس تبعد عنها ؟؟؟


كان قاعد في مكانه في الطياره..مسند راسه على يده ومنحني وعيونه في حضنه..وفيه النوده..يراقب الرايح والجاي..المضيفه وهي تروح وتيي..الرقود حوالينه..صوت المكيف القوي..كل هذا الهدوء اللي اهو فيه..ماقدر يخليه ينام ويستغرق ساعه ونص حتى في النوم العميق..لان القلب مشتغل..والعقل مشتغل..فــكيف النفس ترتاح..؟؟؟


اتصل في اهله وبلغهم بموعد وصوله للدوحه..بس..الكل استغرب واولهم رفيجه مبارك..لانه الوحيد اللي كان يعرف متى فيصل بيرجع الدوحه..وحجزه ماكان اليوم !! ..بس هو اضطر انه يعجل في السفره..لان ناس على بالهم بيشردون منه..بس ويــــن.. وخصوصا انه يعرف الاسم الثلاثي يعني بسهوله يقدر يلقاها..ولوووو كانت في الصييييين..

بيوصل لهـــا..بعد ساعات قليله..اللي كانها سنين طويله وهي تمر..طويله بالثواني..طويله بالايام ..

-------

في بيت بو محمد وفي غرفة ساره كانت ساره قاعده وتسمع السالفه اللي قاعده تسردها لها دانه..

ساره كانت قاعده على طرف السرير..وهي مندمجه وفاتحه عيونها باستغراب : وييييييييييه وبعدين؟؟ شصار ؟؟
دانه اللي كانت متربعه في وسط السرير.. حاست ببوزها وبقرف قالت : جاااان ايي ذاك العنز اخوج ويعكر الجوووووووو ..
ساره : انزين انزين بعدين ..
دانه بتفكير : اممممممممممم لحظه(حكت راسها) نسيييييت شصااار ..
ساره واصله حدها تموت وتعرف هالمحمد شمسوي : افففففففف يالله عاد كملي ..
دانه : ههههههههههههههههه عاد عقب(وسكتت شوي )..(وكملت).. طلع نايف..على طول.. جنه مب مصدق ان في احد انقذه من اللي اهو فيه الا جني وحش ولا باكله..(ومسكت طرف الشيله ولعبت فيها باصابعها) مايحس هالولد ..خشب..لوح..صخـــــــــر..
ساره تسايسها..:لاااااا دنوي انتي ماتعرفين نيوف هو شكله بارد بس من داخله براكين ودها تنفجر وتحذف الحمم على الغير وتحرق الناس من اللي فيها..(برجــاء)..بس كملــــــي تكفين..
دانه تنهدت وكملت : انزيـــن..عاد عقب قعد يقولي شفتي ساره ومادري وشو وعقب شوي جان يبحلق في صورة نايف ويقط علي ذيج النغزه اللي واللـــــــــــه(وترفع يدينها في الهوا) ان الحمار بيفــــــــــهم ..
ساره : شقاااااال هالريال ؟؟
دانه : ويه ..هذا اذا ريال بأفعاله الصبيانيه اللي يسويها انا مو مره..صدقيني..يبي يتحداااااااااني بس معلي انا اعرف اتصرف..بس سمعي..قال اللي على راسه بطحه يحسس عليهااااا ..
ساره بغير تصديق : شنهووووووووو !!؟؟!!
دانه : ايه..شعبالج..وانا رديت وقلت..كلن يرى الناس بعين طبعه..
ساره بصرخه خرعت دانه : شنووووو شنووووو هيه انتي على كيفج..؟؟
دانه بفخر : عشوووووون عيل

ساره تدزها بخفه وتضربها على جتفها : انتي هبله (وضربه على جتفها) خبله؟؟ بقره ؟؟؟
دانه تمسح على جتفها :آآآي ياحماره لا تضربين شسويت انااااا..؟؟
ساره : ماسويتي شي بريئه..لسااااانج يلوط اذانج..انتي على بالج محمد سهل؟؟ انا اخته ومااقدر عليه..الله يعينج صدقيني مب هادج..الا لما يسوي اللي في راسه .
دانه علقت في اذنها الجمله الاخيره: شنو اللي في راسه؟؟
ساره تداركت اللي قالته : هااا..يعني..يعني..اقصد انه بيلعوزج شوي وبيننج..
دانه ببروووود اعصاب قالت : عااااااادي هو بيلعوزني..انا بغربله..هو بينني؟؟ انا بذبحه ..

ساره هزت راسها : الله يهداج انشاءالله..وخذت سويت من الصحن اللي قدام دانه وكلته..



--------


عند البحر.. محمد كان قاعد على الرمل وعيونه سرحانه في الرمل ولو ودها انها تدش في الرمل وتبحث بين حباته على شي يهديه..الهوا اخترق شعره وخلاه يطير بحريه وبدون تحكم من قبل اي حد..بدر اللي كان موجود في هالمكان قبل مايجي له محمد..مستغرب من حال محمد صار له ساعه من وصل وهو سرحان..يلاحظ حواجبه اللي ثواني تتشربك وثواني تهدى,, وعيونه..اللي ثواني تغمض بقهر وثواني ترفع نظرها للسماء وتدقق في الغيوم..ابد مافهم حاله..

بدر بزفررره : افففففففف محمد لوعت جبدي شفيك ؟؟
محمد يلتفت حق بدر اللي قاعد على يساره : هااا ؟؟
بدر : ها وهووووووى مسويني صمنديقه
محمد بدون نفس : بدور إسكت..

بدر : اسكت؟؟ لا قوووويه اكيد في شي؟؟
محمد : مافي شي..
بدر : مافي شي ؟؟ في اشياااا ؟؟
محمد : يااااااخي خلني في حالي..
بدر : هاااااا عرفت..(بتنهيده) اييييييييه الحب ومايسوي..
محمد بتهديد : والله..(ويلم شوي من الرمل وياشر بيده)لااااااا احرق عيونك بالرمل..
بدر : انشاءالله انشاءالله.. تكفى الا عيوني خلها في حالها.. فيها اقدر اشوف حياتي ودنيتي و..(ويمد عيونه على امتداد البحر)..وحبيبتي..
محمد:حَلماااان بعد ..الله يعطيك اجر انشااااءالله ..ممكن لو
بدر قاطعه:آمــــرررر لك عيووووني ..
محمد بضحكه وغمزه بعيونه : لا خلها لك..عشان تشوف حبيبتك..
بدر بجديه:لا والله صج..آمر شتبي؟؟
محمد نثر على ثوب بدر الرمل : ابيك تسكــــت..
بدر مايحب حد ينرفزه..بس هو ينرفز..اي : هههههههههههههههههه
محمد بتوسل وهو شابك يدينه ببعض ورافعهم : تكفــــــى..بدوووور..عااااااد
بدر : ههههههههههههههههههههههه ثمووووووود


--------


يوم الجمعـــه..يوم مبارك على المسلمين..وفي هاليوم من عادة هالعيله انهم يتيمعون فيه ..جمعه في بيت بو محمد وجمعه في بيت بو بدر وجمعه في بيت بو ملاك(اخوهم الصغير) واذا كانت عندهم ظروف انهم مايسون العزايم تجمع كبيرهم وصغيرهم..تكون اليمعه بين البنات واذا البنات ماسووها..تكون بين الشباب وربعهم..


بو مــلاك..او بو عيسى على ولده الصغير اللي له شهرين ..كان وده يسميه نايف..من حبه لولد اخوه نايف اللي يصغره بثمان سنين..الا ان مرته ماخلته لان ملاك هو اللي سماها..اول ماشافها ببياضها وروعتها وهدوئها حسها من طين على هيئة ملاك..بس عيسى سمته امه على اسم ابوها..اللي قبل لا يتوفى_الله يرحمه_خلاها في عهدة شخص هو واثق منه وواثق انه يقدر يأمن حياة عليا(زوجة بو ملاك) ويسوي كل اللي تطلبه..وصار اللي كان خاطره فيه..وخذت بنته منصور(بو ملاك ) وكل اللي كانت تبيه وتتمناه هو امان منصور ودفاه وحضنه من بعد ابوها اللي كان آخر مابقى لها في الحياه..


بو ملاك محتفظ بجماله ووسامته ورجولته..فيه الملامح الاصيله..السمره والانف على حدة السيف..محد خذ منه هالشي الا ولده عيسى..خذ من سماره الفاتح وخشمه..مثل ماقلت عيسى له شهرين ومــلاك 4 سنين..ملاك شكل مصغر من امها..عليا..تمتلك بياض البشره والشعر الناعم الحرير وبلونه.. ظلام الليل وسكونه..

في هالوقت..عقب صلاة المغرب..محمد وبدر ردوا من البحر..لان الظلام بدى يغطي الالوان الحاره اللي كانت متداخله ببعضها في السماء..رد محمد البيت وغير ثوبه وتكشخ وتعدل..وبدر بالمثل..كانوا البنات يبون يروحون بيت عمهم منصور مع محمد..الا انه سبقهم وراح عنهم ووصى نايف انه يوصلهم..


نايف حاط يدينه في مخابيه وهو يصوت على ساره : سااااااره تاخرنااااا يالله بسررعه ..

ساره حطت شيلتها على جتفها وراحت صوب الدري وشافته من فوق وهي مدنعه : يااااايه ياااااايه انطر شووووي ..

نايف رفع راسه وكلم ساره : شااااانطر ابوي ركبته في السياره وانتي هني !!

ساره راحت غرفتها وهي تتأفف من هالنايف..

دشت الغرفه وشافت دانه تحط لها قلوس : دنوووي شوفي نايف سندرني..افففففف كله منج .
دانه : هااا مني اناااا (سكرت غطا القلوس وحطته في شنطتها وعدلت شيلتها على السريع ) انشاءالله..اهم شي شيخ الشباب..(وتلتفت عليها وبصرخه ) ياللـــــه عدلي شيلتج ونزلي لا تخلينه ينطر اكثر من جذي ..

ساره فاتحه عيونها ومستغربه هالتاخير كله من تحت راس دانه : انااااا يالمفتريه ؟؟
دانه اللي وصلت عند الباب التفتت على ساره : الحين بنبتدي..اناااا واناااا واناااااا..قلت لج جدااااااااامي يالله ..
ساره وهي تحاجي نفسها بحسره : جوفوا تأثير نايف عليها صج مفعوووله قوي وسحري..كلمه وحده منه حركتها واناااا اللي صار لي نص ساعه اقولها يالله يالله ومتلزقه في المنظره ..


ساره خذت شنطتها ولحقت دانه ..وعلى الدري..دانه مالقت نايف اكيد في السياره..

دانه : اوووووووف ياناس افففففففف..
ساره وصلت عندها : انتي شفيج من العصر طايحه فينا اف واف..يايما شفيج معصبه ؟؟
دانه اشرت على نفسها : انا مب معصبه..انا منقهره ..
ساره : من شنو ؟؟؟

سمعووااا صوت نقزهم من مكانهم لي الباب..هذا نايف حرق هرن السياره وهو يهرن على هالبنات..

ساره : هيييه دنووووي شفيج ..
دانه : ولاشي ..

يمكن دانه ماقالت حق ساره اللي فيها..بس نيرانها وهي تصرخ في اعماقها كانت على وشك الاحتراق..يعني الحين محمد يكشخ ويتزقرت ويروح عنهم..ويخلي نايف يوصلهم..اهي عادي عندها ان نايف يوصلهم اكيييد شي يونسها دام نايف حبيبها معاها..الا انها بسبب غريب تحس بقهر ونار ..حرقها محمد وراح..ماودها تقوله هيه انت شفيك تدخل عصك في شي مايخصك وتتدخل بيني وبين نايف....لاااااا هذي اخر اهتماماتها..بس هي ودها توقفه..وتاخذ ثأرها اكثر من الكلمتين اللي طلعوا منها..ودها في شي اكبر..لان محد يقدر يرفع حسه على الدانه لو بالحجي والامثال..قال لها كلمه ترد عليه..عشررر..


اول ماوصلوا البنات راحوا صالة الحريم..وبو محمد ونايف راحوا ميلس الرياييل وبعد السلام والسؤال عن الحال والسوالف بين الشياب والشباب فتح بو عيسى سالفة الزواج وليش انتوا يالشباب قاعدين بلا شغل ولا مشغله وهاااااات من هالكلام وخذذذذ نصااااايح..

عقب مايأس بو عيسى : انا ابي اعرف شله تقعدون عزابيه هالكثر..تبون تحطمون الرقم القياسي؟؟هااااااا ؟؟ ياخي تزوجوا وتونسوا وخلوا لكم قيمه لما توصل من الدوام يكون ذاك المجبوس ناطرك ولماااا..

قطعه بو بدر : ولمااااا تتاخر(يمثل بصوت نسائي) وييييييينك؟؟ ليش متاخر ؟؟ وين كنت فيه ؟؟ وليش ؟؟؟ وشلون وصلت له ؟؟ وابي اعرف..انت شموديك هناااااك ..(تغير صوته للخائف كانه يرد على الصوت النسائي ) اممم..ا..انا انا كنت في الميلس
ويكمل عليه محمد وهو ناقع من الضحك : هههههههههههههههههههه وترد هي (بصوت نسائي) عاااااد انا قلت الساعه 8 تكون في البيت مب 9 ؟؟؟
ويكمل بدر وهو مندمج وكلهم مسوين حزب ضد بو عيسى المسكين جان زين لو ماتكلم الحين شبيسكتهم : وشوي الا بالنعاااااال ..
نايف : ههههههههههههههههههههههه ل..ههههههههههه..لا حرام هههه عليك مب جذي
بدر : انت شدراااااك والله ماتدري
بو عيسى : اسمعني يانايف ..انا يأست من هالعزابيه مايفيد فيهم الحجي اسمعني انت..ترى الحرمه الوحيده اللي تسال عنك وتهتم فيك وتسوي لك ذاك المجبوس اللي تشم ريحته وانت على مكتبك في الدوام..صدقني بتمل من هالعيشه اللي انت فيها
محمد يتطنز على عمه : بيتزوجها عشان المجبوس ولا شنو ؟؟
بدر : ههههههههههههههههههههههه
نايف باستغراب : بس ياعمي انا توني صغير .
بو عيسى : ولووووووو..
بدر بحركات صغااار يكلم نايف وهو يحرك راسه بالنفي : لااااا تسمعه ..
بو عيسى التفت عليه :: جب انت
بدر : اناااا جب ؟؟


بو محمد : يه يعني حتى هني ماتيوزون عن حركاتكم انتوا ؟؟ كل واحد كبره كبر ال..مابقول بس تراكم كبرتوا وتقطون على بعض هالكلمه جب جب مب زينه هالكلمه قولوا انت اسكت انت اسكت وشو جب !!
بو عيسى : هههههههههههههههههه عبدالله زين انك هاوشت بدر تراه يستاهل واكثر
بدر باستنكار : مادري من اللي توه قالي جب جب ..
بو عيسى غير وجهته لمحمد السرحان : وانت مابتتزوج ؟؟

محمد كان منغمس في الشرود بشكل كبير كانه مايسمع اللي حوله يشوفهم بس فكره بعيد .. الجسد موجود ولكن العقل بعيد : هاااا..شزواجه بعد ؟؟
بو عيسى لقى نبرة في صوت محمد هو مب معتاد عليها فيها غضب وسأله : لا بس نتشاور في الموضوع..ليش عصبت ؟؟
محمد المستغرب من حالته الغريبه : انا معصب ؟؟ لا بس كان قصدي..اا..يعني..اني اتهنى في شبابي اول واذا على طاري الزواج الايام يايه وانا (وعلا صوته عشان نايف يسمع ) بتزوج وقريباااا انشاءالله ..

[bnt aldo7a]

التــــكمــله

-------------------


نايف حس بنغزه بس ماتحرك ولا صدر منه اي شي يبين انه متضايق او فاهم خلى عيونه في الزوليه اللي كانت على الرخام وعيونه اتشربك في رسمها والاشكال اللي عليها..يت على باله دانه..هو ساعات يحس انها لما تكون قريبه منه تستانس وساعات تضطرب وساعات ترتبك وساعات تخاف..غريب حالها..لما تكون معاه اسلوبها يتغير.. هي معروفه بكثرة الكلام بس معاه تقلل من كلامها وهذرتها وغشمرتها وتركز على الهدوء..يمكن على بالها بالهدوء تقدر تقرب من صفه من صفات نايف الا ان نايف مايحس بشي اتجاهها..ابد..الا انه كان يلعب معاها يوم كانوا صغار ويوم كبروا شوي تباعدوا..وصار اهو مثل اي ولد تهمه سوالف الشباب والسيايير وبعد عن الطفوله وهي بالمثل..


بس نايف غير عن بدر ومحمد..بدر ومحمد اذا شافوا بنات يستخفون والا خصوووصا اذا وحده لووو بالغلط طالعتهم بعد يلاحقونها..غير عن نايف اذا شاف وحده ينزل راسه والبنت تكون عكسه اهي اللي ترفع راسها ونظرها..اذا تواجد في مكان فيه بنات يطلع ويخلي لهم المكان عشان يرتاحون او هو يرتاح..مايحب يتواجد في مكان يكون فيه بنات..هذا مو مرض..ولا حاله نفسيه..بس لان امه هدته وهو صغير وهو متعود عليها وعلى حنانها وخلته في دنيا مافيها الا بنت وحده اذا قدر يعطيها من الحنان والدفا اللي عطته امه يعطيها..اذا بيعطيها قلبه يعطيها..ولو تبي عمره يرخص لعيونها..اخته ساره..البنت الوحيده اللي عاشت في دنيته بس مصيرها الزواج ..بيهد اخته يعني بيهدها..عاجلاً ام آجلاً..وهي بعد بتهده يعني بتهده..مصيرها بيت ريلها....لذاا فكر في حل يانايف ..


على العشى..عقب ماتعشوا الحريم حلوا بالكيك والسويت والقهوه اللي تخلي الطعم يحلا..وبوسط الضحك والسوالف..استأذنت عليا لان ولدها عيسى كان يصيح ويوعان وقبل لا تروح وصت دانه انها تأكل ملاك اللي كانت تلعب وقت ماتعشوا الحريم..ولبست دانه عبايتها ولفت الشيله على راسها..نظراً للمكان اللي فيه البوفيه..يطل على ميلس الرياييل بس بين الغرفه اللي فيها البوفيه والميلس باب..


دشوا ملاك ودانه الغرفه الكبيره اللي فيها البوفيه وبدت دانه تحط الاكل حق ملاك وملاك تنقز من مكان لي مكان..ابي كافي ولا ابي ايس كريم ولا بيبسي ودانه قد ماتقدر حاولت تحط لها الغذاء المفيد

بس حنة اليهال وماتسوي..وبصوت طفولي رقيق : خااااالتي دااانه ابي بيبثي (وتاشر بصبعها على المكان ) اللي هنااااك ..
دانه لفت راسها لملاك : لاااااااا شربي عصير
ملاك : خالتي ابي بيبثي الله يخليييييج خالتي (والشفايف نزلت على تحت بويه عابس ) الله يخليييييج
دانه باستسلام وهي تهز راسها : زين ..روحي اخذي لج بس شوي شوي عن لا تكسرين شي

وملاك الصغيرونه سبقت الهوا وراحت صوب البيبسي بفرح بعد مااذنت لها دانه بشربه ..

دانه وهي تغرف حق ملاك كانت تكلم نفسها..والله هاليهاااال الله يعيني عليــــهم..بس ماحست للشخص الثالث اللي كان موجود بالرغم من طول وعرض الغرفه..الا انها ماحســــت ..


الحين حست بحد موجود..يوم سمعت ارتطام شي بالارض والتفتت ..


الا بويهه وهو رافع طرف ثوبه اللي اتسخ بالبيبسي كله اللي انكت عليه بدون قصد من ملاك ..

هدت الاكل ورفعت يدها وحطتها على حلجها..ابييييييييه..البيبسي انكت..عليه..محمـــد ..محد شاف صح ؟؟؟ ياويلي الحييييين بيهد علي ..مالي خــــص والله بريئه ..

ولكن خابت ضنونها وبدى محمد يزفر بعصبيه وهو يحاول يمسح على ثوبه بالماي : افففففففففف شهاليهال مايشوفون..ولا حد يشووووفهم بعد ؟؟؟

دانه رفعت حاجب ..شنو محد يشوفهم..واللي يسلمك عاد المفروض انت اللي تشوف جدامك مب هالصغيره اللي مالها ذنب ..ردت بخطوات قليله على ورى وخذت صحن ملاك من على الطاوله ولحقت ملاك لخارج الغرفه..طلعت ملاك بخوف وعيونها كانت تنبأ بنزول الدموع البريئه ..تروعت من صراخ محمد ..بس بعد هو كاشخ ومتعدل واخرتها ثوبه يتوصخ !!


مرت بهدوء وحاولت تهدي دقات قلبها..كانت سريعه من الخوف مو من شي ثاني ..


بس استوقفها وهو منشغل بتنظيف طرف ثوبه : مره ثانيه فتحي عيونج على اليهال ولا تغفلين ..

دانه..ههههه..معلي..مسكت اعصابها وتماسكت علشان ماتثور عليه..ماتحب تاخذ وتعطي مع حد غريب..مثل عيال عمها يعني..بس كان هالشي للحظــات ..وردت عليه وهي معطته ظهرها ومتلذذه في هالشي ..انه ينظف ثوبه بحسره وقهر..بس اهي ردت عليه بانتصار : مره ثانيــــه ..افتح عيونك عــــدل ..وطـــالع جدامك وانت تمشـــي..


واختفت في لمح البصـــر..ومحمد اللي لا زال منكس راسه بس يده توقفت عن التنظيف..واستعدل في وقفته وردت يده لمكانها وطرف ثوبه نزل ..رفع راسه وعيونه متركزه على المكان اللي كانت فيه ..شفاكره نفســها ؟؟.. اهي ماقدرت تمسك نفسها..بس لو ظليتي جذي بتخسرين الحرب..واذا انتي ناويه بتسرعج انج تخسرينها..انا مستعد اكسبها ..وبتشوفين ..


---------

في هالوقت..منتصف الليل..وصل فيصل قطر وكله شوق لاهله اللي ماشافهم من سبع شهور..ولهان عليهم وعلى شوفتهم وحضن امه الدافي ..يحس بشوق غريب لساره..متعود على شوفتها وصار مدمن عليها..يبي يشوفها..يبي يوصلها..لو تكون في باطن الارض يحفر الارض ويوصل لها ولو تكون في اعماق البحار ..يغوص ولو يغرق بعد..فدوه لها..احساس غريب يمتلكه وكانه فقد في يوم شي عزيز عليه..ماراح يهد هالشي اللي فقده ..بيسترجعه ولو..بالقـــوه ..


---------


الطرف الثاني ..ساره..كانت نايمه وشعرها المموج تبين تموجاته لانه محايط ويهها ومنهد على المخده..ولكن ..شي غريب كان يصير في ملامحها..كانت مكشره ومتضايقه وتتقلب..صراع وتشابك في ملامحها الحزينه ..كانت تشوف بالحلم ان فيصل رجع..وقرب لها ويمد يده لها وهو يبتسم لها ..وساره كانت اكثر ابتساماً..كانت فرحانه ومدت يدها ليده..ليما انشبكوا..بــــس..شافوا واحد يقرب لهم من بعيد وكانت صورته مب واضحه..مااهتموا ..بس هالواحد لما وصل عندهم..تفاجئوا ساره وفيصل ان هالشخص مر بينهم..ولما مر فرق يد فيصل عن يدها ..وساره تضايقت وبدت تعلي على صوتها لفيصل..وتناديه وتتوسله انه يظل متمسك بها ..ولكنـــه..ظل مكانه بعجز..ماعرف شيسوي..كان يشوف حبيبته ماخوذه منه ومقتلعه منه نفس الورده لما يقتطفونها.. بس ظل !!..

واللي خلا العرق يتجمع على جبين ساره بخوف..وخلاها تتقلب بضيق..وخلا شفايفها تنشف..الشخص اللي مر بين فيصل وبينها..


؟؟


الاسم مب راضي يمر على بالها في النوم ولا في الصحوه..لانه غريب..شلون يكون هالشخص..يفرق بين فيصل وساره..شايف على فيصل شي ؟؟ شايف ان فيصل مايناسب ساره ؟؟ ولا يمكن شايف ان ساره فيها شي ؟؟


قامت من السرير بتعب..وعيونها بدوا ينفتحون بغير تصديق من اللي شافته في المنام ..فتحت الابجوره اللي كانت على الكوميدينو وتعوذت من بليس وسمت بالرحمن على نفسها..خووووف يسيطر على كل حاسيه فيها..احساس يضطرب له العقل ويرجف له القلب..احساس مــروع ..


مشت للباب بخطى سريعه وخايفه وفجته..ولقت نايف قاعد في الصاله يتابع فلم وبيده بوب كورن وعايش الجوو..حست بخوف ازيد..ماتدري ليش ..شصاير فيج ياساره ؟؟ قـــولي ؟؟ ماتقدر تجاوب..ان امكن لمشاعرها انها تجاوب..بس مشاعرها ارفضت..حس لها نايف ويا لها وهو مستغرب من ساره..الساعه 2 ..


نايف : شفيج قايمه ؟؟
ساره بتوتر شديد : هاااا..لابس..(ابلعت ريجها) بغيت آخذ لي ماي ..
نايف وهو يطالع ويهها : ليش خايفه؟؟ شفيج ؟؟ شصاير ساره .. ؟؟
ساره ماردت على نايف ..وعادت الكلام اللي قالته : ابي مـــاي ..
نايف خاف من طريقة كلام ساره ولهجتها..خايفه ومتروعه..من شنو ؟؟..: انشاءالله..انتي ماعليج (مسكها من يدها وسند جسمها عليه ووصلها للسرير ) خليج هني وانا باييب لج الماي ماعليج ..(مسح قطرات العرق اللي كونت خط على جبينها ووجنتيها) لا تخافين ..اوكــــي ؟؟

ساره هزت راسها بإيجاب وهي تجر اللحاف وتغطي نفسها به..وقعدت اتعوذ من بليس وتذكر ربها وتخلي ذكره في قلبها وعلى لسانها..مصاحب لها ويخفف من الخوف اللي تحمله ..


رد لها نايف وقلاص الماي بيده ..عطاها ياه وشربته وحطته على الكوميدينو ورخت جسمها وحطت راسها على المخده وتغطت..وغمضت عيونها ونايف قام وبغى يطلع..واول ماحست ساره لخروجه فتحت عيونها وصوتت عليه وهو التفت


نايف : هلا ؟؟
ساره :.... ولاشي ..
نايف سكت لبرهــه.. ورد عليها : شوفي ساره..تبين شي ولا شي..تراني موجود..بيني وبينج امتار بس..انا في الصاله وبخلي باب غرفتج مفتوح ..واذا حسيتي بشي على طول تعالي لي..لا تخافين اذا انا موجود.. ولا انا ليش هني ..مو عشان احميج واحرسج ؟؟؟

ساره ابتسمت له بطمأنينه بس هالطمأنينه تزول بمجرد انها تتذكر الحلم وترد تتضايق ..راح نايف وخلى الباب مفتوح ورد لفلمه اللي نساه مشتغل وطافته احداث لازم يسوي ريواينغ عشان يشوفها.. وساره لازم تسوي فور وورد عشان تطمن نفسها وتنام ..


------------



مشى الوقت بحذر للحاضر..مشى بحذر وعقارب الساعه تحركت بحذر عشان لا تتعثر..في هالصباح المشرق وفي بلكونة الصاله بجانب طاوله كلاسيكيه وشاي وحبتين بسكويت وجريده انجليزيه..كان فيصل يتابع احداث العالم وقلبه يعد الثواني للي يبي يسويه ..ياخذ بسكويت ورشفة شاي تهدي باله المشغول من امس..رقد عدل الحمدلله بس يحس حتى وهو نايم انها تطوف قدامه..يتــوهم..يــتخيل..ولا يحلـــم ..مايدري


ياله اخوه يوسف وقعد على الكرسي اللي يقابله : هاي مان واتس آب ؟؟
فيصل : قاعدين..وانتوا شخباركم وشسويتوا ؟؟

يوسف 18سنه.. شكله غير عن فيصل من قلب..على الاقل فيصل فيه ملامح خليجيه الا ان يوسف اللي يشوفه مابفكر انه خليجي ابد..انجليزي ميه بالميه : كنااا بنروح استراليا بس امي مارضت..تقول تنطرك ليما ترد ونروح مع بعض ..
فيصل التفت باعتراض : نروح مع بعض ؟؟ لا مـــابي انتوا روحوا واستانسوا وانا بقعد هني ..
يوسف : وااااي ؟؟
فيصل بتهرب..مستحيل يخرب او يأجل اللي في باله : بس جذي..ابي ادور في الدوحه واروح كل مكان وكل بقعه ومابي اسافر.. مب مشتهي ..
يوسف : على راحتك ..بس شوف راي ابوي..انا اتوقع انه بيرضى لانه محتاج احد يمسك عنه الشركه طول فترة السفر ..
فيصل بدون اعتراض وعيونه على الجريده : على عينـــي وراســـي
يوسف يتنهد : يااااااااه يو آر استرينج مااان ...انسان غريب صراحه يحب الشغل والدنيا تكون على راسه ومايروح استرااليا..

فيصل ابتسم وماعلق..ويوسف قعد يتأمل منظر الطبيعه اللي جدامه..ورى البيت حديقه كبيره مساحتها اكبر من مساحة الفله نفسها..خضره تريح عيون الناظر وفيها في الوسط..نافوره كبيره..حلو ان الواحد يقعد على طرفها ويلعب بالماي..ويتمشى ويقعد على المرجيحه المتعلقه في الاشجار الضخمه..وعليها تتسلق الاوراق وورد الياسمين ..

-----------

بعد يومين..مشت الاحوال مثل ماهي ..ساره اللي الحزن صار ملمح من ملامحها الساحره..دانه لازالت تعيش في صراع وتخطيط للي جاي حق محمد ولا زالت محافظه على الحب اللي في قلبها لنــايف..ماتبي احد يجيسه ويقتلعه من قلبها بالطيب ولا غصب..عاشه اللي ردت من لندن امس الصبح..

دانه في هالصباح الباكر كانت قاعده في الصاله التحتيه بتعب وشعرها ليما الحين مامشطته..كشه الصبح.. واتابع مسلسل خليجي قديم..

دانه بكسل : يمااااااااااا
ام بدر وهي تصب لها جاي : نعم يمااااااا
دانه : صبي لي معاج
ام بدر : انشاءالله
بعد لحظات..: يما شرايج اعزم ساره وعاشه اليوم ؟؟
ام بدر وهي تعطيها كوب الجاي : وليش عاشه ردت ؟؟
دانه اعتدلت في قعدتها : ايه..امس طرشت لي مسج اول ماوصلت وانا اتصلت فيها وتحمدت لها على السلامه وقلت اتصل فيها اليوم اعزمها وانتيمع هني ..
ام بدر : زين والله..على كيفج..ثنيناتهم متعودين علينا..عزميهم

نوره دشت عليهم الصاله وهي تتثااوب..شفيهم اهل البيت قايمين من الصبح وحالتهم حااااله

نوره وهي تبوس راس امها : صبااااااح الخير ماما
ام بدر : صباح النور يانوووور
دانه : اهلاً اهلاً وسهلاً في اختي الصغنونه وين بوستي ؟؟
نوره قعدت احذا امها : شتبين انتي ؟؟
دانه تبي تحرها : ولا شي ..بس(وهي تلعب في كوب الجاي بصبعها ) ربعي بيوووون اليوم وقاعده اسولف ويا امي عن هالشي
نوره تخصرت : وييييييه وانا بعد بعزم ربعي ..
دانه : انتي شدخلج ؟؟
نوره : كيفي..انا ابي اعزم ربعي انتي شعليج ؟؟
دانه : يعني كل ماااسوي شي تقلديني ..لهالدرجه تحبيني يانونو ؟؟
نوره وهي تصب لها جاي : لا وانتي الصاجه من كرررهي ماعرف شسوي
دانه : يمااااااا قولي حق بنتج اليوم ماتعزم ربعها ..بيتضايقون بازعاج هاليهال
نوره باستنكار : اي يهال ؟؟؟ ليش بيتنااا صااار حضااانه وانا مااااادري نياااااهاهاهااااااااااي ..
دانه : هههههه ياملغج ..
ام بدر : شوفي نوره باجر تعزمين ربعج خلي اختج على راحتها اليوم..
نوره معااارضه بقوووه : اليوووووم
دانه : نوروه تكفين ابوس راااااسج..خلي عزيمتج باااجر..بسوي لج اكبر حفله وباعزم لج ميكي بعد
نوره : انتي عبالج انا ياهل ؟؟
ام بدر : لااااا اله الا الله ..خلاص عاد ماعيد الكلام عشرين مره..نوره العزيمه باجر ودانه عزيمتج اليوم
دانه : هذاااا الرأي السديد ..عاااااااااااشت امي

قعدت نوره اتحرطم مع نفسها ..صج هالبنت تموت لو ماسوت اللي براسها..عنيده بشكل غريب وحنانه..

ام بدر : وين بدر ؟؟
نوره : راااااقد شيقومه الحين دياااااي هو ؟؟؟
ام بدر : شفيه ولدي نايم لين الحين ..اخاف مريض ولا شي ..
نوره : الناااااس يدلعووون اخر العنقود وانتي يايماا تدلعييين الكبير
ام بدر تلعوزت : اعوووووذ بالله
دانه وهي تفك شعرها وترجع تلمه مره ثانيه : لا تخافين عليه..امس سهران مع محمد ولد عمي ومارد الا الصبح ..
ام بدر وهي تضيج عيونها بتفكير : محمد ولد عمكم مادري شفيه هالايام ..متغير
دانه نقزت : شلون يعني متغير ؟؟
ام بدر : يعني..صار مايزورنا مثل قبل وحتى اذا اتصل... مايطول
دانه ابتسمت : اهااااااااااا..شدرانا فيه ؟؟
نوره وهي تاكل من الجيز ساندويج : يمكن عنده ام ثانيه ومايبيج
ام بدر اللي محمد مثل عيالها كلهم : استغفر الله ..اسم الله عليه هذا ولدي الخامس وانا مربيته من عقب امه الله يرحمها
دانه بصراخ على نوره : اعوووووووذ بالله من لسااااااانج
نوره وهي تطلع لسانها : يقطر عــــــــسل
دانه : وع الا يقطر ســـــــم


دانه اللي استنتجت شي ماكانت تعرفه..تغيب محمد عنهم هي النتيجه الاولى من الصراعات اللي بينها وبينه..هي ماتمنت انه مايمر عليهم ابد ..طبعا عشان امها اللي تعودت عليه ومحمد ولدها الخامس..بس هالشي اثر من آثار الضغط والسكر والقهر والتكسير والتحقير اللي دانه معطته محمد..يالله..الخطوه الاولى نحو الفوووز بالمعركه..صارت

[bnt aldo7a]

-----

عقب اذان العصر كانوا ساره وعاشه واصلين..استانسوا على جمعتهم وخصوصا ان صار لهم فتره ماتيمعوا فيها..

دانه وهي تحن على عاشه انها تفصخ العبايه : يالله عااااد عووووش فصخي
عاشه : مابي
دانه : ماااايصير ماتفصخين كاهي سروي فصخت
عاشه تتهرب : انزين يمكن اخوج ولا ابوج يشوفني بالغلط ولا شي
دانه : ابوي طالع واخوي راقد بعد من بيجوفج ؟؟
ساره وهي تناظر نفسها في المنظره اللي في غرفة دانه : دانه خلي البنت على راحتها
دانه : لااااااااا مب مخليتها على راحتها..(تلتفت لعاشه ) بالعقل يعني شلون تراكضين في الحوش بالعبايه ؟؟
عاشه بخرعه : وييييييييه وتبيني اطلع في الحوش بعد ؟؟
دانه : اي شفيها..محد بيشوفج صدقيني وبنلعب خشيشه صدقيني مابتندمين ..
ساره هدت المنظره والتفت بدهشه : خشيشه ؟؟
دانه وهي تمرر بعيونها على عاشه وساره باستغراب : يعني شفيها لي طلعنا في الحوش ولعبنا عادي !!
عاشه : ولي زين
ساره بتفكير : والله انا ودي العب واركض مثل ايام اول..نسترجع شوي من الماضي
دانه بسرحان : هيييييييييه على ايام الابيض والاسود
عاشه + ساره : ههههههههههههههههههههههههههههههههههههههههه
ساره : حسبي الله عليج احنا تونا منولدين
عاشه : قالت ابيض واسود قالت
دانه : شوفوا..انتوا جهزوا نفسكم ولحقوني في الحوش هاه..

ودانه كانت جاده مشت للباب وقفتها عاشه ..

عاشه وهي تترجى دانه : تكفييييييين يالدانه ياحلى لولوه خلينا هني احسن
دانه : ساره تعالي معاي وخلي هالعنز لين مايلين راسها وتلحقنا
ساره : انشاءالله ..ولحقتها
عاشه على طول فصخت..ولحقتهم وهي تصرخ ..: ماااااااالت عليكم من رفيجات مافيكم صبر وتخلوني صج ماتستحون..بتلعبوني وبتخلوني اركض مثل اليهال ماعندي مانع بس انكم تطنشوني وتروحون هذي اللي مب راضيه عنها

وهم في الحوش..عدوا ليما العشره ولي وقف العد عندها طلعت عاشه هالمسكينه..ناوين نيه شينه عليها اليوم..خصوصاً دانه اللي من قهرها اللي لازال يكبر في كل ثانيه فيها بسبة بعض الناس..وساره بسبب الحلم اللي شافته امس.. قالت بتلعب وبتنسى..لكنها ماتدري انها مستحيل..مستحيل..مستحيل تنسى انسان حبها ولو انها تركته في اصعب اللحظات واشدها..كان بأمله يتبعها..وبخطواته يلحقها..وهي كانت بيأسها تبكي ومن حزنها تخفي..تحت الغشوه اللي محد كان يدري ان تحتها كانت تنزل اغلى واصفى دموع على قلب فيصل ..


عاشه غمضت عينها وقعدت تعد بصوت مسموع لين العشر..وفي هالعشر ثواني راحت دانه في مكان وساره اللي مالقت الا انها تروح في الحديقه الواسعه اللي جنها ادغال واختفت ورا شيره..خلصت العد وفتحت عيونها..تلفتت يمين ويسار..وببطئ راحت في الحديقه..تدري ان وحده منهم هني..بس الثانيه وين الله يستر..اذا ماراحت فوق السطح..ليش لا.. جايز ؟؟..معلي اوريكم ياللي ماتستحون انتوا الثنتين

شافت ورا احدى الشير شي لونه اسود ..هاااااااااا عرفتها..هذي ساروه ماغيرها هي اللي لابسه بلوزه سوده..بس خل اصيدها..وراحت بسرعه بس بهدوء ولما قربت صوب ساره ساره عرفت ان عاشه صادتها..طااااااارت طيران وهي تصارخ..وعاشه وراهااااااااااا..وطلعوا من الحديقه وساره ماتبي توقف راحت ورا البيت وهي تصَرخ ماتبي عاشه تصيدها..وعاشه المسكينه نفس يدش ونفس يطلع..تعبت..وقفت عند المطبخ اللي كان ورا البيت وهي تلهث..دنعت وحطت يدها على ركبها بتعب..آآآآآآخخخ..بس وين بتروحين مني ياساره ..


غرفة بدر كان موقعها يطل على البيت من ورا.. بدر وعى على صراخ مايدي من صراخه..اكيد نور ولا فجر..شفيهم يصارخون والناس رقود..مايعرفون كم الساعه الحين..والله انهم تعدوا على حقوق الآخرين.((الظاهر يابدر ماتدري ان الساعه 4 العصر ؟؟))) ..قام بكسل وهو يحط يده على عينه من الشمس اللي اشعتها دشت من الستاره الفاتحه..فتح الستاره ..وفتح الدريشه وعيونه ماتشوف العالم من النوم اللي فيها..وصرخ


بدر : فجوووووووووووور نورووووووو يعلكم بمرض قولوا آآآآمين ..دشوا داخل البيت يالله اشوف..حشى مايسوى علينا نبي ننام شوي نبي نرتااااااح ..افففففففف((كلـــــمه اخيره)) صج انكم مغثـــــــــــه

عيونه بدوا يتفتحون..نزل راسه يشوف من الكائن البشري اللي عيونه تناظره بس مب بوضوح..وشوي شوي ..اتضحت الرؤيا..عيل هذي دااانه..صج حماره

وهات سب وشتم مره ثانيه من بدر على عاشه المسكينه : دااااااااانه دشي داخل يالله ..بسرررررعه
عاشه التفت ورفعت عيونها وشافته ومن الخوف اللي فيها ماتدري وين تنخش..مالقت حل الا انها ترد على ورا وتتسند على الطوفه اللي كانت وراها.. وتمشي لين ماتدخل المطبخ..

وصار هالشي ودشت المطبخ وهي حاطه يدها على صدرها اللي بيطلع منه قلبها..من الخوووووف نبضاته كانت سريعه بشكل غريب..حست ان اخو دانه ولا ابوها اليوم بيشوفها بدون العبايه..سبــحان الله..احساسها ماخاب..


بدر اللي عقب ماعرف انها مب دانه..تفشل صكر الدريشه على طول من الفضيحه وراح انسدح على السرير وتلحف وغطى ويهه من الفشيله..مايدري شيسوي..ياااااااااربي شهالموقف السخيف اللي حطيت نفسي فيه وقاعد اسبها والعن شكلها من الصبح وانا مب داري انها وحده مــب من خواتي..يااااااااااالبلشه.. اكره ماعلي اذا تفشلت شسوي وين اقط ويهي من دانه..اكيد هذي رفيجتهاااااااااااا..

[bnt aldo7a]

--------------------------------------------------------------------------------
الجــــــــزء العــــــاشــــــــر
----------------------------

قلبها كان يدق بصوره غريبه هزت كيانها..آه ياربي والله ماكنت ادري ان هالشي بيصير اول مره اتعرض لهالموقف وياثقله ..طلعت من المطبخ ودخلت من الباب الخلفي للبيت بس ترددت..تصعد الدري ولا؟؟...لان اخو دانه اكيد بيكون في غرفته..افففففف والله حاله..بصعد واللي فيها فيها

راحت والحمدلله هالمره محد شافها..دشت الغرفه ولقت ساره هناااااك..

ساره اللي تعبت من المراكض وقالت ترد ترتاح في غرفة دانه مع العلم انها ماتدري باللي صار: شفيج عوووش؟؟ شفيه ويهج متخسبق ؟؟
عاشه وتأنيب الضمير بدى يشتغل عندها : سااااره
ساره المستغربه من ملامح عاشه..فيها الحسره وشوي من الفشيله : شفيج عاشه ؟؟ لا يكون تعبتي وصار لج شي ؟؟
عاشه : لااااااا وينج انتي ؟؟ بعييييده
ساره : ها عيل شسالفه ؟؟ قووولي؟؟؟ عووووووش ؟؟
عاشه قعدت على الكرسي الموايه للدريشه اللي تطل على الحديقه الواسعه : انا قلت بس انتوا ماسمعتوني وخليتيوني افصخ العبايه غصب ..
ساره راحت عندها : ليش ؟؟ شافج ابو دنوي ؟؟
عاشه المتحسفه ع اللي صار واللي ماكان لها ذنب فيه : لااااااااا ياليت لو ابوها..بعد كبر ابوي ..جان زين
ساره شكت : اخوها ؟؟
عاشه وهي تلعب باصابعها ونظرها يلتف بين اصابعها ويرد يناظر المشهد الطبيعي اللي جدامها : اي
ساره : ههههههههههههههههههه
عاشه : شيضحك ؟؟
ساره : لا بس اتخيل الموقف !!
عاشه : ارجوج لا تتخيلينه بتنفجرين من الضحك اذا تخيليته
ساره ردت تضحك : ههههههههههههههههههههه
عاشه : افففف ساره لا تضحكين..حرام عليج انا مفتشله من الموقف وانتي تضحكين ..؟؟
عشان تخيلت الموقف..حرام علي؟؟ ومب حرام عليكم وانتوا ماتحسون بحزن العالم اللي يتملكني وانا صرت سجينته؟؟...وينك يافيصل.....؟؟...:: لا عوش مابضحك خلاص... اسفه..شصاااار ؟؟
عاشه : كل اللي صار اني شفته من الدريشه يصارخ وعلى باله اني وحده من خواته ولما شافني تفشل وصكر الدريشه ؟؟
ساره : اهااااا..يالله معلي حصل خيييييير
عاشه مارتاحت ليما الحين متضايقه واعصابها متوتره ..مع ان الشي اللي صار عادي وهي مب مسؤوله عنه
دانه الذكيه كانت منخشه في غرفه موجوده في آخر البيت..عقب مامرت ربع ساعه قالت.. لا اكيد صاير شي شدعوه ما لقتني.. وانا مالت علي مالقيت انخش الا في هالمكان ..يحليلها عوووش اكيد تلعوزت خل اروح لها
دانه راحت غرفتها وقالت اكيد بتلقى وحده من البنات هناك وصدق احساسه.. بس لقت الثنتين مب وحده منهم

دانه : السلااااام عليكم ..(قعدت صوب البنات ) شدعووووه عوووش ماصدتيني ؟؟
عاشه : الله يسامحج بس وين اصيدج وانا بهالحاله ؟؟
دانه اللي لاحظت تغير عاشه : شفيها حالتج ؟؟
عاشه : ............................
ساره جاوبت عن عاشه : شافها بدر ورى البيت وصرخ عليها بس بدون قصد وماكان يدري انها عاشه عباله وحده من خواتج
دانه مب مصدقه اخوها يصارخ على رفيجتها ؟؟..: بدور اخوي ؟؟؟؟ انتوا متأكدين ؟؟
ساره بغشمره : لا مـــحمد اخوووووووي
دانه مابغت تنسى وتشيل شوي من اللي كان معكر مزاجها : لا تـــذكرينـــــــــــــــــي
ساره : هههههههههههههههههههههه
دانه خذت قوطي الكلينكس اللي كان على الطاوله وفلعته على ساره : ياحمااااره طالعه على اخوج تذكروني بالاشيا الخايسه
ساره وهي تضحك خذت قوطي الكلينكس اللي انفلع عليها وردت قطته على دانه : اخووووووي احلى منج ومن كشتج ويسوااااج ياللي ماتستحييين
دانه قامت على ساره : هااااااااا ؟؟ شتقصدين ؟؟

ولحقت ساره اللي قامت من مكانها تجول في الغرفه تدور مفر تنخش فيه عن دانه اللي بتسطرها الحين ..قلنا لكم لا تعصبون دانه تراها ترد بعشر ..


الشخص الثالث اللي كان موجود في الغرفه واللي هي عاشه ..كانت في عالم منعزل تماماً عن الفرحه والغشمره اللي ساره ودانه فيها..وهي في ألمها وندمها على اللي صار..صح ان مالها ذنب بس تانيب الضمير معور راسها..وفي سرحانها وسط الحديقه اللي كانت تناظرها مر شخص او بالاحرى..طاااااااار هالشخص وطلع من البيت بسرعه اسرع من سرعة البرق..اخو دانه..بدر..بدال ماتسرح في الموقف اللي صار وفي حسرتها.. سرحت في شيئين في الوقت نفسه..الالم من آثاااار الموقف والفشيله..وبـــدر


-------
بدر اول ماطلع من البيت كل اللي كان يحس فيه الفشيله..مب اقل من هالاحساس ولا اكثر ..واكيد مالقى غير انه يتوجه الى ميلس واحد من الربع بس ماقدر يدش..نفسه ظايقه وعشان ترتاح مافي حل غير الزقاير..طلع زقاره وولعها وبدا يدخن..البنيه..اكيد تفشلت مثل ماهو تفشل ويمكن اكثر..ياربي سامحني على اللي صار.ماكنت اقصد اني اشوفها ولا كنت اقصد اني اقط عليها كلام بس كنت اظن انها وحده من خواتي ياربي سااااامحني..

الميلس اللي راح له بدر هو ميلس ثاني وثاني كان قاعد بروحه في الميلس.. وكانت جهه وحده من الميلس مغطيه بزجاج كامل (عاكس) عشان يمنع اي حد من رؤية اللي داخل..شاف بدر وصل على باله بيدش له بس نطر ومادخل بدر.. شافه يدخن وطلع له..


ثاني وهو يلبس نظارته الشمسيه : هلا بدر
بدر بغير نفس وهو يطلع دخان الزقاير : اهلين
ثاني وصل عند بدر : حياك تفضل ليش واقف تحت الشمس ؟؟
بدر : ابد..بس ودي ادخن شوي وبدش
ثاني عقب ماشاف نفسية بدر المتغيره : شبلاك ؟؟
بدر : ولا شي... بس متضايق شوي
ثاني يحاول يعرف السبب : شمنه ؟؟
بدر بضيق يكاد يخنقه : موقف محرج تعرضت له اليوم..ضايقني ..
ثاني ماحاول انه يطول في هالحوار لانه يدري اذا بدر تضايق من موقف يعني تفشل منه وخصوصاً انه قال موقف محرج..يعني لا تسالوني شصار

ثاني : بس عيل..خلنا ندش داخل عن حرقة الشمس ياخوي
بدر قط الزقار وطفاها : انشاءالله..تدري اني ماصليت العصر..كنت راقد
ثاني وهو في طريقه للميلس مع بدر : طافتك نومه يالجذاب سهران من امس لازم ماتقوم..وبعدين من متى صرت تصلي كل صلاه ؟؟
بدر وهو يطق ثاني على راسه : انا من زمااان اصلي ولا تخليني اطلع عيوبك العشر زيـــن !؟!
ثاني : عيوبي اذا كانوا عشر فهم اقل من عيوبك العشريـــن ..؟؟
بدر : ماتيووووووز ذبحتك النرفزه وطايح فيني انا روح حق حمود العاشق الولهان نرفزه شوي

في الميلس

ثاني : ليش شفيه محمد ؟؟
بدر : بعد...شكله حب ولا حاط في باله يمكن..
ثاني : تصدق انا بعد اشك..كل مااقعد معاه يسرح ومايسولف وايد مثل قبل..هييييييه يابدر مالت علينا احنا المساكين..محد يحبنا
بدر : قول محد يحبني لا تقول محد يحبناااا..وبعدين الحب مــب شي صرااااحه اذا هو يعكر مزاج الواحد مثل مامسوي في حمود فانا مستغني عنه
ثاني : معلي ..بيي يوووووم وبتقولي ياااثنوووووي ساعدني..عالجني..حبيت ياثنوووي حبيـــت ..
بدر : عالجني شوله بعد ؟؟ مرض هو ؟؟؟
ثاني وهو شوي وياخذ المسند اللي متسند عليه ويقطه على بدر الغبي : يااااغبي متى تحب عشااان تفهم الكلام اللي اقوووله ؟؟
بدر اللي سرح في سؤال بدر (( متى تحب ))..: مـــادري متى ؟؟؟


-------

حل المغرب وفيصل خلص كل اللى كان يبي يسويه وماباقي الا اللقاء اللي بيحدد مصيره...الظهر سأل عن عبدالله بن محمد وعرف رقم بيته..وموقع بيته بس اللي بقى انه يراقب البيت عدل عشان يسوي اللي في باله


كل اللي سواه بس عشان يوصل لها وهو ماسوا هالشي لانه مغازلجي ويبي يلحق ساره وين ماراحت ويلعب عليها وحركات يهال..لا..هو يبي يوصل للانسانه اللي هدته في بلاد كان عايش فيها نص عمره وعقب ماتركته حس بالغربه والوحشه وان البلاد اللي فيه عرق منها..مو بلاده...رجع بلاده بس عشان يلقاها ويشبع عيونه منها ويطفي شوقه لها وترجع صحته له مثل ماكانت لانها تدهورت..هذي مب ايما الطماعه الخاينه هذي سـاره..الجوهره والماسه ..الوافيه..المخلصه اللي دق قلبه لها وحس لما سافرت عنه انها حزينه..انها بكت الماً على فراقه

تذكرها وهو يقلب الورقه البيضه اللي كان مكتوب فيها رقم بيتها ومكان البيت..عيونه تذكرتها بحزن بس بأمل للي جاي

تذكر ملامحها اللي فقدها ..وعصبيتها لمن تشوفه صج كانت تعصب بس في نفس الوقت تستانس..مايدري يحس ورا عيون هالبنت حـزن..دفيــن وقديــم وعميــق..ليش هالحزن مايدري..

-------

ردت ساره بيتها مع محمد اللي خذاها من هناك..وطول الطريج كانت تبتسم..فرحانه لاخوها محمد

تذكرت اللي صار اول ماسمعت هرن سيارة محمد يطق

ساره وهي تلبس عباتها : يالله دنوي انا رايحه
دانه هدت البيبسي اللي كانت تشربه : ويه ليش تو الناااااس ؟؟
ساره : شنو تو النااااس عوش راحت بعد شانطر ؟؟
دانه : شدعوه ساره ترى هاي بيت عمج وذيج غير اذا ماتبي تقعد انا مااقدر اغصبها ؟
ساره : ويه مسكينه عوش عقب اللي صار لها اليوم تغيرت وتبينها تقعد بعد ؟؟؟
دانه : كيفها والله بس سرووووي فديتج قعدي شوووووووي ؟؟(برجااااااء) تكفيييييييين حبيبتي باتي هني ؟؟
ساره : ابات هني (دفعتها على جنب ) وخري خليني الحق على محمد والله بيسطرني ان مارحت له
دانه تجرها على ورى : خليه يتنقع احســــن

سمعوا طقات على باب الصاله..راحت ساره فتحت الباب ..لانها متاكده انه محمد

وبالفعل طلع محمد اللي استغل تأخر ساره ونزل من السياره : هلا ساره وينج تاخرتي ؟؟؟
ساره : يالله كاني ييت (وسكرت الباب)..
محمد : لااااا نطري بدش بسلم على مرت عمي
ساره : من صجك ؟؟؟
محمد اللي مايدري ليش يبي يدش...هل عشان مرت عمه ولا عشــان..دانه : اي والله ناديها
ساره بنظره تفحصيه لمحمد من فوق لي تحت : دش (فتحت له الباب ) ويييييه حمود انطر

دشت وصكرت الباب على محمد المستغرب منها..سكرت الباب في ويهه !!!!!

ساره : دنووووي لبسي شيلتج بسرعه
دانه : شنو ؟؟ ليش ؟؟؟
ساره تستعجلها : بسررررعه محمد يبي يسلم على امج ..روحي ناديها
دانه : زين زين ...

فتحت ساره الباب حق اخوها ودخلته ونطروا في الصاله..واول مانزلت ام بدر

ام بدر بزعل مصطــنع : هلا محمد ....
محمد اللي راح لها وباسها على راسها : هلا يماااااا
ام بدر رق قلبها..حرام ولدها هذا : شلونك يما ؟؟..شخبارك ؟؟
محمد : بخير الله يسلمج وانتي شخبارج والله وحشتيييني
ام بدر : ايه وحشتك ..!! صار لك اسبوع متغير علي ولا تزورنا مثل اول ولا شي
محمد : شلون ؟؟ انا متغير ..؟؟ افاااااا عليج يمااا من باجر بتلقيني طايح عندكم وبلوع جبودكم بعد( اول ماقال انه من باجر بيطيح عندهم..نغيرت نظره دانه اللي كانت واقفه ورا امها. شربكت حواجبها بضيق..كانت لابسه ملفع برونزي لايق على بشرتها الحنطيه.. )
ام بدر : من قال ؟؟؟ والله انك كنت تونسنا وكنت واحد من عيالي بس الله يسامحك ..
محمد : بتشوفين يمااا باجر شبسوي
ام بدر : على راحتك يما مااغصبك..(رفعت يدينها وهي تدعي) انشاااءالله اشوف عيالك اللي بيترسووون لي البيت وبيصيرون احسن من ابوهم ..

محمد رفع نظره لدانه اللي كانت بعيده عنه وشافها بنظره غريبه..وابتســم بخجل لها وعيونه في عيونها العسليه..ظاع في اللون العسلي اللي كنه من عسل النحل..وقال :...

ان شـــاءالله

ملامح دانه تعفست وقعدت اتحرطم مع نفسها..شفيه ذي..؟؟؟ شيقصد ؟؟؟؟ مالت عليه يبي يتزوج بنات قطر مليانين..شله يطالعني ؟؟؟ صــــــج مايستحي

ساره اللي من تحت لي تحت كانت تبتسم وودها تنفجر على شكل دانه اللي صار..من حنطي الى احمر ومن ثم الى البنفسجي ونهايةً بالأزرق..جنها ألوان قوس قزح ؟؟.....هههههههههههههههههههههههه

--------


قامت من سرحانها على همسه من محمد

محمد : وصلنـا
نزلوا من السياره..محمد راح غرفته عشان يصلي العشا لانه تاخر عليها وساره راحت في الصاله الفوقانيه وقطت نفسها على الكرسي الطويل من بعد يوم طويل وشاق

ساره : آآآآآآآآآآآآآه..

سمعت صوت يقول لها :

ســـلامتج من الآآآآآآآآه يابعد عمـــري

تخرعت والتفتت بعيونها وشافت نايف اللي قعد عندها بدون ماتحس

ساره خذت المخده اللي كانت متسنده عليها وفلعتها على نايف : خرررررعتني ياحمااااار ..
نايف اللي حنانه المخفي بدا يظهر : ههههههههههههههههه (مسح يده على شعرها الاسود الداكن وبدى يلعب فيه ) لا تضربين اللي اكبر منج ....انا ماربيتج على هالشي ؟؟
ساره : آسفــــــه
بعد لحظات ساره سألت نايف سؤال كانت تفكر فيه من اول مارجعوا من لندن : وينك ماتبين..؟؟..مختفي في حجرتك ولا عند ربعك..كلش مانشووووفك ؟؟
نايف حك رقبته بتفكير : تدرين.. الصيف الحين..مافي شغل
ساره : اي صح الشغل مب موجود..بس اهلك موجوووووودين ..
نايف بتهرب : فديتكم والله ..ياختي انا صاير ماحب اجتمع بحد ..صاير احب الوحــده
ساره بغشمره : الوحده السعودي ولا الاماراتي ؟؟
نايف : ههههههههههههه..لا انا اقصد الوحده لمن تكونين بروحج بين اربع اطوف..تقعدين تفكرين في الدنيا بدون مااحد يشاركج بالتفكير او بالراي او حتى انج تستشيرين حد..
ساره اللي عاشت التجربه اللي قال عنها فيصل وكملت بس بتعمق : الوحده..تنتج من الحزن..والالم..والمعاناه..والعذاب..
نايف اللي سرح بعيد : والصبــــــر ..
ساره : وينك يالصبــر ؟؟؟

ساره اللي غمضت عينها لمهله وهي تمر في المراره..جربت الالم بأنواعه والحين تمر في الصبر..اه يــا أحـــزان قلبـــــي...الصبر مؤلم..بس لازم اصبر..دام حبيبي بعيد عني..لازم اصبــر ..

نايف اللي شاف ساره مغمضه على باله رقدت..لا يكوووووون خمدت

قط عليها المخده وساره فتحت عيونها ..كانها قامت من سرحانها العميق..

ابتسمت حق نايف اللي كان قاعد على يمينها وحطت المخده على يسارها..وقعدت تلعب في شعر نايف اللي زاد طوله ونظارته زادت : لا تضرب اللي اصغر منك..انت ماعلمتني على هالشي يا استـــاذي ؟؟
نايف ضحك وساره شاركته في الضحك : ههههههههههههههههههههههههههههههه

_-_-_-_-_

محمد اللي عقب ماصلى خذ له شور ع السريع لانه نعسان ومايبي يسوي شي غير انه يرقد..وهو طالع من الحمام خذ الفوطه اللي كانت متعلقه ع العلاقه ونشف ويهه عقب ماحسن اللحيه وخففها..يمكن هو مااهتم فيها في الآونه الاخيره بس هي معطته جاذبيه وجمال..حط الفوطه مكانها وراح صوب المنظره عشان يمشط شعره المبتل وقعد يفكر..هو اليوم جنه زودها شوي ؟؟.. لاااااااااا يامحمد لااا هذي ماكانت الخطه .الخطه كانت انك تلعوزها في البدايه ليما تجرها شوي شوي صوبك وتخليها تطيح في شباكك..بس صعب صعب ياناس نايف مااقدر عليه..شلون اخليها ماتفكر فيه..صح اني بلعب عليها والسالفه كلها لعب في لعب بس اخاف هي تصدق ؟؟...خصوصاً اليوم عقب ماعطيتها ويه زياده..والله اخاف تصدق..بس انا الغلطااااان شلون ابتسمت لها (وهو يتذكر عيونها العسليه)..وحطيت عيوني في عيونها وقلت اللي قلته..شلووون..بس معلي..بتشوفين يادانه شلون بخليج تدفعين ثمن كل كلمه مب محترمه قلتيها لي وبخليج تنسين نايف وبخليه..(وهو يقول بصوت مسموع ) ..ينسااااااااااااج

بعد مارقد محمد رقدت ساره ونايف بالمثل وبو محمد بعد..بو محمد صحته لازالت مثل ماهي وصار يحس بوعكه في بعض الاحيان بس مايقول حق احد..مايبي يحسس عياله اللي عاشوا 8 سنين بدون امهم انه من الممكن انه يفارقهم..اذا راح ابوهم من بيبقى لهم..؟؟

[bnt aldo7a]

-----

الصباح ..الساعه 11

قام فيصل وتريق وعلى طول خذ الورقه اللي امس حطاها على الكوميدينو وفيها مكان بيت ساره ورقم البيت..ركب سيارته والمكان اللي بيروح له طبعا..وبلا شك ...بيت ساره
كان لابس بنطلون جينز وتي شيرت احمر ومن الاكمام ازرق..وكاب اسود عشان يحمي عينه من الشمس القويه خصوصا في هالوقت لما تكون عموديه

المنطقه اللي فيها بيت ساره بعيده شوي عن منطقته وبجذي خذ ثلث ساعه ليما وصل حق النطقه ودور البيت وتاكد منه يوم شاف اسم (عبدالله خليفه ) مكتوب عند باب البيت ..ياهي فرحه واحساس جميل انتابه..فرحااااان من قلب انه لقى بيتها..عيل اذا شفتها شبتسوي يافيصل ؟؟

وقف السياره في مكان قريب عن البيت بحيث ان الخارج من البيت مايشوفه بس اهو يقدر يشوف البيت ..شغل الراديو وحط على محطه اذاعيه غنائيه وقعد يسمع اغاني الحب ومنها الشوق واللهفه لين ماحس ان مرت ساعه ..ساااااعه ومحد طلع من البيت ؟؟؟...يالله ننطر بعد كم من دقيقه..والله عشان اشوفج ياساره واريح قلبي بفرحة شوفتج اللي تمنيتها من وقت مر علي ببطء شديد والفراق كان يقتل كل ذرة صبر فيني للقياج

تصفح مجله كانت مرميه في السياره..وشكلها قديمه..المهم ..ثانيه يشوف المجله وثانيه يرفع عيونه ويراقب البيت اذا احد طلع ولا شي..لااااا هذي مب حااااله صار لي ساعه ونص ناطر عند البيت..يـــه

خلال تحرطمه مع نفسه طلعت سياره من بيت عبدالله اللي هو بومحمد..مرت السياره صوب سيارته وهو لبس نظارته الشمسيه وحط المجله قبال ويهه عشان محد يشك فيه ..قدر انه يعرف الشخص اللي في السياره..شاب بس مب نايف اللي شافه في لندن وهووو اكيد ..اخوهم الكبير محمـــد..فيصل عرف محمد يوم تحرا عن عيلة بو محمد وعرف عن عياله تقريبا كل شي..اسمائهم..اعمارهم..وين يشتغلون ...بس الهدف من هالشي انه يوصل حق ساره..وقصده شــريف

مر الوقت ومحد طلع من البيت ليما روح فيصل طفرت من الملل..حرك موتره ورجع البيت على امــل انه يرجع المغرب ويشوف ولــو طيف ساره اللي اعتاد على شوفته
----------

في بيت فيصل

ام فيصل اللي قدرت تتقن اللهجه القطريه مع انها بريطانيه : وين كنت فيه يافيصل ؟؟
فيصل وهو يشيل الكاب ويمرر اصابعه بين شعره ..من حر الصيف احترق : رحت ..(بتفكير في حجه) رحت ..عند رفيجي بغيت اعطيه... (ويفكر مره ثانيه ) ..ايــــه صح..بغيت اعطيه جواله نساه امس في سيارتي
ام فيصل : ع الاقل جان ناديتني عشان اتريق معاك واسولف معاك..ياوليدي انا امك ماشايفتك من 7 شهور ..خلني اتهنى بشوفتك
فيصل وابتسااامه عريضه لامه : شوفيني ..شحلاتي وســـيم فديتني وعيوني خضــر على امي الله يخليها لي
ام فيصل : هههههههههههه عساني ماانحرم من هالويه ..ها يمه ماتبي تاكل لك شي ؟؟
فيصل : ودي يمه اذوق من طباخج اللي صااااار من طبخ اوروبي الى طبخ خلييييجي
ام فيصل بنظره حق ولدها : وييييييه..تراه لين الحين اوروبي واذا تبي اسويلك باستا بسوي ؟؟
فيصل : ههههههههههههههه اموت على الباااااستااااا انا... سوي لي ياه وياريت لو تسوين مجبوس بعد يما
ام فيصل اللي قامت عشان تروح المطبخ : من عيوووووني

رغم عدد الخدم اللي في بيت بوفيصل..ام فيصل تحب يكون الاكل من يدها ومب من يد الخدم والله الخدم يكسرون الخاطر لاحقينها من مكان لي مكان..ماما دونت ووري انتي ريلاكس اهنا بيسوي كلشي نزيف ..ههههههههههههههههههه

اول ماراحت ام فيصل دش يوسف
يوسف وهو يتأكد ان امه في المطبخ ..عقب ماتاكد راح قعد عند فيصل المستغرب من حركته

يوسف : فصوووووووول ؟؟
فيصل : يس ؟؟؟
يوسف : شخبارك ...شعلومك ؟؟؟ ايفري ثينغ از اوكي ؟؟
فيصل : اي الحمدلله وانت شخبارك ؟؟؟
يوسف : طيب الحمدلله ..اقوووووول قاصوليتي ؟؟
فيصل المتعود انه يسمع دلع اسمه عند يوسف..فاصوليه..احلى اسم والله : نعم ؟؟؟ شتبي ؟؟؟؟ والله اني حاس ان وراك شي ؟؟
يوسف وهو يشوف وراه : وراي مافي شي ؟؟
فيصل : هيهيهيههي ياملغك..بتقول ولا اقووووم ؟؟
يوسف : فديت عمرك بقول بس لا تقوم..انزين....وين كنت توه ؟؟؟
فيصل : عند رفيجي ..ليش ؟؟
يوسف : اي واحد من ربعك ؟؟؟؟
فيصل المستغرب من التحقيق : مبارك !!!!
يوسف : جـــذااااااااااب
فيصل فتح عيونه بارتباك : انا جذاب ..؟؟ هه ليش اجذب ؟؟
يوسف : لا تقص علي..ادري انك ماكنت عنده انا اتصلت له ولما سالني عنك قلت له انك طالع
فيصل : انزين..عادي...عقب ماهو كلمك انا رحت عنده
يوسف : ليش الكذب ليشششش ؟؟؟ شمسوي ؟؟ هااااااااااا ؟؟ اعترف احسن لك
فيصل بلا مبالاه : مامسوي شي انا رحت عند بروك تبي تصدق صدق ماتبي (وهو ياشر له على الطوفه ) عندك اربع اطوف حولك اختار لك وحده وطق راسك فيهااااااا ( وقااااام عنه )

يوسف : مااااااااالت عليك يالجذاب والله لووووو شنو ماصدق انك كنت عنده لــــكــــن معليه ان ماعرفت السر اللي مخبيه مااكون جوزيــف ولد حمـــد

-------

المغرب..اتصلت دانه في ساره وقالت لها انها بتروح مع امها السوق واسالتها اذا تبي تروح معاهم
ساره وافقت لانها تمللت وطقت جبدها من قعدة البيت ونايف ومحمد مافيهم خير مايطلعونها وابوها تعبان مايقدر يطلعها

مرت دانه على ساره مع دريولهم ..طلعت ساره من البيت وفي طريقها للسياره شافت سياره واقفه في مكان قريب من البيت وشكل السياره غريب ولافت للانتباه مب يعني لافت من شكلها..كانت السياره لافته للانتباه لان اللي فيها كان يلفت النظر..متلثم بالغتره ومدعس روحه في الكرسي..ماعطت اهتمام مع انها خافت شوي وحست بشي بقلبها لكنها دخلت السياره

في السوق

دانه وهي تأشر على القميص : سرووووي شوفي هالقميص الابيض حق المدرسه شرايج فيه ؟؟
ساره اللي قلبها مب مرتاح ابد تحس بشي صاير وهي ماتدري..:........................
دانه وهي تدور مقاسها : باخذ مقاسج بعد عشان نطقم انا وانتي
ساره : .........................
دانه التفتت وشافت ساره سرحانه في الارض : هيييييييييه انتي
ساره : ها..شنو..شصاير ؟؟
دانه : ماصاير شي بس شرايج في اللي قلته ؟؟
ساره : شقلتي ؟؟
دانه : يــــه..كنت اكلم اليني انا ولا شسالفه ؟؟ يعني ماسمعتيني ؟؟
ساره بتوسل وخوف : دنوي واللي يعافيج قولي شقلتي والله ماسمعت
دانه وهي تقرب صوب ساره : شفيج ؟؟ ليش خايفه ؟؟
ساره : انااا خايفه ؟؟ من قال ؟؟ اصلا مافي شي..(بارتباااااك واضح ) عاادي
دانه وهي تحط عيونها في عيون ساره : سرووووي في شي صاير وانا مادري به ؟؟
ساره من الخوف اللي يعصر قلبها ماقدرت تكتم وهزت راسها بـ إي
دانه : شنو ؟؟
ساره : مادري والله..لما نطلع بقولج ..وينهي امج خل نروح لها قبل لا تشك
دانه هدت القميص وقالت بترجع له مره ثانيه دام مصممتها ساره مب على بعضها ماتقدر تختار شي تخاف مايليق عليها

طلعت جوالها واتصلت في امها وقالت لها امها انها في مطعم في الطابق الثاني
ودانه عرفته لان امها دوم تعزمها عليه


عقب ماتعشوا ام بدر لزمت على ساره انها تحلي وساره عقلها مب مرتاح ولا قلبها التعبان..تحس في عيون تراقبها

وصدق احساس ساره وطلعت في عيون تراقبها..والعيون هذي اللي كانت تراقبها من احدى الطاولات في المطعم على بعد كم من متر ..طلب من القرسون انه اييب له ورقه..ياب له ورقه وراح عنه وهو طلع قلمه اللي كان في ثوبه وبدا يتذكر شي قراه حق... صدى الحرمان..بعد ماخلص نادى القرسون وطلب منه انه يوصل الورقه حق البنت اللي كان يراقبها ووصاه انه مايقول لها الورقه من منو

وصَل القرسون الورقه حق ساره والله ستر ان ام بدر كانت رايحه الحمام ومب قاعده وياهم ..

فتحت الورقه اللي كانت مطويه وقرت بعيونها

تعالي بددي خوفي
ووحشة ليلي الظامي..
ودفي بارد كفوفي
يانبض الحب فـ أيامي
يا انتي آه لو تدرين..
بـ ان اهديت لك قلبي
وبعض اشعار مجنونه
و لا عدت اقدر اخبي
أنين الشوق وشجونه
تعالي هدئي احساسي
وفي حضن الغلا نامي
يابلسم كل الآمي
تعالي..
تعالي حلمي الحاظر
قبل تذبل شفاهي بوح
و بعيوني الهوى ساهر
و في قلبي الألم مجروح
تعالي..تعالي..

قرت اللي مكتوب اخر شي بصوت مسموع وهي مب مصدقه اسم الشخص اللي ارسل لها الورقه..هو نفسه اللي شافته هناك..اللي حست بطعم الحب يوم حبته..ويوم اشتاقت له..ويوم خافت عليه ..ويم غارت عليه..ويوم حنــت له..هو نفســه..حبيبها ..فيصل

طلعت منها هالكلمات بصوت اشبه بالهمس : تعــالي..تعالي
دانه جنها الاطرش في الزفه وماتدري ساره شقاعده تخرف : شنو تعالي ؟؟ وين بتروحين ؟؟
ساره طوت الورقه وعيونها تجول في المكان لين ماطاحت عليه..تلاقوا العيون..العيون الخضره والعيون البنيه..بكل شوق ببعضها..بكل فرحة اللقا والعوده من جديد..آآآه مااجمل هالشعور..يسري في الدم والعروق

دانه خذت الورقه بتقراها وساره ماحست فيها : عطيتي اجوف شمكتوب ؟؟(ويوم قرت وانصعقت )..شنووووووووو؟؟ من ذي ؟؟ هااااااا (هزت ساره )
ساره : هااا ؟؟
دانه : من فيصل ؟؟
ساره : بقولج بعدين (خذت الورقه من دانه..وشقتها )..قومي خل نروح حق امج مابي اتم هني
دانه : زين

وهم في طريقهم لام بدر ..قطت ساره الاوراق اللي كانت كلها في الاصل..ورقه وحده..بس ساره شقتهم وفرقتهم عن بعض وفكت شملهم ..هي ماودها انها تشق اي شي من صوب فيصل بس عشان كرامتها شقت الورقه وقطتها قدام عيونه..

-------

عقب ماطلعوا من السوق دانه راحت بيت عمها بومحمد مع ساره وقالت حق امها ان دانه تعبانه شوي وبتم معاها اليوم..ام بدر ماعارضت تدري ان ساره مالها حد ولا عندها حد يحس فيها او يداريها هي عايشه وسط اولاد مايعرفون يتعاملون مع حالتها..الحساسه..بالنسبه لبنت توفت امها من يوم هي صغيره..اكيد مابيعرفون

في غرفة ساره

ساره : تعالي اختاري لج بيجامه
دانه : عااااااد كلش سروي..تدرين اني اعرف كل بيجاماتج من كثر مابات بعد تعالي اختاري لج حق وشو ؟؟
ساره : ههههههههه شسوي يعني البسج اللي مايعجبج ؟
دانه : تعالي زين قعدي هني..والله..قالت مايعجبج قالت..قوليلي شسالفه يالله..ترى صبري نفذ
ساره قعدت عند دانه وشكت لها : في لندن..شفته هناك وكان الشي عادي..بس يوم حسيت انه اذا طالعني يقرا الحزن اللي بعيوني ..صرت احس بالامان اتجاه هالشخص ولو اني مااعرفه بس بمجرد احساسي يتصل باحساسه احس اني اعرفه من زمان وانه يقرا اللي بعيوني..انا ماأأكد لج اني حبيته..بس ..حسيت بالامان والحب والحنان وخصوصاً من تعامله معاي في بعض المواقف..

دانه : اممممممم..وين تحسين بهالاحساس ؟؟
ساره اشرت على قلبها : من هني
دانه بابتسامه : ياعمري ياسرووووي والله وحبيتي ؟؟
ساره تخرعت : شنو ؟؟ لا يبا زين ماحبيت ؟؟
دانه : ههههههههههههههههه من الصبح احس بالامان والحنان واخرتها ماتحبيييين ؟؟ يالعياااااره
ساره تضايقت لما تذكرت الحلم .:...احس ان انا وهو مابنجتمع في يوم
دانه : فااال الله ولا فالج انشاءالله مايصير الا الخير ..اقول سروووي
ساره : قولي ؟؟
دانه : احم احم..شلون شكله ؟؟
ساره :: ليش تسالين ؟؟
دانه : لا بس حبيت اعرف شكل الحنون واللي يحسسج بالاماااان ياعووومري
ساره قطت المخده على دانه : تتطنزين مع ويهج ؟
دانه : هههههههههههههه لا امدحه تصدقين عاد ؟؟ يالله بلا مصاخه وغيره وقوليلي شلون شكله
ساره وهي تتذكر ملامحه : اسمر..بس مب وايد..يعني قولي حنطي..اممم..عيونه خضرا..حلوه..شعره مثل لون جذع الشيره..على بني..غامج...وووو..طويل...بس بعد شقول ؟؟
دانه وهي اتغشمر وتحاول تقط جسمها على السرير جنها ذابت من وصفه : وااااااااي فديت عمره يهبل..امريكي هو ؟؟..احسه يشبه توووووم كروووووز فديت قلبه
ساره وهي تطق دانه طقه خفيفه : ولي زين..احلى من توم كروز بمليون مره واصلا هو مايقَرب صوب توم كروز..
دانه وهي تغمز بعيونها : لازم بعد..حبيب القلب..قلتي لي..انه حنون وتحسين لما تشوفينه بالامان هاااا ؟؟
ساره : هههههههههههههههههههههههههههههههههههه

-------

فيصل اللي رد البيت ودش غرفته على طول بدون مايسلم على امه اللي كانت في الصاله اول مادش ..ياهو احساس يعذب القلب..يشعره بالخوف..وحرقه في الجوف..اللي سوته ساره يوم شقت الورقه ماضايقه..لانه كان يدري بان اللي في قلبها غير عن اللي سوته..يدري مثل ماهو مشتاق هي مشتاقه..مثل ماهو تعبان هي تعبانه..مثل ماهو يبيها هي تبيه..بس الاحساس اللي ينتابه مايبشر..احساس غريب عمره ماذاقه..مايبي يخسر من في يوم وفت واخلصت وصدقت العهد ..مايبي يخسر توأم روحه..اللي كل مايحس بشي يوصل هالاحساس حق ساره وساره تحس فيه في نفس الثانيه..

-------

الساعه 2..في بيت بو محمد وفي الصاله والتلفزيون محطوط على فلم اكشن ولا احلى ولا اروع ولا اجمل

ساره وهي تاكل من البوب كورن مال نايف اللي دوم يسويه يوم يتابع فلم : انتي شوفي ويه البطله بس ..صج تلوع الجبد انا ابي اعرف هذا شعاجبه فيها ؟؟
دانه المتلحفه وراقده على الكرسي ومحولته من كرسي الى سرير : انا ادري..انتي شوفي شتلبس ؟؟..كلش مافي تناسق ولا الروج اللي تحطه عااااد
ساره : ههههههههههههه جنه مال الستينات
دانه وهي تتأمل ويه البطل : فديت عمره يهبل مايستاهلها
ساره بتحسف : اي والله طول وجمال وشخصيه وياخذ هالدبه ..والله مادري شلون تدش من الباب ؟؟
دانه : ههههههههههههههههههههههههههه


عقب نص ساعه ساره ودانه ناموا في الصاله وهم مب حاسين في اعمارهم..دانه حاطه راسها ع الكرسي ومايله بجسمها على جنب ودانه اللي كانت حاطه شيلتها احتياط عشان مايشو شعرها لاا نايف ولا محمد

وصل نايف البيت على الساعه 3 بيبدل ثوبه وبيتيدد عشان يصلي الفجر في المسيد..مر في الصاله وشاف التلفزيون مفتوح و وحده راقد..طفى التلفزيون واول مالتفت انصعق..شنو ؟؟..هو محوَل اليوم ولا ساره في منها اثنين ولا شسالفه ..من هذي ؟؟؟

قرب شوي شوي وهو يشوف ويه البنت وطلعت..داااااااااااانه..الله يهداكم وين نايمين ؟؟..معلي بيخليهم واول مايطلع من غرفته بيوعيهم حق الصلاه وعقب بيروح المسيد..

عقب دقايق وصل محمد..محمد بيصلي الفجر وعلى طول بيركض صوب السرير ..آآآآآآخ ياسريري ماقدرك الا لما اهدك..فديتك والله ..وعلى افكاره الغبيه من الدوخه اللي فيه والنوده ..مر في الصاله وحالته نفس حالت نايف يوم شاف البنتين ...يـــه..من ضيفتنا الحلوه هذي اللي ماخذه راحتها وناسيه انها مب في بيتها ؟؟..وبعد مافي سرير ؟؟..نايمين هني ؟؟؟...جنه مكانكم غلط ولا انا غلطان ؟؟

شاف البنت اللي من اول ماشاف شعرتين منها اللي كانوا ظاهرين من الشيله عرفها.. وهو يعرف لون شعرها لانه شافه مره..كستنائي ..عيل هذي دانه..وقف في مكانه وسط الصاله الفوقانيه وهو يتأمل ويه دانه بغرابه..ياحلوها والله لو تستعدل وتهد حركاتها لا اخليها تعرفني على اصلي..بس هي عنيده..وياخصلتها الكستنائيه..وبشرتها الحنطيه..ورموشها الكثيفه..وحمرة خدودها ..محــلاها


تحرك من مكانه وقوم ساره بهدوء وهمس في اذنها وقالها تقوم وتاخذ دانه ويروحون الحجره..ساره قامت وعيونها نص مفتوحه قومت دانه اللي نست انها في بيتهم..قومتها وسندتها عليها ودانه شلت اللحاف وغطت به نفسها وعيونها مسكرين ..وراحوا الغرفه ومحمد راح غرفته


نايف اللي طلع وهو لابس جلابيته المخططه ومستغرب..بسم الله ..انا لما ييت شفت شبح نايم ؟؟...وين راحوا ..؟؟بسم الله الرحمن الرحيم..باجر بسأل ساره وين كانت ..يحليلهم يمكن قاموا حق الصلاه ..؟؟؟...الله يبارك فيهم..احسن من هالبنتين عمري ماشفت ولا بشوف ..بنت عمي واغليها..اختي اموووووت انا فيها

طبعاً البنتين الحلوات ماقاموا عشان الصلاه..لا والله اصلا هم مايدرون اذا راحوا الحجره الصحيحه..يعني غرفة ساره..يمكن ضيعوا بعد..ومحمد الشيخ نسى يقولهم صلوا ..خل يلحق على نفسه ويصلي عشان يقول حق هالثنيتين قوموا صلوا..

[bnt aldo7a]

الجــــــزء الحــــادي عشــــــر

---------------------------------

11 الصــــبح..


ساره وهي تفتح عيونها شوي شوي..تحاول تتعرف على المكان اللي هي فيه: وين اناااا ؟؟
حكت راسها وقعدت ع السرير وسندت نفسها ع المخده..سندت جسمها التعبان من كثر النوم...وقلبها الفرحان اليوم..ويوم لفت راسها صوب اليساااار..شافت دانه..ايييييييه..الحين تذكرت..دنوي باتت عندي..بس(وهو تضيج عيونها)..مو جنه امس كنا نايمين في الصاله؟؟

من اللي يابنا هني؟؟...من..؟؟؟..(هزت راسها)..خل اقوم اصلي الصبح..والله اللي يايبني اشكككره صراحه لان كل شي ولا ان ظهري ينكسر من الرقاد ع الكرسي..هههههههههههههه

وهي تنادي على دانه وصوتها كله رقاد : دانه..داااانه...قومي يالله
دانه في نووووم عميق محد يقدر يقومها منه : احـــم..دوينه..فديتج قومي صلي الظهر.اقصصصد الصبح..؟؟
دانه وهي اتقلب على الصوب الثاني : همممممممممممم
ساره قامت من السرير وفلت شعرها ولمته مره ثانيه وهي تتثاوب : دااااانوووووووووه قووومي يالله عاااااااااد(وفتحت الستاااره)
دانه وهي ترص على عيونها من شدة النور : سكرييييييهاااااااااا
ساره : ههههههههههههههاااي مب مسكرتها(وراحت شلت عنها اللحاف)قووومي يالعنز يالله الحين العصر !!
دانه : انجلعي زين (وردت اللحاف)
ساره : فديييييتج دنوي قومي حبيبتي يالله عاد ترى والله اشوتج ؟؟(وشلت اللحاف مره ثانيه )
دانه اللي خذت المخده اللي كانت نايمه عليها ساره وفلعتها على ساره ودعت عليها :اللـــــه يــــاخذج قولي آآآميييييين


وسمعوا طرقات على الباب


ساره راحت فتحت الباب فتحه بسيطه وطلعت راسها تشوف من الطارق

نايف بخجل وابتسامه الصباح المشرق: صباااح الخيييير
ساره : صباااااح النوووور نيوفي ؟؟
نايف : ابوي يقولكم نزلوا تحت تريقوا معانا..انا ومحمد وابوي..ناطرينكم اوكي ؟؟
ساره : ان شاء الله .(بهمس)...بس هالعنز شيقومها ؟؟
نايف بابتسامه ولا الهمس يطوفه ماشاء الله : قوليلها نايف يقولج نزلي تحت وبتقوووم..بيليف مي ..
ساره وهي تحوس ببوزها : جيه يعني ؟؟..بجرب
قبل لا تسكر الباب : اقول سااره !!
ساره : هلا ..؟؟
نايف بتردد : انتوا....امس....انتوا....كنتوا نايمين...وين...؟؟...يعني قصدي....في الصاله ولا هني...؟؟
ساره بابتسامه : في الصاله بس مادري من قومنا ويابنا هني
نايف وهو يزفر براحه : اففففففففف..ريحتيني..على بالي شفت ينانوه في الصاله ولا اشباح
ساره باندهاش : يعني مو انت اللي قومتنا ؟؟
نايف : لاااا..يمكن....محمد..
ساره وهي تفرك عيونها : يمكن..؟؟...انزين عيل اخليك
نايف : هههههههههههههه..آسف طولت عليج
ساره بضحكه : حيااااااك الله كل يوووووم تعاااااال


وسكرت الباب عقب ماراح عنها نايف ونزل ..وراحت صوب دانه اللي نامت مررره اخرى

ساره وهي واقفه على راس دانه : دنوووووووووي؟؟
دانه : .........................
ساره : يالعنز...اخوي نايف يبيج قومي بسرعه<<جنها حرفت الكلام ؟؟
دانه انقزت : هااااا....؟؟.... وين ..اي صوب ؟؟
ساره وهي تضيج بعيونها : جذي عيل ؟؟ يوم اقولج نايف تقومين ؟
دانه وهي تنذر انذار يولع شرار احمر في عيونها : يعني تجذبين علي ؟؟
ساره ماصدقت تقوم دانه : لااا وييييه الله يسامحج بس نايف توه قالي ننزل تحت
دانه شلت اللحاف عنها وقامت بهمه ونشاط : افاااااا عليج..دقايق بس اغسل ويهي واصلي واتعدل وانزل
ساره : زين..لا ترقدين في الحمام اوكيه ؟؟
دانه : ان شاء الله دقيقتيييييين بس


--------


فيصل قعد من النوم من نص ساعه وخذ له شور ع السريع عشان يتنشط حق اللي بيسويه اليوم..المفاجآت مابتخلص الا لما تصير له..وله وحده..

وهو ينشف شعره دش عليه ابوه : ها يبا شخبارك ..؟؟
فيصل وهو يبوس راس ابوه :طيب الله يسلمك انت شلونك...؟؟
بو فيصل :بخيو وعافيه
فيصل :متى السفر ؟؟
بو فيصل :عقب باجر ان شاء الله..مابتي معانا ؟؟
هد المشط اول ماابوه ساله هالسؤال..: لا مالي نفس اسافر توني راد من لندن
بو فيصل:على راحتك..دامك بتم هني امسك الشركه انا واثق فيك واعرف قدراتك
فيصل بابتسامه مريحه : ان شاء الله يبا
بوفيصل :ماشاءالله عليك مسكت لي الشركه اللي في بريطانيا..اكيد بتمسك لي هذي والموظفين بيساعدونك مابيقصرون معاك..
فيصل: ان شاء الله اكون عند حسن ظنك وترد وتلقى كل شي يمشي تمام
بو فيصل : ان شاء الله..يالله تعال معاي خل انتريق امك ذبحتني بحشرتها


-----


عقب ماتعدلو ومشطوا هالشعر اللي من صباح الله كاش..ساره قامت الصبح بنشاط..اليوم هي فرحانه..فرحانه من قلب..يمكن امس نامت وقلبها كان خايف من احساسها اللي ماتبي تصدقه..بس اليوم قامت وبعيونه الفرح اللي هي مو متعوده عليه..والامل اللي يزورها احياناً وليس دائماً ..اليوم بيصير لها شي يسعدها ويغير حياتها..حاسه بهالشي..وكانت لابسه جلابيه مطرزه وبسيطه وناعمه ورافعه شعرها كله على فوق بطريقة ذيل الحصان

دانه اللي قامت على صوت ساره بس بأمر من نايف حبيب قلبها..شلون ماتقوم..؟؟..لازم تقوم وتلبي..بس بتقعد مع محمد في نفس الطاوله..؟؟لااااااااااااا..ماقدر..شلون بحط عيني في عينه..؟؟..اففففففففف..امري لله والله بس عشان نايف اللي متعب عمره ومناديني مب انت يالثور همك بس تضايقني ويا حركتك السخيفه اللي سويتها امس..(وهي تقلده)ان شاءالله مرت عمي بترس لج البيت كله عيال..كانت لابسه جلابيه وفوقها عبايه عشان تاخذ راحتها اكثر


وهم على طاولة الطعام...بو محمد في مقدمة الطاوله..ساره ودانه على يمين بو محمد..ومحمد ونايف على يسار بو محمد..

محمد : يباااااا
بو محمد : عيوني
محمد : تسلم لي عيونك..يبا انا اليوم بطوله بكون في(وعلا على صوته)بيت عمي بو بدر
بو محمد : تشاورني؟؟..اصلا انت متعود من يومك مطيح هناك..
محمد تفشل الحين هو متعمد يقول هالكلام وابوه يفشله : لا يبا مب قصدي..بس بغيت اقولك يعني لان مرت عمي فديتها والله مشتاقه لي وقلت اروح لهم اليوم
ساره اشتركت في الجريمه مع ابوها على محمد : بس مرت عمي اللي مشتاقه لك ؟؟ (وهي تغمز له )
نايف اللي انضم لهم : ايــــه(شرب من الجاي شوي ورد الكوب ع الطاوله)..مادري شفيه هالايام..مايندرى مشتاق حق من ولا من..دووووومه سرحان وحتى ربعه مايدرون عنه..


محمد بيغص الحييييين..مالت عليكم ياساروه ونيوف الله يفشلكم وياخذكم مالت عليييييكم

كل هذا صار جدام عيون دانه المحمره من الخجل..لسبب ما او لآخر و مارفعت عينها..تاكل من الاكل وتشرب من العصير واذا بترفع عيونها على عمها..لا غيــــر

ساره : اي والله وانت صاج يانايف..حتى بدر رفيجه الروح بالروح صار مايشوفه وايد

عاد الحين محمد رفع عيونه وحطها في عين ساره اللي كانت مستانسه ومتشققه..واااااااااي فشلته
لـــــكــــــن..مافرحت وايد لان محمد ضرب ريله في ريل ساره..

ساره حركت شفايفها بصوت غير مسموع..ووجهة هالحروف المخفيه حق محمد..: حمـــار واحد
محمد اللي ابتسم وحرك شفاته وقال لها بصوت غير مسموع : بقررره وحده

نايف اللي ضرب كوعه في يد محمد عشان يسكت هو وساره..فشلوه جدام دانه..صج يهال..شهالحركات فشلتوني جدام البنت شتبون تقول عنكم..بزارين ؟؟

وعشان يغير الموضوع : ساره
ساره : هممممممممم
نايف : ماتبون اوديكم المطعم اليوم ولا السينما ؟؟
دانه بصوت واطي : ياليت
ساره : فديتك والله..اذا انت فاضي ودنا..يزاك الله خير بتفرحنا

محمد اللي شاف نايف بنظره..هالخاين..يبي يطلع ويا دانه..يازعم ساره تبون اطلعكم اليوم..والله ثم والله ثم والله لو ماكنت قايل اني اليوم بروح بيت عمي جان وريتك صنع الله(وهو يشيح براسه عن الاكل ويقول في قلبه)..خاااااااين

نايف المسكين مايقصد شي بس قال يطلعهم ويغيرون جو خصوصا انه متعود يطلع ساره في طلعات مثل هذي..لكـــن..ان بعض الظن اثم يامحمد

نايف : خلاص عيل..ع الساعه 6 جهزوا نفسكم

دانه اللي ابتسمت ابتسامة فرح..ومحمد اللي ابتسم ابتسامة قهر لكن في عيونه ندم شديد مايدري شنو مصدره..وساره اللي ابتسمت وهالفرحه زادت على فرحة شعورها

-------






محمد ماصبر ونفذ الكلام اللي قاله..بيروح بيت عمه يعني بيروح..بدل ملابسه ولبس تي شيرت ابيض وبنطلون اسود رياضي وكاب اسود.. وخذ سويج السياره ونزل

نايف اللي كان يقرا الجريده حس باحد نازل ولما نزل الجريده والقى نظره..شاف محمد : وين بتروح ؟؟
محمد بدون مايلتفت وخلال مشيه : بيت عمي
نايف : زين تـ....

طلع محمد وماخلاه يكمل كلامه

لحقه نايف برا البيت وركب السياره قبل لا يحركها محمد

محمد : نعم ؟؟
نايف : بايي معاك
محمد باطنازه : ليش ..مابتطلع البنات اليوم ؟؟
نايف : باقي على الطلعه
محمد حرك السياره وطلعها من القاراج : زين..حياااك..
نايف : الله يحيييك


بعد لحظات..نايف : شغل شي
محمد شغل الراديو وحط على الاف ام ....بعد لحظــات مرت..ونايف يبي يكلم محمد في سالفه بس يخاف ان محمد يعصب ويثور عليه..بس بيسأله مايصير اخوه يتصرف هالتصرفات جنه مينون وماعنده حد يقوله شقاعد تسوي..انا اعرف له وبساله واذا ماقالي انا بقوله..مشكلتي..اني اعرف احساس الانسان بدون مايتكلم بس نظره من عيونه ونبره من صوته تشيرني للي في باله

نايف وطى على صوت الراديو : اقول محمد
محمد : هممممم
نايف : ممكن اعرف..(يبلع ريجه)..انت...شفيك ؟؟
محمد لبس نظارته الشمسيه..: مافيني الا الخير
نايف..يعني على بالك بتلبس النظاره بتخش نظراتك عني..وين بتروح مني : اكيد..؟؟..عيل شفيك على بنت عمي ؟؟
محمد وقلبه يدق..خوفاً من سؤال نايف..لهالدرجه حركاته مراقبه من قبل الجميع..لا واولهم نايف..: مـــن..؟؟ دانــه ؟؟
نايف : اي دانه..شفيك عليها
محمد : ولا شي ..عادي..
نايف : وحركاتك الغبيه اللي مالها معنى ؟؟
محمد اللي توه يفهم السالفه..الحبيب بدا يغار ويسال عن حبيبته : نعم .؟؟..حركاتي غبيه ..؟؟؟(بجرأه).. شتبي انت ؟؟
نايف :.......مابي شي.....سلامتك
محمد : لا قول عادي ترى..شي في خاطرك قوله..؟؟..لا تخاف مابوقف في طريقك ..!!
نايف اللي مايدري شسالفه..لايكون على باله اني احب دانه..؟؟... : شتخرف انت ؟؟
محمد اللي شوي ويفقد السيطره على السكان : انا اخرف..؟؟؟لاااااااااااا حطوني في مستشفى الميانين..ايـــه..قمت اخرررف واقول كلام مافيه من الصحه شــــي
نايف بيسكر الموضوع : كلامك فيه الصحه والعـــافيه بعد..زين ليش معصب..انا سالت سؤال واحد رديت علي بعشر اجوبه..؟؟؟

وصلوا بيت بو بدر...نايف ومحمد نزلوا وقبل لا يطقون الجرس قال محمد حق نايف : خل اسئلتك حق نفسك..لانها وبكل صراحه تغثني...


نايف : اممممم..ان شاء الله..بس بقولك..الشي اللي يزيد عن حده...(وهو يقرب لاذن محمد)..ينقلـــب ضده

...مايدري الاسئله تغثه ولا تحرك شعور في قلبه ولا تخليه يشك في عمره..هو شيبي من دانه..صح كلام نايف..؟؟...بس انا بغيت العوزها شوي..يعني حركات وبس..ياخوفي انها تنقلب ضدي


في المجــلس

محمد : شفيه هذا..(وهو يأشر على بدر )
نايف..:..مادري..لا يكووووووون بس
محمد : شنوووو ..؟؟
نايف بغمزه حق محمد : انتقلت العدوااااا ..خل اوخر عنكم والله اخاف اين مثلكم ..
محمد طق نايف على راسه : جب زين..تبي شعرك هالطويل اللي واصل لين جتوفك ينقص..تعااااااال عندي والله لا اخليه مثل ريش الدياي
نايف : ههههههههههههههههههههههه....(يكلم بدر )..اقوووول..يالحبيب...يالطيب
بدر اللي قاعد حذاهم بس جنه قاعد في زاويه بعيده في العالم مايسمع فيها الا..دقات قلبه...:.......................
محمد : فينا برص ولا مرض لاسمح الله ..؟؟؟..بدوووووووووووور
بدر رفع عيونه من الارض..حفر فيها بعيونه من كثر ماسرح..:: نعم ؟؟؟
نايف : شفيك ياحبيبي ..؟؟
محمد : ياعمري شفيهم عيونك تعبانين ؟؟...حولهم سوااااادٌ دااكن
بدر وهو يصب حق محمد ونايف جاي ..: ارهاق ...
محمد وهو يفتح عيونه على وسعهم : اهااااااااااا..ارهاق قلت لي ..؟؟
بدر وهو يمد بيالة الجاي حق محمد : ايـــه
محمد : ومن شنو ؟؟؟
بدر وهو يحرك رقبته بتمارين رياضيه : مانمت عدل هالايام
نايف اللي مشى ورا محمد وفتح عيونه الحلوه بخوف. ..: من شنووو ؟؟
محمد : هههههههههههههههههههههههه
بدر بابتسامه : انتوا خايفين علي ولا شسالفتكم ؟؟
محمد : خايفين عليك اكيد..تحتاج دكتور بيطري ؟؟
نايف : ههههههههههههههههههههههههه
بدر اللي ماله نفس حق الغشمره : بيطري في عينك يالثور
محمد كاتم الضحكه : محتاج بروفيسوووور في الحب ؟؟؟
نايف وهو يأشر على محمد : بروفسور في الحب هذا هو..ناااامبر واااان صرااااحه
بدر : تصدق عاد..حتى حمود متغير هالايام !!...
نايف : اي والله

وانقلبت الآآآآيه على محمد

[bnt aldo7a]

------

العصـــر..الساعه...

4:30

دانه اتصلت البيت عشان اييبون لها ملابس..ماتقدر اتم في ملابسها مالت امس..وطبعا ماتقدر اتم بدون عطرها ومكياجها وكريماتها المتعدده الاشكال والاحجام

دانه : فجوووووور فديتج ابيج تفتحين كبتي وتطلعين لي لبسه حلوه على ذوقج ؟

فجر تستفسر : حق ؟؟؟

دانه : لاني بطلع اليوم مع سروي ..

فجر : وييييه بروحكم ؟؟؟

دانه : في عينج يالعنز ....مع اخوها

فجر : اهااااا..انزين...بس ملابسج ؟؟

دانه : فديتج وعطري ذاك اللي احبه تعرفينه صح..؟؟...وبتلقين على الطاوله شنطه صغيره فيها مكياجي

فجر : اووووكي..بعطيهم حق عبدالحميد(دريولهم) وبييبهم بيت عمي

دانه :..مشكوووووره... يالله ..بااااي

فجر : لاااا دنوووووي لحظه

دانه : شنو ؟؟

فجر : ترى رفيجتج عاشه اتصلت وانا قلت لها انج في بيت عمي ؟؟

دانه : صج ؟؟...انزين انا باتصل لها ....بااي

ساره اللي كانت اتابع برنامج ثقافي : من اللي بتتصلين لها ؟؟

دانه وهي تحط ريل على ريل : هذي عوش متصله فيني وفجور قالت لها اني هني

ساره : اتصلي لهاااا

دانه..رفعت سماعة التلفون وطقت رقم بيت عاشه...وانتظرت لمدة خمس ثواني..وانشال التلفون

راشد : الوووووو

دانه : هلا وغلا شخبااااارك بو سنيده ؟؟

راشد : طيب الله يسلمج...من معاي ؟؟؟

دانه : معاك الدانه...تعال ليش تسال..تبي تتعرف ؟؟

راشد اللي تعب عمره وشال التلفون وهد البلاي ستيشن : من زينج عاد قولي ليش متصله..بسرعه ابي اعيد القيم

دانه : يحليلك قاعد تلعب خربت عليك..هههههههههههههههه..ناد عوش بسررررعه

راشد : لحظـــه

انطرت ثانينتين وردت عليها عاشه : هلااا دنووووي

دانه : اهلين عووووش شخبارج ؟؟

عاشه بتنهيده : بخير....وانتي شلونج ؟؟

دانه وهي تطالع ساره بنظرات : تمام الحمدلله..يقولون متصله فيني ؟؟

عاشه : اي..بغيت اسووولف شوي..لاني...متضايقه وابي افرفش

دانه : فرفشي يالغلا كلي اذان صاغيه

عاشه : امممممم..شريتوا شي حق المدرسه ؟؟

دانه : لا والله بس...انتي شفيج...؟؟

عاشه : انااا..؟؟ مافيني شي

دانه : متغيــــره واااايد..سمعي صوتج متغير...قبل كنتي تشاركينا في الغشمره والضحك بس الحين ......(خذت ساره السماعه وماخلتها تكمل)

ساره : هلا والله

عاشه بابتسامه : هلااا فيج

ساره : علوووومج ؟؟

عاشه : طيبه

ساره : هيه انتي...صج يقولون انج متغيره ؟؟

عاشه بخوف : من قال ؟؟

ساره باستهبال : الاخبار في سي ان ان والجزيره

عاشه ضحكت شوي ووسعت صدرها :..هههههههههههههههههه..والله مافيني شي

ساره : خراطه ؟؟....(توطي على صوتها )..عووووش فديتج ترى والله ماصار شي..عادي ترى

دانه وهي تكلم نفسها : اي والله....انا صادني مثل الموقف اللي صادج ماسويت شي

عاشه : بس..متضااااايقه

ساره : متضايقه..؟؟ اكيد....؟

عاشه : اي...احس بضيق وخنقه ورعصه وكل انواع ضيق التنفس

ساره : ههههههههههههههههه..اخاف الا تحسين بانواع الحب ؟؟؟..يعني الشوق والوله ؟؟

عاشه : ولي زين...قلبتي الضيق وسويتيه حب ....انتوا مب ويه واحد اييكم ويقولكم واسوني...(سمعت امها تناديها)..سروووي..امي تبيني..بروح لها وسلمي على دنووووي وااااااااايد

ساره : اي لازم اخت الغـــــالي

عاشه عصبت وانحرجت : انتوا فاهمين غلط !!!!!

ساره : ههههههههههههههه..اتغشمر والله عوش لا تزعلين

عاشه : امي ذبحتني..باااااااااااااي وسلمي على دنوي

ساره : يبلغ..مع السلامه

عاشه : الله يسلمج

سكرت التلفون ومسكت الرموت وقعدت تغير في القنوات

دانه وهي تختار قناه..فري..فري..فري...فرري..

ساره : دنوي تعبت قري على قنااااه

دانه : قلت لج فري..بعد فري..فررررري

ساااااره : ياااااااااه اذا مافي شي شله تيننيني ..؟؟؟

دانه : في شي بس خليني ادور ..عطيني الريموت

ساره بعنااادها الطبيعي : مب معطتج

دانه : قلت لج عطيييني ولا بتندميين

ساره : شبتسوييين يعني ؟؟؟

دانه وهي تقوم من مكانها : بتشوووفين ياااسااااره

ساره قامت من مكانها وشردت..طلعت من البيت بخطى سريعه في محاوله للهروب من دانه الشرسه اللي تبي تاخذ الريموت من بين يدها..لـــــكـــــــن..مابتقدر

ساره كانت تتجه لمكان ورا البيت..ولما وصلت لها دااانه

دانه وهي تلهث : عطيني يااااه

ساره : لااااااااااا

دانه : عطيييييييييني والله بصيح

ساره : على شرررط ؟؟

دانه : آآمري

ساره وهي تأشر على المكان اللي هي واقفه قدامه..: ارسمج ؟؟

دانه : ترسميني..في هالخرابه..لا يبا مب داشه

ساره : دنوي والله مب خرابه هذا موديل الاربعينات ..

دانه وهي تتخصر : يعني ماااال اوووووووول

ساره وهي تصحح : لاااا...يعني كلاسيكي

دانه نست سالفة الريموت : زين.. رسميني ادري انج بتطلعيني سباله بس خل نجرب شورانا

ساره دشت المرسم..كان مغبر بعض الشي..لانها من مده ماداخله فيه..ولوحها منهده في كل مكان..ياااااربي..شهالغبرررره..شافت الاستاند والاوراق اللي عليه باهته..مثل قلبها تماماً ..تعبان ومحتاج احد يعطيه الحب والحنان

دانه كانت تجول في المرسم..المرسم كبير ومخصص حق عدة اشيا..مكان حق الرسومات بالفحم..ومكان حق الرسومات بقلم الرصاص..ومكان خاص حق التلوين..وساره من عشاق الرسم..لذااا..عندها مكان بعد خاص حق اللوح الكبيره..اللي حجمها يكون قد الغرفه..وعشان هالشي..صقف المرسم عاااالي..يعني جنه الواحد صج داش مرسم ومب اي مرسم..مرسم الفنانه ساااره

ساره : داااانه

دانه وهي تسمع صدى صوت ساره : هاااا

ساره : تعالي

دانه : انتي اي صوب ..والله المكان يضيع

ساره : صوب الرسم بالرصاص..تعاااالي بسرررعه

دانه راحت لها وشافت ساره مجهزه الاستاند ولابسه الروب(المخصص للرسم) عشان ماتوصخ نفسها..وعدة الرسم والتلوين بجانبها

ساره وهي منشغله في العده : دنوووي فديتج..روحي هناك(تأشر لها على كبت)..فتحيه بتلقين اوراق يديده..ييبيها

دانه : اوكي..

ساره فتحت الكبت الخاص فيها واللي فيه اشيا تساعد الشخص اللي بينرسم..مثل شريطه حق الشعر..نظاره..قبعه..ورود صناعيه..ومن هالقبيل..

ساره عطت شريطه حق الشعر حق دانه ولفت بها شعرها عقب مافلته وطلعت جنااان. خصوصاً ان لون الشريطه مناسب للون الورده اللي بتمسكها دانه..

ساره مسكت القلم وخلت دانه تقعد في مكان مناسب حق المنظر اللي بيكون خلفها

عـــقب نــص ســـاعه

دانه وهي تحرك رقبتها : سروي..رقبتي تشللت متى بتخلصين ..؟؟

ساره : ششششششش..لا اتحركين...لو سمحتي....

ماهي الا خمس دقايق وساره خلصت..اللمسات الاخيره..

ساره وهي تلف الاستاند لجهة دانه : احـــم..شرايج ؟؟؟

دانه عقب ماشافت الرسمه..: لالالالا..من هذي ؟؟؟

ساره باحباط من ردة فعل دانه: شنو ..؟؟؟ مب حلوه ؟؟؟؟

دانه وعيونها على اللوحه الفنيه : الاااا اتينن..؟؟ انتي متاكده انج راسمتني ...؟؟

ساره وهي تهز راسها بالايجاب : اهاااااااااا

دانه بفرح وابتسامه شكر : واااااااااااااي فديتج يعلني مانحرم منج ولا من ابداعج..

ساره : عاااااااد قولي شرايج فيها ؟؟

دانه : والله الصــراحه..يعجز لساني عن التعبير..نص الويه طالع روعه..فديتج..انتي ليش ظالمه عمرج.؟؟ ليش مانشهرتي..؟؟؟

ساره : ههههههههههههههههههههههه

اللوحه كانت عباره عن..نص ويه دانه ..والنص الثاني كان مظلل بالاسود..لان مكان دانه اللي كانت قاعده فيه احذا الدريشه..يعني نص ويها بيكون في الشمس والنص الثاني في الظل...وكانت الخلفيه ملونه بالالوان الحاره بانواعها وتدرجاتها والشمس كانت على وشك الغروب...والورده الحمره كانت مبينه كامله..نصها صوب النور قريب من ويه دانه والنص الثاني في الظل..

حركت يدها صوب الرسمه وبغت تمرر اصابعها عليها بس ساره ماخلتها

صرخت بتحذير : لاااااااااا..مانشفت الرسمه

دانه : آي كانت بيليف..اوووووه ماي قوووود

ساره : ههههههههههههههه لا يغمى عليج بس(وهي تفصخ الروب وتحطه على العلاقه)..اذا تبينها خذيها

دانه : صج ..؟؟

ساره : صجين..بس احطها لج في برواز من اللي عندي..امممممممممممم..برواز ذهبي بيكون اوكي ..؟؟

دانه : اوكي..عاد اقولج..لاتنسييين توقيعج

ساره : ههههههههههههههههه..ان شاءالله

حطت الرسمه في برواز ذهبي..ومانست توقيعها اللي كان باسمها...وعطت دانه وهي فرحانه من قلب..الثنتين كانوا فرحانين ومستانسين وودهم لو يناقزون ويطيرون..من قدهم...دانه واليوم بتطلع مع حبيبها بدعوه منه..بالاضافه الى هاللوحه اللى مابتنساها طول عمرها وبتحطها في مكان خاص في البيت اذا ماكان في البيت فــهو في قلبـــها محفوظ..

وساره اللي اليوم من الصبح اجتاحها شعور غريب..محسسها بالفرحه والابتسامه..وتدعي الله انها تدوم وماترحل..تمللت من الدموع وغثاها..وودها بالفرح..بالاضافه للي سوته اليوم..صح انها متعوده ترسم بس اهي اليوم ارسمت بنت عمها وحبيبة قلبها وهالشي فرحها وازاح هم كبير كان على قلبها..

يتـــــــــــــــــــــــــــبع

----------

[bnt aldo7a]

الساعه ...5:30
في غرفة فيصل


بيطلع اليوم..وطبعا بيتوجه لمهمته..مراقبة بيت ساره...


وهو يعدل غترته قدام المنظره..سرح وفكر...اهي امس ماعطته فرصه...شلون تعطيني فرصه وانا معطيها ورقه وكاتب فيها كلام..بالله..؟؟..اكيد مابتعطيني ويه..بس اليوم ان شاء الله باذن بسوي اللي في راسي وان شاء الله ياربي اني اتوفق وارد البيت مستانس وشاق الحلج من الوناسه ..ياربي مابسوي شي غلط..ابيهاااا...وهي تبيني..بنهي هالصراع اللي بين قلبي وعقلي بــ......زواجي منها..بس ان شاء الله اقدر اكلمها..لان قلبي تعب من كثر مايناديها وعقلي تعب من التفكير المستمر فيها وهي بعيده عني..


طلع من البيت وراح عند بيت ساره..نطر ربع ساعه محد طلع من البيت..وسمع صوت الاذان يتخلل باذنه ويخترق قلبه ويناديه ويقوله تعال صل لربك وادعي انه يوفقك اليوم ويسهل عليك في الشي اللي تبي تسويه

نزل من السياره وراح المسيد مشي..صح ان عنده سيارته بس المشي فيه حسنات اكثر وهو محتاج للحسنات


----


في هالوقت خلصوا ساره ودانه من صلاة المغرب..ماعطلوا اكثر..قاموا لبسوا وتعدلو على خفيف..ساره حطت شدو وردي فاتح وكحل داخل العين...ودانه حطت كحل داخل عينها وخط دقيق فوق عينها..يدرون اذا الطلعه مع نايف يعني مافي تعدل ولا تكشخ ..لا يردكم البيت ترى..


وهم في الصاله التحتيه في انتظار نايف اللي لين الحين مانزل من غرفته ..: دنوووووي ..؟؟
دانه : هلا
ساره بخوف وفرح : ياختي مادري شفيني اليوم
دانه : شفيج..؟؟
ساره : احس اني بشوفه مره ثانيه
دانه : معلي لا تعطينه ويه اذا شفتيه..عاد انتي بتشوفينه بس يعني من بعيد وانا المسكينه اللي قلبي يدق من اول ماقال بطلعكم اليوم..((بتنهييييده))..آآآآآآآه....لحقي علي سروي بمووووووووت
ساره : هههههههههههههههه اسم الله عليج
دانه : والله سروي الله يعيني والله اخاف يغمى علي بتم معاه اكثر من ساعتيييين ..؟؟ (بغير تصديق)..تصدقين هالشي..؟؟...انا ماصدق...وبدون حنة ....(سكتت وماكملت والابتسامه اختفت)
ساره : بدون حنة ؟؟
دانه ابلعت ريجها : بدون حنة اخوج ..مــ..محمد
ساره : مسكين هالاخو والله كاسر خاطري ...


توجهت انظارهم للدري..لان نايف نزل وهو بكامل وسامته...الغتره الحمره حاطها على طريقة الترمبه..ومحلق اللحيه..مخففها من الذقن ومخليها ظاهره على طريقة السكسوكه..والساعه السوده المحاطه بفصين الماس والكبك بعد الماس اهداه له ابوه يوم من الايام..

دانه وهي مسمره نظراتها عليه..وبصوت واطي :..وووو......اااا.....ااااييييي.....
ساره ضربت كوعها في جتف دانه وكلمت نايف :هلا بملك جمال العالم.. وينك الله يهداك نقعتنااا...خسناااا يااخخي

نايف وصل لهم في الصاله..:...فديتج والله مب متاخر ولا شي..حتى شوفي(وهو يطالع الساعه اللي في يده)..6 بالضبط
دانه في قلبها...فديت اللي مايتاخر على مواعيده..ياقلبي يانااايف
ساره : هههههههههههههه..من الوناسه تجهزنا بسرعه ونطرناك وتعدلنا وتكشخنا..وآخرتهاااااااااا..تطلع متكشخ اكثر منا..؟؟لالا...كيف هذا ..؟؟...ولماذا هكذا...؟؟
نايف : لانه هكذااا..


ضحك لها نايف واشر لها ولدانه اللي كانت سرحانه فيه انهم يقومون ويلحقونه على السياره


-----


فيصل اللي اول مارد من المسيد قعد في السياره وعيونه مركزه على البيت..مستحيل مايصير اللي يبيه اليوم..مستحيل

شاف سياره طالعه من البيت وماقدر انه يطالع من اللي فيها..نزل راسه ومرت السياره والحمدلله نايف مالتفت لسياره فيصل ولا حس ان حد موجود فيها..اما فيصل اللي قدر انه يطالع من في السياره..وشاف اللي كانت قاعده قدام..وعلى طول..حرك السياره ورا سيارة نايف


-----



في السينما..اختاروا لهم فلم وشروا التذاكر..ودشوا الصاله اللي بيكون فيها الفلم...قعد نايف وخلى ساره تقعد عنده ودانه عند ساره عشان تاخذ راحتها...

بعــــد مرور ساعه الا ربع من ابتداء الفلم

ساره وهي تكلم دانه : دنووووي..انا يوعانه بروح اشتري لي شي ..!!
دانه : زين روحي..
ساره بضيق : وياويهج بتخليني اروح بروحي ؟؟
دانه وهي مندمجه مع الفلم : محد بياكلج ..روحي بسرعه وردي..ووو..ييبيلي معاج جالكسي كراميل
ساره : زين...استأذنت من نايف ونايف خلاها تروح

طلبت بوب كورن..ولما كانت تتنتظر لين مايخلص..ماحست الا بحد يناديها بهمس

............:...ساااره

التفتت وانصعقت..:..................

شلون تلقاااه مره ثانيه..؟؟.....وكان شي كان مفقود منها ولقته ...

فيصل وهو يأشر لها انها تروح صوبه
كانت في لحظه استغراب واندهاش..وخوف......صدق احساسها...كانت فرحانه بس الحين ميته من الخوف..شعور متناقض

فيصل : تعاااالي شوي

ساره هزت راسها بالنفي

فيصل وهو ياشر بيده بعلامة رجاااا انها تروح صوبه

ساره قالت في قلبها..بروح واشوف شيبي اخاف يطلع نايف ويشوفه ياشر لي..

راحت وراه وماكانت تدري باللي يبي يقوله..بس كانت تقريبا..واثقه انه مابيأذيها


مشى فيصل صوب الباب..وكان الممر فاضي..وساره لحقته..ولما وصلت له نزلت راسها..وهو بدى يتكلم..


فيصل : امممممم..مادري شلون ابتدي..(وهو يحك ذقنه)..امممم..ساره
ساره : رفعت نظرها له وكانت عيونها شوي وتغرق بالدموع..خاااايفه وقلبها يرجف ودقاته تزداد كل مافيصل يناديها باسمها


فيصل حس فيها..دام انه قرى اللي بعيونها ماعطل اكثر وتكلم:..انا كنت اتمنى هالشي من زمان..ولازلت احلم فيه..فــ (طلع كرت من مخباه وعطاها ياه )...فيه رقمي...ساره..اتمنى من كل قلبي انج تكونين معاي طول العمر ووالله مب مقصر معاج في شي وان شاء الله اقدر اعطيج الشي اللي فقدتيه في حياتج..اذا كنتي موافقه اتصلي على الرقم وقولي لي..واذ مب موافقه.. لا تتصلين ولاشي...وانا عندي رقم ابوج واذا...وافقتي.....بيكلمه ابوي


ساره بغير تصديق ودموعها شوي وتخونها وتنهمر كالمطر عندما يهطل..

فيصل : فكري..خذي وقتج كله .....
ساره : .....................
فيصل هم بالرحيل : مع السلامه ...(قالها بعيونه وكله رجا..فكري ...اهم شي اسمع انج موافقه..وارتااح....خذي وقتج كله..))

ورااااااح ...


ساره اللي كان قلبها يدق مثل الطبول..ماتحركت من مكانها وصدى صوت فيصل يرن باذنها
في الصاله

نايف بخوف..: دانه ؟؟
دانه ..: نعم ..
نايف : بروح اشوف ساره ليش تأخرت..انتي خليج هني
دانه في وسط اندماجها انقزت وقالت حق نايف : لالالاااااا...انا بروح لها انت خلك هني
نايف : دانه تكفين انا بروح لها وانتي لا اتحركين
دانه وهي تتذكر الكلام اللي قالته ساره..((احس اني بشوفه اليوم مره ثانيه))...:...لالا(قامت من مكانها)...انا بروح لها

راحت وماسمحت لنايف انه يقول اي شي..مستحيل تخليه يشوف ساره مع فيصل


طلعت من الصاله وهي تدور بعيونها على ساره..راحت صوب الكافتيريا التابعه للسينما مالقتها..ياااربي وينهي يارب سترك

بخوف سالت المره اللي تشتغل في الكافتيريا.بالانجليزي..:..لو سمحتي...شفتي بنت مرت من عندج ؟؟.
المره اللي شافت عشرات البنات مروا من عندها بس تذكرت ساره لانها راحت عنها بدون ماتاخذ الطلب..:ايه ...راحت صوب الباب اللي يطلعج ع الشارع
دانه فتحت عيونها بخوف : ياوووويلي وينج ياساره وين رحتي ..يالهبله شسويتي ؟؟؟

بخطوات سريعه راحت صوب الباب وكلها امل ان اللي في بالها ماتحقق
..خفت دقات قلبها بوم شافت ساره واقفه وعيونها سرحانه في الارض


راحت لها هزتها ونادتها : سااااااره شتسوين هني ؟؟
ساره :...هااا....لا بس...دانه..(بخوف)...كلمني....
دانه وهي تشوف بحر من الدموع في عيون ساره بس ولا قطره من البحر سالت : انزين هدي اعصابج ولا تخافين...تعالي خل نروح حق نايف ترى ميت عليج من الخوف
ساره بخوف : لا يكون شافني ؟؟
دانه : لالا هو كان بيي بس انا ييت لج..
ساره : افففف والله قلبي شوي ويطيح في بطني..


مشوا مع بعض لين صالة الفلم...ودانه مسكت يد ساره عشان تهديها...ساره في وضع تحتاج احد يساعدها فيه..يطمنها ويخليها تقتنع ان اللي صار واقع مب حلم..فيصل بشحمه ولحمه كلمها وقالها ابي اتزوجج..واخيراً...حد حس فيها...ويوم قرى اللي بعيونها حست فيه..لان نظراته اخترقت عيونها ودشت قلبها واكدت لها ان فيصل هو الاول والاخير والوحيد اللي انتظرته من زمن..انه يحس بآلامها وجروحها واحزانها..ويوقف معاها ويكون زوجها..

[الأمورة]

أوه

يا بنت الدوحة ... كمليها....
تصدقين ما عاد فيني صبر على البقيه من أول كلمه وهالقصه تحلو أكثر وأكثر

.....

لا تتأخرين علينا ...

وتسلمين على الجهد الكبير الواضح ...

[bnt aldo7a]

مشكور اخوي ع المتابعه معاي

التـــــــــــــكمله

الجــــــزء الثـــــانــي عــشــــــر


------------------------------



مرت الأيام ومابقى شي على المدرسه..يوم واحد بس ويبتدي العام الدراسي الجديد..وفي هالعام لازم ساره ودانه وعاشه بعد يشدون حيلهم لانها ثانويه عامه ولازم اييبون مجموع..


مرت الأيام وساره على حالها من يوم ماقالها فيصل انه يبي يتزوجها...لما ردت البيت شاورت دانه في الموضوع ودانه قالت لها فكري عدل وانا اشوفه انه خوش ريال ياج من الباب بس في ناس اييون من الدريشه..تمنت لها السعاده انها تعم على حياتها وردت البيت..اما ساره قعدت في غرفتها والهدوووء عام الغرفه من كل ناحيه اللهم صوت المكيف..وهي تفكر..توافق ولا..؟؟...بغض النظر عن مشاعرها اللي تحس فيها اتجاهه انه طلب منها الزواج وكان خوش ريال حبها من قلبه.. حزن في يوم على فراقها اللي كان مؤقت..حس في الامها.. قدر يقرا افكارها..في حد غير هالانسان سوا لها كل هذا..؟؟..لا...بس في يوم من الايام..وهو اول يوم شافته فيه شافته وهو في حالة سكر..يمكن هد هالحاله..بس اذا هدها ممكن في يوم يرجع لها..آآه..افكر في قلبي الفرحان بهالشي ولا افكر في نقطة البدايه..انا كل اللي ابيه اني ارتاح واهد الهم والغم


دانه اللي مخططاتها كلها باءت بالفشل...كل يوم تقريباً كان محمد يروح بيتهم واحياناً تشوفه واحياناً لا..اذا شافته تقط عليه نظرات احتقار..وهو اذا شافها يبتسم من كل قلبه..هل يبتسم عشان يغايظها..؟؟...ولا انه يبتسم لان مشاعره تبتسم يوم تشوفها...مايدري..بس اللي يعرفه انه يحس بكل حالات الفرح يوم يشوفها ويتمنى من الله انه يحفظها


بس دانه اللي في الفتره الاخيره حست بان مخها انقلب 180 درجه..كانت تفكر في انها تتغلب على محمد بكلمات استفزازيه وبعض النظرات الاحتقاريه..نمزجهم ويطلعون كوكتيل اللي هو رفع الظغط عند محمد..بس من عقب مابتدى يبتسم..وابتسامته الحلوه الخجوله تحرك شي في قلبها..يحاول يغلبني بحركاته التافهه لكن مو انا اللي تنهزم وبهالطريقه..مرت الايام ودانه تنام على امل انها تقوم في يوم جديد وترفع ظغط محمد..ولكن افشلت وانقلب الشي ضدها..صارت تنام على انها تقوم في يوم جديد وتشوف ابتسامة محمد اللي تريحها..صارت تفكر في اسم..محمد..في اكلها وشربها وقعدتها ووقفتها وحركاتها وحتى استهبالها..

بدر اللي من عقب ماشاف عايشه صار مايعرف الا اغاني عبدالحليم كل ماتضايق ووده يشوفها يروح البحر..كل مااشتاق لها بعد يروح البحر..


عايشه والسرحااان اللي يمتلكها..لاحظوا ساره ودانه هالتغير عليها وقالوا يمكن من الخجل اللي فيها والموقف لازال مأثر فيها...وعايشه زاد اهتمامها في بدر لان دانه ساعات تتكلم عن اخوها ولما اتييب طاريه ترجع عايشه لليوم اللي شافته فيه وتبتسم بحالميه..


وفي يوم دانه كانت تكلم عايشه واخوها كان قاعد في الصاله ويشوف التلفزيون


دانه اللي وصلت حدها من عاشه هذي لي متى بتم جذي تغيرت كلياً..قالت وبدر يسمعها..وهو مايعرف اسم اللي شافها في بيتهم..: يابنت النااااااااااس انتي تغيرتي صرتي وحده ثانيه يعني..كومبليتلي
عاشه : اوووووه يادانه وبعدين معاااج تروحين وتردين على هالموضوع
دانه : شوفي..ان تميتي على هالحال لا انا رفيجتج ولا انتي رفيجتي
عاشه بخوف : لا يادانه شهالكلام..هذا وانتي رفيجتي الغاليه
دانه : الغاليه..؟؟..اشوفج كل يوم في بيتنا..عازمتج اكثر من اربع مرات ولا ييتي..من زووود المحبه ولا ؟؟

بدر مستغرب من هالخلاف اللي بين دانه ورفيجتها

دانه : سمعيني..اذا مارديتي مثل ماكنتي..لا اعرفج ولا تعرفيني..ساااااااامعه..؟؟
عاشه..بــ
دانه قاطعتها.: بااي...وطرااااااخ..سكرت الخط في ويهها

دانه بعصبيه راحت عند اخوها..وبدر لما شافها يايه صوبه..استعدل في قعدته لانه كان منبطح

دانه وهي ترفع حاجب : انت شمسوي فيها ؟؟
بدر يات عاشه على باله ..: من ؟؟
دانه راحت عنه وهي تقوله : ماااالت عليك

بدر قط الريموت اللي كان في يده بكل قوته على الكرسي اللي مقابله وهو يقول كلام مو متأكد من صحته..بس اذا كانت هي ...

بدر بكل قهر : والله سأليها هي شمســـــــويه فيني..؟؟؟؟؟؟

----------------


في الليل الساعه..12

بعد تفكير عميق لمدة اسبوعين...واتخاذ مصيرها واتخاذ القرار الأخير..طلعت من شنطتها الكرت وشافت رقمه...طرشت المسج وكتبت فيه رايها..رجعت خشت الورقه في شنطتها وحطت راسها ع المخده عشان ترقد لان باجر اول يوم دراسي والكل مستانس<<اول يوم بس حق السوالف ههههههههههههههههه


فيصل اللي كان واقف قدام الدريشه ورافع عيونه فوق ويشوف النجوم اللي تلمع وسط الظلام ..مثل ساره اللي دشت حياته وخلتها منوره بعد ماكانت مظلمه..نقز على صوت المسج اللي وصله وراح لجواله بكل لهفه..صار له اسبوعين وهو ينطر منها جواب..وخوفه كل يوم يزيد عن قبله انها يمكن ماتوافق..

فتح المسج وعيونه تقرى كلمه وحده بس وقلبه طق لهالكلمه

قرااااها بصووووت عاااااااالي..

((....مــوافـقــه....))


نقز بفرحه مثل اليهال : هياااااااااااااااااااااااا
ضم الجوال لصدره بقوووه وهو فرحان لهالخبر نطره اسبوعين بس مهما طالت المده هو مستعد ينطر سنين بس عشان كلمة ((موافقه))..قال لها كلمات بعثها لها في الجو وعيونه مدمعه بدموع الفرح..والله اني مب مقصر معاج في شي..باحطج في عيوني واذا بغيتي عمري.. فدوه لعيونج


------------


اول يـــوم دراســي...وفي الفُرصَه

عاشه وهي تقعد على احدى الكراسي اللي في الساحه : افففففففففففف شهالابله.. مالت بس اقول من اول يوم ييبوا وييبوا وابي درجات ومابي كسل ولعب وابي وابي وابي
دانه بزفره : افففففففففف لا تقلدينها حجيها مايخلص كله تبي حمدلله والشكر ماتقول هاكم هاكم هاكــــم
ساره تضحك على هالثنتين بونااااسه

دانه : مستانسه حضرتج ؟؟
ساره : اي اول يوم لازم
عاشه : آآآآآخ باقي تسع شهووووور
دانه تستهبل : تسع شهور في المدرسه الا جنه مره حامل في تسع شهوووووووووور
عاشه : هههههههههههههههههه

دانه اللي لاحظت ابتسامه مرسومه على ويه ساره السرحانه

دانه : سرووووووي
ساره بابتسامه : همممممممم
دانه : شفيج هبله..؟؟
ساره : ليش ؟؟
دانه تغمز بعيونها : ماااااادري اشوفج توزعين ابتسامات
ساره : لا بســ...
عاشه اللي تدري بسالفة فيصل: اي قوووووولي شصاااار..
ساره وعيونها في حضنها : طرشت له مسج وقلت اني موافقه.. بســـ....
عاشه ودانه بصوت واحد : بـســـ.....؟؟
ساره رجعت ذاكرتها للحلم المرعب : خااااايفه وايد
عاشه : لا تخافين حبيبتي اللي الله كاتبه بيصير
دانه : وبعدين انتي ليش مو راضيه تقولين لنا ليش خايفه ؟؟
ساره : مادري والله ...حلم شفته وقمت متخرعه وحالتي حاله
عاشه : شدخل الحلم ؟؟
ساره تزفر : افففففففف..لان اللي صار في الحلم ان في شخص فرق بيني وبين فيصل..فــ(ترفع عيونها للسما بتنهيده)..آآآآه.....مادري شبيصير...؟؟
دانه : امممممممم..ومن اللي فرق بينكم ؟؟
ساره بخوف : هااا..؟؟...مادري..ماعرفه

دانه وعايشه ناظروا بعض باستغراب..هذي هي ساره مب راضيه تقولهم شمنه خايفه..ومصره على انها تخفي هوية الشخص اللي شافته في الحلم...!!....

ياتــــرى من يكــــــون...؟؟

---------


انتهى الدوام وكل البنات ردوا بيوتهم حتى ساره الا دانه وعايشه كانوا واقفين عند الباب تحت هالشمس الحاره

دانه : عوووووووش لين متى بتنطرين..؟؟..والله ان الشمس حرقت جلد يد يدة خالة بنت عمة ام اللي تصيـر.......
عايشه اللي امها تاخرت عليها قالت وهي تضحك : هههههههههههههههههههههههه..مادري...بنطرها بتمر علي
دانه وهي تشوف اخوها بدر اللي ناطرها من نص ساعه في السياره : فديتج عوش تعالي معاي انا باردج
عايشه بارتباك : شنووووو..خليني هني امي بتييني
دانه : انتي هبله..؟؟؟ الساعه 2 الا ربع وامج مايات ليما الحين لي متى بتنطرينها لين المغرب..؟؟؟؟؟
عايشه وهي تحوس ببوزها : زين..بس اذ عصبت علي مالي خص
دانه بابتسامه : انا اتصرف اذا عصبت عليج

خذوا شناطهم اللي امتلت بالكتب اليوم وراحوا صوب سيارة بدر وبدر مايدري شسالفه..

دانه بتعب ركبت السياره وركبت عاشه ورى : السلام عليكم
بدر وهو يدقق في النظر في المنظره ويحاول يشوف الانعكاس عشان يعرف من اللي ركبت..ماعرف لانها متغشيه

دانه : بدر بوصل رفيجتي
بدر يقول في قلبه..قصدج انا اللي بوصل رفيجتج : ان شاءالله
بعد لحظات تكلم بدر باحراج لانه مايدل بيت البنت : وين..الــ....
دانه كملت عليه : عوووش وين البيت..ترى مادله من المدرسه
عاشه واثر الموقف لااااااااااا زال : اممم..اللفه اللي ع اليمين......وبدت تدلي بدر المكان

بدر اللي وقف ريجه يوم سمع اسمها وصوتها الرنان.....وين...؟؟...من....؟؟...هذي...اللي شفتها...اي انا متأكد..حتى دانه يوم كلمتها في التلفون كانت تناديها.... عاشه..لالالا....لحقوووا علي..بيصير حادث...ماقدر اسوق....توتر فضيع...احساس غريب...لوووووعــه

دانه اللي لاحظت ان اخوها يسوق ببطأ : عســـــى ماشـــــــر..؟؟؟؟؟
بدر اللي ماعرف يسوق متدوده حده : مــا...شر

وصلوا البيت..نزلت عاشه بحذر تخاف تنزل منها دمعه من هني ولا هناك..سكرت الباب..طقت الجرس..فتحوا لها..دشت

ماصدق بدر : آآآآآآآآآآآآآآآآآآه
دانه : جذي يعني..؟؟؟ حركاتك هذي الميهل ماتسويها الا مع رفيجتي؟؟
بدر وهو يحرك السياره في طريقه للبيت : وييييييه انتي الثانيه..شسويت اناااا
دانه : ليش في اولى بعـــد..؟؟.. ..بس جب
بدر عشان يعلمها الادب ومره ثانيه ماتقوله جب..حفص بالسياره يمين ويسار
دانه وهي تمسك مسكة السياره بالقوووو : طيحت قلبببببببببببببببببي الله ياخذك
بدر : نيــــــاااااااهاهاهاي تعلمي الادب لا اعلمــ
دانه قطعته : وي فديت قلبك ان شــــــاءالله كل اللي تبيه بسويه على راسي والله
بدر ابتسم ابتسامه شريرررره

[bnt aldo7a]

بعد مرور يومين على رجعة بيت بو فيصل من استراليا..الحمدلله فيصل ماقصر ومسك الشركه وكان عند حسن ظن ابوه وكل الموظفين كانوا سعيدين بإدارته للشركه ولو انها فتره بسيطه

فيصل : يمااااااا
ام فيصل وهي تقرا الجريده..البريطانيه طبعاً..: نعم
فيصل : يما..انا قررت اني..ادش....(بغباء).....الـ.....قفص الذهبي
ام فيصل تركت الجريده : صج ؟؟
فيصل بابتسامه عريضه : اي
ام فيصل بفرح لولدها : يما لا تعب نفسك ولا شي..عندي لك البنت السنعه وانا بخطبها لك بنفسي
فيصل : يما...انا اخترت
ام فيصل بنظره : من ؟؟
فيصل : انا كلمت ابوي عنها وهوو..يعرف ابوها
ام فيصل بنرفزه : شلون تكلم ابوك قبل ماتكلمني..خلاص يعني..صرت طوفه عندك..ماصدقت تبي اتزوج واخترت لك البنت وهذي اللي انا حاطتها في مخي من يومك..شسوي بها ...؟؟
فيصل ببساطه : كنسليها
ام فيصل : باخذها لك..وهذي اللي تبيها..كنسلهاااا
مستحييييييل : يمااا الله يهداج سمعيني..والـله انــي ابيـــــــــها يايماااا
ام فيصل : مااااافـــي..اسمعني...مابتاخذ الا بنت اختي...البنت رفضت الف بس عشانك
فيصل : بنت خالتي..؟؟...يماااا..(بغير تصديق)...كرستينا انجليزيه..بتوهقيـــني
ام فيصل : مابوهقك ولا شي عيل من تبي تاخذ..؟؟..
فيصل : اول شي...انتي موافقه عليها ؟؟

ام فيصل بتفكييييييير قطع فيصل..لحظات تمر ببطأ... اذا ما وافقت بيموت قلبه اللي ينبض باسم ساره..

فيصل وهو يمسك يد امه ويمسح عليها : يما حبيبتي..والله ماقدر اعيش مع وحده ثانيه غيرها..يما تدرين..اهي اللي خلتني استعدل..اهي اللي خلتني اعرف الطريج الصح..اهي اللي خلتني اعرف الصح من الغلط..اهي يايما..بتحرميني منها؟؟..

ام فيصل بتنهيده : اذا تبيها..مابحرمك
فيصل ودمعة فرح بعيونه : فديييييييييتج (باس راسها )..الله لا يحرمني منج
ام فيصل : والبنت ؟؟
فيصل : كرستينا...خليها حق جوووووزيف..لايقين على بعض..

-----

اتصل بو فيصل في بو محمد وكلمه واتفقوا على موعد..بس...في مكتب بو محمد اللي في شركته والمكان غريب نوعاً ما..و محمد ونايف مايدرون عن السالفه..وهالشي اغرب من اللي قبله

في بيت بو بدر
7 بالليل...

كانت دانه قاعده في الصاله..تهزز ريلها بقلق..وينه هذا...؟؟ ليش مايا اليوم....؟؟...شفيه..؟؟...اوووووووف..شفيني انا خايفه عليه..مالت عليه..

سمعت طقات على باب الصاله...وباب الصاله هو المدخل الرئيسي للفله...خذت شيلتها وراحت صوب المنظره اللي عند الباب..

مسحت على ويها بقلق وشافت جلابيتها..في الفتره الاخيره صايره تلبس جلابيات..شي طبيعي..مو محمد كل يوم في بيتهم واذا بتطلع جدامه لازم تكون محتشمه..حطت الشيله عدل ولفتها باحكام..مشت الكحل السايح اللى بقى اثره من الصبح..مسكت مسكة الباب..خذت نفس عميييييييق..وفتحته


كان منزل راسه : السلام عليكم
دانه : عليكم السلام...حياك
دش داخل وجبينه من حرارة الجو معرق لانه خاس وهو ينتظر حد يفتح له الباب : شخبارج ؟؟
دانه : تمام الحمدلله..وانت ؟؟
محمد بابتسامه : بخير...وكمل بس في قلبه..(بشوووووفتج)
محمد : اممممممم..(يمكن هو ايي كل يوم عشان بدر بس..السبب الاول واللي صدر مؤخراً..اهي)..وينه بدر ؟؟
دانه : يصلي
محمد : ماعليج امر..بغيت قلاص ماي
دانه : ان شاءالله

راحت المطبخ عشان اتييب له القلاص وهو مستغرب من تغيرها المفاجئ بس الحلووو..ياحلوها لما تكون مطيعه..تينن فديتها يااااااربي

يابت له الماي ..شربه وقعد على القنفه ودانه قعدت بس كانت بعييييده..مايعرف يقعد معاها في مكان واحد يحس قلبه بيطلع من صدره ولا عقله بيطير من راسه ولا لسانه بينطق باللي في قلبه..


محمد بقلة صبــر : شيصلي ترااااويح ؟؟
دانه : ههههههههههههه..مادري والله بشوفه
محمد ذااااب مع هالضحكه..حماااااار انا اضحكج..اعور قلبي ليش..لا تضحكين والله شوي واسيح.. يابعدهـــم

كلها ثواني ونزل له بدر وفي طريقه مرت دانه من عنده وراحت فوق

بدر وهو يسكر ازرة الثوب : حتى مالحقت اني اسكرهم
محمد : ساااااااعه..نقعتني ياريال
بدر وهو يغمز له : بذمتك...مو مستانس اني تأخرت عليك
محمد بتنهيده وابتاسمه عريضه حاااالمه : الاااااااا..
بدر: ههههههههههههههه..صج ماتستحي..ع الميلس اشووووووووف
--------

نايف توه راجع من برع..كان عند رفيجه جابر..داروا في الكورنيش وعقب مروا على معصره وخذ له عشى ورجع جابر البيت..قعد في الصاله الفوقانيه وفتح الاكل وهجــــــم عليه من اليوع


ساره طلعت من غرفتها وحاطه القلم عند اذنها والكتاب في يدها واثر الدراسه المبكره باين عليها: وي وي اسم الله عليك شوي شوي
نايف وحلجه ملياااان : هذا بدل ماتقولين لي انا بطبخ لك بدل ما آخذ لي من المعصره..!
ساره بقرف : لااااااا إتكلم وفي حلجك اكل..لوعت جبدي متى اتعلم ياقــــذر
نايف بنظره لاخته وبزعل : افاااااا...انا قذر...؟؟
ساره وهي تهز راسها بعجز من هالانسان محد يتغشمر معاه : اتغشمر ويا ويهك
نايف : ماحب حد يتغشمر معاي بهالطريقه..هذا وانا اللي معطيج الحنان والحب..مالت علي من اخو..(كمل اكله بدون نفس)
ساره : حبيبي نيوفي..لا تزعل والله اتغشمر معاااااااك
نايف : مازعلت
ساره : قول والله ؟
نايف : مابحلف..وبعدين انا مازعلت بس انتي اللي تضايقيني بهالكلام
ساره راحت قعدت قريب من اخوها : فديتك والله ياخوووووووي ربي لا يحرمني منك ومن هالويه الحلو
نايف : ادري تبين تراضيني
ساره : يه نيووووووووف لا تعصبني(باسته على راسه بالعمااله) وهذي بوسه على راسك مادري على شعرك الطويل... الا على طاري شعرك متى بتقصـــه ؟؟
نايف بعناد : مابقصه
ساره : بتطوله اكثر من جذي صج قذررررر
نايف : رديناااااااااا ؟؟

حلاتهم والله توم وجيري

--------------

في اليوم الثــاني

العصــر


بيت بو محمد العصر هادي..كــ عادته...نايف من يرد من شغله الساعه 3 يتغدى ويصلي العصر وعلى طول يتجه لسريره..محمد ساعات يرقد وساعات لا.. وبو محمد اللي صار مايداوم في شركته اللي هو واخوه مسوينها..الحاله الصحيه متدهوره..القلب تعبان..الروح تعبت..حتى لو كان كبير..هو محتاج للعنايه اكثر من ماعياله معطينه..مرته اللي كانت تعتني فيه ومن كثر عنايتها كان يزهق ساعات..بس اذا راحت الغاليه..راحت العزيزه..ومحد بقى له في الدنيا..كانت هي رفيجته وحبيبته وزوجته وام عياله وروحه وعمره...لكـــن..لما راحت انقطع كل شي..وخصوصا الحين بدا يحس ان ساعته قربت..كثير..

قال حق الخدامه تنادي له ساره..راحت نادتها وقالت لها ان ابوها يبيها..

ساره وهي تطق الباب : يباا
بو محمد : دشي يبا الباب مفتوح
دشت ساره وشافت ابوها متكأ على الكرسي اللي في بلكونته الواسعه المطله على البيت من الامام..والستاير تتحرك مع الهوا..شافت في عيونه نظره مافهمتها
بو محمد : عسى ماخربت عليج..كنتي تدرسين ولا نايمه ؟؟
ساره قعدت عند ابوها : لا ذي ولا ذاك..كنت ارتب غرفتي
بو محمد : بغيتج في سالفه
ساره وقلبها بدا ينبض نبضات قويه والهوا تخلل شعرها ولعب فيه : شنو يبا..؟؟

بو محمد وهو يطالع بنته الوحيده..ساااره..كبرت وكبر عقلها ويمكن تكون اعقل وحده من عياله..حبها كثر ماحب امها اللي تشابهها وايد في الملامح والصفات : يابنتي..تدرين انج كبرتي..والبنت في هالعمر يكونون الخطاطيب عند بابها بالدور..(شافها نزلت راسها وعيونها شابكت مربعات البلاط..كمل كلامه)..خطبوج مني..ناس لهم سمعه طيبه في البلاد واخلاقهم طيبه يبونج لولدهم..وانتي يا بنتي لج القرار..

ساره اللي تفاجأت شوي وبتفاجُؤها هبت عليها ريح خلت مشاعرها تطير..بس كانت تدري ان هالشي بيصير : اللي تشوفه يبا..
بو محمد : هههههههههههههههه..ليش انا اللي باخذ الريال ولا انتي ؟؟
ساره اللي انحرجت : يباا..ابي اكمل الدراسه
بو محمد : يعني ..؟؟؟
ساره عقب ماحطت عيونها في عيون ابوها..وشافت الرضا فيها : موافقه
بو محمد : تبين تكملين دراستج كمليها..لا تخافين بتكون الخطوبه بعد ماتخلصين الثانويه..ومحمد ونايف مايدرون بهالشي ..
ساره استغربت : ليش ؟؟
بو محمد : بيدرون لما تكون الخطوبه رسميه..اهم شي راحتج يايبا ترى ماعندي الا ساره وحده ربي يحفظها
ساره حظنت ابوها : الله يطول بعمرك يابوي وامي

بو محمد حزن على اللي قالته وحس بغصه في قلبه..صغيره وماحست بحنان الامومه..الله يعوضها ان شاءالله باللي فيه الخير..


رغم الحزن اللي امتلكها..في هالموقف..ياها الخطيب..والحبيب... وامها..الله يرحمها مب معاها ماتشاركها فرحتها ولا دمعه من دمعاتها الفرحه..رغم هالحزن كانت فرحانه..حبيبها تقدم لها..بخطوه..او انجاااز..الحمدلله والشكر لك يارب.. فرحتني..طول عمري اذرف الدمعات وكلها دموع حزن بس الحين دموع فرح..هذا بفضلك ياربي

--------


في بيت عاشه..عاشه ردت البيت اليوم واستغربت لما دشت البيت ومالقت امها موجوده في الصاله او حتى في المطبخ..ماهتمت وايد بدلت ملابسها وتغدت واستغربت للمره الثانيه.. اليوم تغدت بدون تواجد امها..يه..شسالفه..وينهي امي ؟؟...


راحت لها الغرفه ولقت الباب مفتوح : يماااااا
ام راشد اللي كانت مستلقيه على السرير بتعب : عيوني
عاشه بخوف : يما شفيج..؟؟ وينج ماشفتج اليوم
ام راشد : تعبانه شوي ..
عاشه : فديتج قومي بوديج المستشفى
ام راشد وعيونها ذابله : مايحتاي خذت بندول
عاشه : يمااااا بندول بس.؟؟؟...تشوفين حالتج انتي ..تعبانه وايد..(قربت من امها ولمست جبينها)..اوووووووف..شااااب ضووووو..قومي يما
ام راشد : وين ؟
عاشه وهي تساعد امها على انها تقوم من السرير : المستشفى
كملت بصرخه على رااااشد اللي كان يلعب في القيم كيوب..عمره وحياته الالعاب الالكترونيه
عاشه : رشووووووود
راشد بلا اهتمام : ههههههههمممم
عاشه اللي ماسمعت رده : رشووووووود تعال
راشد يكلم نفسه : ويعه خربت علي شتبييييي هذي..اوووووووووف...قام وهو معصب وراح لها وين ماسمع صوتها ولقاها في غرفة امه..وقف عند الباب وهو يقولها : خيـــــــر..
عاشه : روح قول حق ابراهيم(الدريول) يجهز السياره وروح بدل ثيابك بسررررعه
راشد : واااااااو بنروح الستي ؟؟
عاشه : حول انت ماتشوف امي (بصرخه هزت هالياهل) تعباااااااااااانه ؟؟
راشد : ان شاءالله ان شاءالله

ولما راح راشد يسوي اللي قالت له عليه ساعدت امها في تبديل الملابس وراحت لبست عبايتها ومنهاااا الى المستشفى


-------


ساره وهي تكلم دانه في التلفون : دنوووووي تكفين تعالي عندي
دانه : وي ليش انتي تعالي
ساره : دنوي والله ضروري ابي اقولج شي
دانه : قولي هني في التلفووووون
ساره : عااااااااااااد
دانه : زين بس خليني اشوف بدور اذا بيوصلني
ساره : بسرعه تكفييييييين لا تعدلين لي ساعه وتوقفين جدام المنظره ترى نيوف راقد
دانه اللي صارت ماتحس بشي مثل ماكانت تحس قبل فيه يوم تسمع اسم نايف..يمكن الحين تبتسم..بس ماتدري شفيها بالضبط..: نووووووم العوااااااافي
ساره : ههههههههههههه الله يعافيج انجلعي يالله باي
دانه : باي


راحت لبدر ودشت عليه بدون ماتطق الباب شافته سرحان في دنيا ثانيه..منبطح ع السرير وحاط يده ورا راسه وعيونه في الصقف : بدوووووووور حياتي
بدر نقز : ويعه جذي يدشون ؟؟
دانه : عادي والله احنا اخوان مابينا شكليات
بدر بعد ماتنهد : خلصيني شتبين ؟؟
دانه : افاااااااااا شتبين مره وحده ؟؟
بدر اللي انقطعت احلامه يوم اهجمت عليه دانه : والله مب فاضي لج قولي شتبييييين بسرعه
دانه وهي تشوفه بطرف عينها : تغيرت ياخوي تغيرت وصرت ماتنطااااق حتى
بدر وويه عاشه يمر جدامه : يعني في ظنج اني اقدر اختار اللي ابيه والله لو اقدر جان ماقربت صوب هالشي
دانه بغباء : شنو هالشي ؟؟
بدر يتهرب : غبااااااائج اللي ماعرف وين احذفه..قولي تشبين ؟؟
دانه : وصلني بيت عمي عبدالله
بدر : انتوا ماتملون من بعض ..كل يومين وحده منكم في بيت الثانيه وحتى الصبح تشوفون بعض في المدرسه
دانه : كيفنااااااااا مالك شغل بتوديني ولا آخذ تاكسي ؟؟
بدر : افا عليج اوديج غصباً علي وعلى خشمي بس دقايق وانا عندج

راحت بدلت ملابسها وهو بدل ملابسه..بدر لبس ثوب والغتره حطاها ع السريع ماحاول انه يهتم في شكله لان مخه مشوش ودانه ماتعدلت وايد بعد لبست جينز وبادي وردي وحطت كحل داخل عيونها..

ولما وصلت بيت بو محمد..في نفس الثانيه كانت ساره واقفه في الحوش مع محمد..هي مايله في وقفتها ولابسه توب ابيض مخطط بخطوط سود وبنطلون اسود موديله موديل السبعينات وعقد ناعم من اللولو ورافعه شعرها كله على طريقة ذيل الحصان..كانت صج فتاه سبعينيه.. وهو لابس ثوب وحاط يدينه في المخبا ويسولفون الى ان دشت دانه..

ساره اول ماشافتها : دنوووي..شوفي ورى الباب
دانه المسكينه عقب مادشت التفتت عشان تشوف شنو الشي اللي ورى الباب : بسممممممم الله الرحمن الرحيم
..صرخت بخووووووف ومشت بخطوات سريعه صوب ساره وكلها خجل بسبب هالموقف اللي صار جدام محمد..

ساره : هههههههههههههه تخافين من قطوه ؟؟
دانه : هذي سوده تخرع ..الله يسااااااامحج طيحتي قلبي
محمد ابتسم : عن اذنكم بروح الميلس عند الربع شوي
ساره ردت الابتسامه: الله يحفظك اذنك معاك

وراح محمد ودانه استلمت ساره سب وشتم : يعلج يالعنز يالخايسه يالبقره يالهبله شفيج انتي ان مايبت لج بريعصي واخليج اتهززين من فوق لين تحت من الخوف ماكون بنت ابــــوي
ساره : ههههههههههههههه..آسفه دنوي والله ماكنت اقصد بس كانت وراج
دانه بعصبيه وهي تاخذ نفس : كانت وراي اوكي..بس مايحتاي تفشليني
ساره بنظره : افشلج..؟؟...جدام منو..؟؟...
دانه : ها...؟؟...
ساره : نيوف وراقد من تقصدين ؟؟
دانه باراتباك : يعني ما اتفشل الا جدام نايف ترى محمد بعد ضحك علي يعني فشلتيني الله يسامحج
ساره : ضحك صح..بس مب عليج ولا عشان الموقف
دانه : عيل ؟؟
ساره : مادري ياختي بس شفته يبتسم بحناااان..
دانه وفكرها راح بعيد : بحنان..يمكن تذكر حبيبته ولا شي
ساره : والله ان كانت حبيبته فأنا اقولها ياااااااااحظــــج في اخوي
دانه بقهر وهي تضرب ساره على جتفها : جب عاااد

----------

بدر عقب ماوصل دانه رجع البيت لان نفسيته تعبانه وماله نفس يطلع..صج لي قال ثاني..(( بيي يوووووم وبتقولي ياااثنوووووي ساعدني..عالجني..حبيت ياثنوووي حبيـــت..))...آآآآآآه وشلون بتعالجني..؟؟...الحب عذاب

ام بدر : بدر ود اختك المستشفى
بدر اللي كان بيشيل الغتره بس نزل يده وخلا الغتره : اي وحده ؟؟
ام بدر : نوره..مصخنه وكله ترجع مادري شفيها
دشت عليهم نوره اللي كانت مغطيه نفسها باللحاف ورقدت على سرير اخوها وقالت حق امها : يما مابي اروح المستشفى
بدر : ليش تخافين..؟؟...
ام بدر : لازم تروحين مايصير اتمين جذي
بدر : اي مايصير يابطله قومي يالله
نوره : مااااااحب اروح المستشفى
بدر : بتروحين يعني بتروحين..قووووووومي
نوره ومن الحراره اللي فيها نزلت دمعه من عيونها : ماااابي
بدر عوره قلبه وراح لها وشلها من على سريره ..وحط راسها على جتفه مثل اليهال : خلاص يما..بوديها
ام بدر : لحظه يما باعطيها شي تاكله قبل ماتروح لان بطنها فاضي
بدر وهو يحس بدمعة نوره الساخنه اللي نزلت على ثوبه وحسسته بحرارتها : مايحتاي يما اول مابتاكله بترجعه
ام بدر وهي تلحقه للباب : اتصل فيني وقول لي شبيقولك الدكتور
بدر : ان شاااءالله

فتح باب السياره الوراني وقعدها وخلاها تستلقي وماعطل ركب السياره وشغلها وعلى طول ع المستشفى

[bnt aldo7a]

دانه اللي ماشافت عمها من اسبوع وشي..ياربي عليه تعبان وهلكان..(ادري..مرضتهم كلهم)..حالته الظاهره ماتسر التعب مبين عليه والارهاق والحركات البطيئه اللي ماتصدر الا من اللي يعانون من شي..واكيد من الداخل تعبان اكثر واكثر..يعني لهالدرجه عياله مو ملاحظين عليه..؟؟

ساره ودانه كانوا قاعدين في غرفة بو محمد وسالت دانه بصوت واطي : ساره..شفيه عمي ؟؟
ساره : مادري والله..احسه تعبان بس مايقول
دانه : انزين ليش ماتودونه المستشفى..؟؟؟
ساره وهي تفكر : مممم...مادري
دانه افتحت عيونها باستغراب والتفتت على عمها اللي كان منسدح ع السرير : عمي شفيك ؟؟
بو محمد وهو معطيها ظهره وصوته مبحوح من التعب ومن الصبر على التعب : تعبان يابوج من هالقلب
دانه قامت وراحت عند عمها وين ماهو راقد وقعدت قباله على ركبتها وهي تمسد يدينه بحنان : فديت هالقلب ربي يطول بعمرك ياعمي ويخليك لنا
بو محمد باستسلام : الاعمار بيد الله
دانه والدمعه تبحر في عيونها : ونعم بالله

ساره اللي ماقدرت تصبر اكثر وهي تشوف هالمشهد جدام عيونها مشهد تدمع له العين ويتقطع له القلب..ابوها الغالي..وبتفكير...محمد...برع...مافي الا نايف...سرعت برع الغرفه وراحت لغرفة نايف


ساره : ناااايف..ناااااااايف..اففف نيوف افتح
نايف في عز نومه : هممممممممم
ساره وهي تطق الباب : افتح الباب بسرررعه
نايف بكسل وتعب الشغل قام من سريره وعيونه مغمضه وفتح لها الباب زين مادعم في الطوفه : نعم ؟؟
ساره بعصبيه من هالاخو : انت شله تقفل الباب ؟؟
نايف فتح عيونه شوي شوي : حمدي ربج فتحت الباب لو حمود ماقام
ساره : مب وقته ..اسمع.. روح غسل ويهك والبس ثوبك ووَد ابوي المستشفى
نايف فتح عيونه ع الآخر هالمره : اودي من ؟؟
ساره وهي تقرب منه : ابووووي
نايف بخوف : شفيه ابوي ؟؟
ساره : تعبااااان وده المستشفى
نايف : زين.. ببدل ملابسي وباييج
ساره برجا : سرع واللي يعافيك

راحت عند ابوها ودانه ولما وصلت لهم شافتهم مثل ماهم قاعدين عند بعض..مادخلت الغرفه وقفت عند الباب وهي تميل بجسمها وتدعي الله انه يخلي لها ابوها..من لها سواه ان راح....؟؟...غمضت عيونها وهي تحبس دموعها.. وهي تتذكر مشاعرها يوم درت بوفاة امها...ياهو احساس مر يسري في الجسم..ماتبي تذوقه مره ثانيه..مر نايف من صوبها وفتحت عيونها

زين ان دانه كانت حاطه شيلتها ولا جاااان..وبحيا اخف عن قبل..: هلا نايف..شخبارك ؟؟
نايف وعيونه على ابوه : طيب الحمدلله..انتي شلونج ؟؟
دانه وقفت على ريلها وابتعدت عن بو محمد : تمام الله يسلمك
نايف يكلم ابوه : يباا....قوووم
بو محمد : على وين ؟؟
نايف : وين يعني وانت في هالحاله..قم يبا الله يخليك وانا بساعدك...

توقع الرفض من بو محمد بس بو محمد قبل انه يروح المستشفى..كان مستسلم بدرجه كبيره..الله يخليك يابوي مب ناقصين حد ثاني يودعنا..مب ناقصين...


--------------

[bnt aldo7a]

الجــــزء الثـــالث عشـــــر


----------------------------


في المستشفى..لما وصل راح للاستقبال وعطوه رقم لاخته..ماقعد في الاستراحه الخاصه بالرجال عشان اذا صار في اخته شي يكون عندها..خذاها وقعد معاها في الممر اللي يودي على غرف الاطباء

قعد ع الكرسي بتنهيده بعد يوم شاق..اليوم على وشك انه يخلص..ويأتي يوم جديد يمر عليهم..ولكن بفرح ام بحـزن..؟؟

حرك راسه يمين وشمال...ولما رد حركه يمين تسمر وثمه مفتوح وعيونه مفتوحه


هـــذي..؟؟؟


هـــنـــــي


لالالا...مستحيــــــل..مب معقــــوله..وحرك راسه صوب اليسار بغير تصديق..لا يكون انا مينون وصرت اتوهم من كثر التفكير فيها..اي اكيد...ينييييييت..صرت خبل.. عيل شلون بلقاها هني..وفي المستفشى..خل اتأكد من غبائي

لف راسه صوب اليمين بترقب


هذي هي..يااااااربي..يعني ماتوهم ولا اتخيل..هذي هي اللي سيطرت على مشاعري وتفكيري بدون استئذان ولا حتى سابق انذار..قلبه نبهه على شي..ليش هي في هالمكان لا يكون تعبانه ولا صاير لها شي....عسى فيني ولا فيها

ارتاح قلبه يوم طلعت وحده من احدى الغرف وراحت صوبها..مره كبيره..اكيد امها..الحــــمــــدلله..آآخ بس لو اقدر اكلمها..صرخ في نفسه بقــهــــر..آآآآآآآآآآآخ ..آآآخــ من العـــادات والتقــــاليد..اللي تمنعه من انه يقوم ويروح لها ويكلمها


يوم التفتت عاشه عشان تساعد امها في المشي

وشافت ابتسامه موجهه لها..ابتاسمه حنونه وفيها شوق

..وقف الدم عن السير في عروقها..وقف القلب عن الدق..وقفت الرموش عن الرف...ولكن لمدة ثاااااانيتين..

هذا شيسوي هني..؟؟....عسى ماشر..انتبهت للي كانت قاعده عنده..اخته نورررره..بس انا شيأكد لي ان المريض هي مب هو ...؟؟....واناااااا شعلي هو ولا هي في النهايه..الله يشفيهم...وكملت السير مع امها..وتركت عيون بدر تراقب خيالها وهو يبتعد..قال بهمس وهو منزل راسه وعيونه تناظر قلبه خلف صدره بشفقه..:..الله يعينك ياقلبي دام هذي البدايه...



-------------


في المستشفى

نايف خذ ابوه للمستشفى واول ماوصل دخلوه غرفه من الغرف وقالوا له انتظر برع..مرت ساعه الا ربع وهم ينتظرون..كان نايف متسند على الطوفه وعيونه تناظر الصقف ولمعة الليتات تنعكس في عيونه..وساره ودانه قاعدين ع الكراسي منتظرين اشاره من الدكتور تطمنهم..

اتصل في اخوه وقاله انهم في المستشفى ومحمد هد ربعه وراح المستشفى ولما وصل شافهم منتظرين بقلق بس ماعطى اهتمام وراح صوب الغرفه بخطــى مو سريعه الا رعديه وبرقيه

لما مشى من عند نايف مسكه نايف من يده : وين رايح ؟
محمد التفت : ابي اشوف ابوي
نايف وعيونه تطالع دموع محمد المنحبسه : ياخوي الدكتور قالنا ننتظر
محمد : شننتظر بعد.....
نايف : خلنا نصبر المهم يكون ابوي بخير

راح محمد عند نايف وتسند على الطوفه مثل وضعية نايف الا ان محمد كانت عيونه تشوف الارض..يارب ارحمني واحفظ ابوي ورجعه لنا سالم يااالله انك تخليه..مسح عيونه بكفه وهو يتمنى من الله انه يمده بالصبر الجميل

البنات ماكان خوفهم اقل من الشباب..ساره من اول مادشت المستشفى وهي تدعي لابوها وعيونها منترسه دموع..
اما دانه زاد قلقها يوم شافت محمد خايف على ابوه بهالطريقه..حتى انت يامحمد حزنت..كنت اظن انك عديم احساس بس طلعت حساس وطيب وقلبك مغلف بالحنان


طلعت الممرضه من الغرفه وراح لها محمد وسالها : سستر معلي ندخل ؟؟
السستر : اي تفضلوا يبيكم الدكتور

دخلوا محمد ونايف ومن وراهم دانه وساره..

قبل لا يدخلون على بو محمد كلمهم الدكتور : من فيكو ابنو ؟؟
نايف وهو يأشر على نفسه وعلى محمد : انا وهو
الدكتور : ماعليش بس بدي اكبر واحد في كلمتين
محمد : ان شاءالله دكتور
الدكتور وهو يكلم الباقي عدا محمد : بتقدروا هلأ تشوفوه

فهموا الباقي انهم لازم يخلون الدكتور ومحمد بروحهم وماعطلوا دخلوا على بومحمد

محمد : خير دكتور
الدكتور : ان شاءالله خير..انا مستغرب كتير بصراحه
محمد بخوف : من شنو ؟
الدكتور : الوالد تعبان كتير وعنده مشاكل كتيره واغلبها مركزه في الالب..
محمد بتكشيره : لا تقول ؟؟
الدكتور : هيأتكم ماكنتوا تعرفوا بشي..يمكن هو ماكان بيحب يزايأكون بشي بس هو عنده ضيق في التنفس وشرايين الالب بدت تنسد..يعني الدم مابيوصل بكميه كافيه
محمد فتح عيونه : الشرايين بدت تنسد....؟؟ دكتور تكفى سو له اي شي المهم انه يكون بخير
الدكتور : رح نعمل اللي بنقدر عليه والباقي على الله
محمد : الله يشفيك يايبا
الدكتور وهو يكتب تقرير عن صحة بو محمد في ورقه ورديه : ماراح نرخصه لان حالته مابتسمح..
محمد : انزين دكتور..نقدر نعالجه برع؟؟
الدكتور : بتقدروا طبعاً..بس مو بهالفتره
محمد : اهااا...مشكور دكتور
الدكتور : العفوو

طلع محمد من عند الدكتور وراح لغرفة ابوه..حرك الستاره اللي كانت مغطيه على بو محمد

محمد قرب من ابوه وباسه على راسه : حمدلله على سلامتك يبا
بو محمد بتعب : الله يسلمك
محمد قعد على كرسي قريب من ابوه: كل هذا يايبا..؟؟ا واحنا وين رحنا..مب كنت اقولك اذا فيك شي ولا شي قولنا ومابنقصر معاك
بو محمد : مافيني شي يايبا الله يهداك بس..(وبنضره لكل عياله وبنته الثانيه دانه)..اذا رحت لا تحزنون..ادعوا الله انه يرحمني ويغفر لي كل غلط سويته بحياتي..ولا تذبحون نفسكم بالصياح يابنياتي..لان الدنيا عجلتها بتسير ومابتنتظر هذا اللي توفى ولا ذاك اللي راح..لا.. هي بتدور ولا عليها..وانتوا امشوا معاها وكملوا اللي بنيتوه بنفسكم..في النهايه محد بيعيش في هالدنيا

لحظه صمـــت مرت على البنتين والشابين..ودمعه في عيون كل منهم..كل منهم يغلي هالوالد العزيز اللي رباهم من صغرهم..محمد ونايف وساره..تحمل شقاوتهم لما كانوا صغار وعابلهم لين ماصاروا كبار وينشد بهم الظهر..ودانه حبها مثل ماابوها يحبها وعاملها كما لو كانت ابنه رابعه له..

نايف وهو يشوف ضباب جدام عيونه بسبب الدموع اللي منعت عيونه من الرؤيا: فضلك علينا كثير يابوي
محمد : الله يديمه ويديمك لنا
دانه : ربي يخليك ذخر لنا يايبا
ساره اكتفت بانها تمسح دمعه خانتها ونزلت من عيونها..دمعه وحيده من بين كل الدموع سقطت وخانتها..مسحتها وامسحت على ريل ابوها بحب كبير من بنت تحمله في قلبها لابوها الغالي


----------


بدر عقب ماوصل اخته البيت وطمن امه عليها راح عند ثاني..رفيجه العزيز من بعد محمد

في الميلســ

ثاني بطرف عيونه : هيييييييييييييه يابدور
بدر : هيييييييييه ياثنوي
ثاني : هههههههههههههههههههههههه
بدر وهو يرشف من الشاي : شخبار الدوام معاك..؟؟
ثاني : زفـــت في زفــــت..مالت على الدوام وعلى اللي يبي الدوام..لوعــــــه ياخي
بدر : واللوعه من شنو..تقوم الساعه 8 وتوقع 11 عشان ترجع البيت وتخمد
ثاني : انا ارجع عشان اخمد ؟؟..خمدت عليكــ عشرين طوفه قول آمين
بدر : يعلهم يخمدون عليك
ثاني : وبعدين تعااااال..انت بأي حق تطلع علي كلام وتقول اني ارجع 11 عشان ارقد ؟؟
بدر بهز جتفه بحركه جنه يقول : هذا الله سمعته
ثاني وهو يظيج بعيونه : ومن الحمار اللي جذب عليك وصدقته ؟؟
بدر رفع حاجب : جذب علي ها..؟؟؟...صلاح اللي في قسمكم كل يوم يشوفك تطلع 11 ومسكين كاسر خاطري سااااعات ياخذ عنك الشغل
ثاني : مالت على صلوح اكبر جذااااااااب في الدوحه..شفت شلون..(يفرك يدينه بقهر مصطنع)..محتر لاني احسن منه والمدير يحبني ليش اني اشتغل اكثر واحسن منه القرد الخااااايس
بدر : مسكين..ماخذ عنك شغلك..يعني بدال الشغلانه ثنتين..ومثقل على قلبه بسبتك وتقول قرد ؟؟ يانااااااااكر الجميل
ثاني : ولا تزعل..ملك جمااااااال الفيله
بدر : هههههههههههههههههه..كحلتها الحين؟؟
ثاني : ملك جمال..شي جميـــل..ماقلت شي غلط
بدر : كلش ياملك جمال الـ.......
ثاني وفيه الضحكه : ايه ايه ايه انت تعدييييت حدودك ترى والله اطبع صورتك في الطوفه
بدر : فيك خيــــــر؟؟
ثاني عصب وطلع الشرار من عيونه والدخان من راسه..مثل الثور لي بغى يجهز نفسه ويفرك ريله في الارض
بدر : هههههههههههههههههههههههه..صج ثوووووووور..هههههههههههههههههههههه
ثاني باحباط : افاااااااء بس افااااااااااااء

رن جوال بدر..شاف الرقم..اخته دانه..رد عليها وهو لا زااااااال يضحك

بدر : هههههههههههههههه..هـ..هلاااا دوينه..
دانه : هلا فيك بدر..وينك فيه ؟؟
بدر : في الميلس..ليش فديتج صاير شي ؟؟
دانه اللي رجعت من السمتشفى مع محمد وساره من ربع ساعه : اي..ابيك تاخذني من بيت عمي..ووــــو
بدر بترقب : وووو؟؟..
دانه وهي تلعب بسلك التلفون : عمي..تعب وودوه المستشفى
بدر اللي استوى في ظهره بعد ماكان متسند براحه : من صجج ؟؟
دانه : عيل اجذب في خبر مثل ذي ؟
بدر : زين..ربع ساعه وانا عند الباب..عمي في مستشفى حمد صح ؟
دانه : اي..اذا تبي تروح له روح له بس اول مر علي ووصلني البيت باجر عندي دوام
بدر : ان شاءلله

طلع من ميلس ثاني وثاااني معصب عليه توه واصل ماقعد شي بس دام عمه تعبان..خل يروح له..وباااجر بيعلمه من يكون ثاني...ان ماطلع السبب اللي مخلي بدور يسرح هالايام..والله دنيا..بدر اللي كان يقول انه مابيحب ابد والحب عذاب..ويقول الحب لأهله..صرت اشك انه يحب....؟؟؟.....

-------

بدر خذ اخته ووصلها البيت وفي طريجه للمستشفى كان يفكر بهالمصايب..ياربي شاسميها مصايب ولا وشو..نوره مريضه واللي كانت مع عاشه مريضه وعمي..آآه ياعمي..الله يشفيك...وصل للمستشفى وسال عن غرفة عمه ولما عرف راح للغرفه..يمكن مايلقى حد عند عمه لان الوقت تأخر..الساعه 11 بالليل

طق الباب طقتين ودخل بهدوء..الممر هادي والغرفه هاديه..طل براسه ومالقى حد سوا عمه اللي كان راقد ع السرير ومتلحف بفراش ابيض وبعض الوايرات الممتده من الآلات لجسمه..

قرب من عمه وتأمله لثواني..طبع قبله على راسه وهو يتمنى له الشفا..طلع من الغرفه ومن المستشفى بكبره وتوجه للبيت باجر عنده دوام ان مافتح عيونه الساعه 6 بيشوف الويل من المدير

في نفس وقت خروج بدر..دخل نايف غرفة ابوه وحس بحركه كانت تصير..هم دقيقتين راح فيهم لدورة المياه ولما رد حس بحركه..معليه يمكن السستر..كان نايم في سبات عميق وحاط راسه على طرف الكرسي..ماحس الا بهزه في جسمه قومته من النوم..احساس الوحده يرافقه من الطفوله لهاليوم..سند راسه بتعب على الكرسي وبآآآآه طلعت من الاعماق..

تراودت على باله بعض الكلمات يوصف فيها حاله

في نص الليل يراودني شعور..
اني وحيد..
في العالم وحيد..
مالي الا احلامي واوهامي والخيال.....
وفي زحمة الناس اضيع..
كلن مع حبيبه منشغل
الا انا في هالزحمه......وحيـــــد......

غمض عيونه وهو يحبس سيل من الدمعات اللي سقطت منهم دمعه من زاوية عيونه وسالت على وجنته الى ان انتهت بتغر فمه.....

---------


في صالة بيت بو محمد..كان الجو خالي من الاصوات...وساره بعد ماتسبحت خذت لها كتاب من كتبها وطبعا كانت روايه بوليسيه ورومنسيه في آن واحد..كان منظرها هادي لابعد الحدود..لامه شعرها ورافعته ومنزله منه خصله طويله تحايط ويهها الابيض الملائكي..وفي يدها الكتاب وفي اليد الثانيه كوب سااااخن من الشوكولاته..

ومحمد اللي نسى عمره ورقد في الصاله..ماهان على ساره انه ينام في الصاله

ساره : محمد
محمد اللي راسه كان طايح : هـ...ـــممممم
ساره : قوم نام بحجرتك
محمد فتح عيونه نص فتحه وخذ المخده الصغيره اللي احذاه وحضنها وسند عليها راسه : بعديـــن
ساره : ههههههههههههه شنو بعدين ؟؟...قوووم يالله....عاد حموووود
محمد وهو مغمض : رووووحي نامي
ساره : هههههههههههههههههه
محمد : شفيج هبله ؟؟..روحي نامي عندج مدرسه
ساره : ماياني نوم..منشغله على ابوي وعلى نايف ؟
محمد : هممممممممم..من قلتي..اي...نايف...؟؟..ليش؟؟؟
ساره : مادري..احسه تعبااان..جان تميت عند ابوي بداله
محمد فتح عيونه : لا تخافين عليه مابيموت اخوج الغالي..بالتناوب..باجر دوري
ساره : زين...شرايك لو تروح غرفتك يكون احسن من هني
محمد قام شوي شوي : زين
ساره اللي شافت محمد بعد عن مسار غرفته : هيييييه وين وين يمين مب يسار
محمد ضايع : وين..؟؟.....يمين..اوكي
ساره : ههههههههههههههه صج نعساااان يدور السرير

-------

الصبـــح وفي المدرسه بين الخمس دقايق..كانوا ساره ودانه واقفين في الممر وسط الزحمه..ويناظرون هالبنات..

دانه اللي قالت لها ساره عن فيصل..انه خطبها : هيييييييه ياساره والله وكبرتي وبياخذج فارس احلامج
ساره بابتسامه : خليه ياخذني اول...وبعدين انتي بعد بتتزوجين مابتمين جذي
دانه : الله يســــــمع منج
ساره : ههههههههههههههه..ومن تبين..نيووووفي؟؟
دانه وهي تحوس ببوزها : مب شرط نيوفي..!!!
ساره بغمزه : ها عيل..حمووووووودي؟؟
دانه استحت : بعد مب شــــرط !!!
ساره : يالله عاد عن العياره..مره نايف ومره محمد ماعرفنااا لج..؟؟
دانه بغشمره : يصير اثنينهم ؟؟
ساره وصوتها يمتزج مع صوت الجرس اللي يناديهم للحصه الثالثه : اي معلي تنزيلات..وهم بالمره بياخذون عليج اربع..تعوييييييض
دانه ضربتها على جتفها : وييييييه فال الله ولا فاااااالج


ودخلوا الصف منتظرين بكل شوق الفرصه ومنتظرين نهاية الدوام..اليوم الخميس..يعني وييييك اند..في هاليومين الطلاب والطالبات مايكونون مصدقين نفسهم واول مايطق جرس الحصه الاخيره مايصدقون كل واحد ماسك شنطته ويقول حق الثاني انه اليوم بيروح ذي المجمع ولا اليوم بيروحون البحر ولا المزرعه..وكل واحد يشارك الثاني فرحته..

-------------


العصر بعد الغدا..كانت ساره مجابله حديقة البيت الواسعه..كانت تشوفها من الدريشه اللي في الصاله وفي يدها تفاحه..تفكر شوي..وتقضم منها شوي..ماحست باللي دخل

يوم التفتت : هلاااااااا وغلا
نايف اللي انبطح ع الكرسي بتعب : هلا فيج
ساره : وينك من امس..( وهي تمشي صوبه)...اخووووووي حبيبي..وحشتني
نايف : وانتي اكثر والله..يااختي الحبيبه
ساره وهي تسحب قذلتها وتوديها ورى اذنها : اووووووه شهالحب ؟؟
نايف : اصلا انا احبج من زمان بس انتي ولا مفتكرررره
ساره : ويه..فديتك والله يااحلى اخ بعد جبدي الحين انا اللي مب مفتكره..زين معليه وانا اللي خايفه عليك من امس وااقول اخوي حبيبي تعباااااااان
نايف لما سمع كلمة تعبان..غمض عيونه بتعب..صح هو تعبان بس نفسياً : اي والله تعبان..مارقدت عدل امس..وفوق ذي رايح الشغل بدون ما امر ع البيت
ساره : افا عليك الحين اقول حق ميري تسوي لك احلى غدا واحلى عصير

وراحت صوب التلفون اللي تقدر منه تتصل للمطبخ ويردون عليها..وقبل ماتضغط على الفص...

نايف : مابي غدا
ساره سكرت السماعه : ليش ؟؟
نايف بجذبه : تغديت في الطريج
ساره بابتسامه لاخوها اللي تعرفه زين مازين..لان مشاعرهم متشابهه : اهااااا..على راحتك
تقلب وعطاها ظهره..ساره حست انه بيرقد : روح غرفتك نااايف
نايف : ماعليج..لا تشيلين هم ..انا ومحمد على راسج تعبناج..ولا تنسين تكلمين محمد عشان يوديج عند ابوي..
ساره : انزين روح غـرفــ...
نايف وكنه ماسمع اللي قالته : لا تخلون ابوي بروحه
هزت راسها بعجز وهي تاخذ نفس..شايل هم ابوي بعد..ماكفتك همومك وانك معاه من امس : ان شاءالله


-----------


في المستشفى كل الاخوان موجودين..بو بدر وبدر ودانه وبوعيسى...الغرفه ضاجه بالضحك والسوالف لي مانسوا بو محمد المكان اللي اهو فيه

بو عيسى : الياهل شعندها هني اليوم ؟
دانه : افاااااا عمي لا يكون تقصدني ؟؟
بدر : ليش شايفتنا يهال ؟؟
دانه : عمي انا مب ياااااهل..ارجوووووووك لا تحطمني..انا كبيره..وبخلص الثانويه العامه
بو بدر : توها المدرسه باديه من اسبوع !!
الكل ضحك عليها قالت بمزح وفرحه : فديتكم والله دوووووم ان شاءالله اسمع هالضحك..(تساسر عمها بو عيسى)هيييييييه ياعمي من قدي حولي كله شبااااااااب
بو عيسى : استحي على ويهج هالكثر ميته ع الشباب ؟؟
دانه انحرجت : ويه عمي انت كله تفهمني غلط ؟

ساد السكوت لان محمد وساره وصلوا..محمد دش وسلم على عمامه وساره سلمت عليهم وعيونها مغرقه دموع

بو عيسى وهو يحايط ساره بيدينه ويقولها بود : فديتج والله
دانه خزت عمها بو عيسى بنظرات كلها غيره..توه يقول عني ياهل والحين يتفدا هاااااذي؟؟..معلي
اشاحت ويهها عن عمها بزعل مصطنع التفتت بويها في المكان الغلط..كان محمد يناظرها بنظرات غريبه وعيونه ثابته عليها شوي وتخترق عيونها العسليه..نزلت راسها بضيق بس بحيا
بدر يوم حس بان عمامه انشغلوا مع يعض ضرب كوعه في جتف محمد : شلونك انت زين ؟
محمد انتبه..ووخر عيونه عن دانه وشاف بدر : انا..؟؟..بخير الحمدلله
بدر بصوت واطي : اثقل لا الخك بالعقال
محمد بهمس : شسويت انا الحين ؟
بدر : ماسويت شي يابرئ
محمد بقهر : آآآآخ بس لو اللي في بالك كانت هني مادري شكنت بتسوي
بدر سرح لثواني وتخيل انها لو كانت هني..وابتسم..ورد مره ثانيه لارض الواقع : بس هي مب هني..
محمد : ماسعمت ؟؟ شقلت ؟؟ بس هي مب هني؟؟ يعني لو كانت هني كنت بتسوي اكثر واكثر..وتلووومني؟؟

[bnt aldo7a]

---------

بعد المغرب بو عيسى طلع من عند بو محمد ويليه بو بدر وعياله لين ماتموا محمد وساره عند ابوهم..ساره على يسار ابوها ومحمد على يمينه وهو كان يروي لهم ذكرياتهم يوم كانوا صغار

بو محمد وهو يمسح على راس بنته اللي كانت مسنده راسها على جتفه : تذكرين ياساره ذيج الايام قبل لا ترقدين كنت اقولج قصص لي ماتغمضين عيونج ولما اقوم على بالي رقدتي تفتحين عيونج وتضحكين وتخليني اعيد لج كل القصص مراراً ومراراً بلا كلل او ملل..
ساره بابتسامه حزينه : اي يايبا..اذكر ولا نسيت ولا راح انسى
بو محمد مسك يد ولده محمد اللي كان حاط يده تحت خده ويناظر ابوه بشوق لذيج الذكريات : هههههههههههه عاد تذكر يوم كان عمرك 6 سنينن شريت لك ثلاث نفافيخ وحده زرقه ووحده حمره ووحده صفره وكنت تلعب فيهم جدام اخوك نايف اللي كان يصيح كل مايشوف هالنفافيخ ووو......سكت وشاف حضنه بتنهيده
محمد اللي قوى مسكته على يد ابوه وكمل عليه : ويات امي وبطت كل النفافيخ عشان نايف مايصيح
بو محمد ابتسم وهو يتذكر طيف ام محمد : الله يرحمها
ساره اللي كان دمعها يجري على خدها بصمت مؤلم حضنت ابوها وقالت : ولا يحرمنا منك يانور البيت

محمد استغرب من ابوه..ليش في هالوقت يذكرهم بهالذكريات..بعضها يفرح وبعضها يؤلم وبعضها اثرها مايزول..شتقصد يايبا..؟؟...

ماكانوا حاسين بالشخص الرابع اللي كان يشاركهم ذكرياتهم..نايف..كان واقف ورى الستاره ومتنسد على الطوفه وريل وحده ثابته ع الارض بحزم والريل الثانيه منهده ع الارض براحه ومايله..وماانسى دموعه اللي كانت تنهمر مثل المطر..ذكرياااات ومااجمل الذكريات..غصب على الانسان اذا تذكر شي حلو..بس فنقش وراح..يبكي..يبكي.. دموع فرح من الايام اللي شذى عطرها لازال بينهم..ويبكي دموع حزن على اللي راح ومابيرجع..


-------


في بيت بوفيصل..حول صفرة العشا..كانت ام فيصل قاعده مع ولدها يوسف وهو متضور جوعاً..بياكل الاكل بعيونه لان امه ماتخليه ياكل بحلجه

يوسف مد يده ع الاكل الا ياته ضربه من امه : هد الاكل
يوسف بحزن على بطنه : يما شفيج الله يهداج ؟
ام فيصل : ماتاكل قبل مافيصل ياكل معانا
يوسف فهم عليها وخذ نفس لين ماملى صدره بالهوا وامه مستغربه وقااااال بصرخه : فــيـــــصـــــــــــــــــــــــــــــــــــــــل .. عـــــشـــــــــــــــــــــــــاااااااااااااااا
امه بتكشيره وهي تسد اذونها : ويه ويه اذني ذبحتها شهالصراااااخ؟؟ لا بارك الله فيك بصير صمخه في هالبيت والسبه انت
يوسف شوي ويصيح : يما ماتسمعين عصافير بطني تزقزق..شفيج يما..العصافير يوعاااااانه تبي هم هم..تبي يم يم..تبي تززززط
ام فيصل : روح ناد اخوك اول وعقب اطفح
يوسف وهو يقوم : علــــــى أمرج يااحلى بريطانيه في العالم..الحين اييب لج حبيبج فصول وايره من شعره

راح له وطق الباب..مانفتح..فتح الباب ولما دش شاف الغرفه مظلمه مامنورها غير نور الابجوره الهادي وموسيقى كلاسيك ترقص المشاعر..شاف فيصل منسدح ع السرير ومغمض عيونه وطبعا لعانته ماسمحت له انه يهد فيصل في حاله : هلاااااااااا بالمعـــــــــرس
فيصل نقز بخرعه : يعلك بمره ميهوده تخليك تطبخ لها وتغسل قوووووووول آميييييين
يوسف : تخسي الا هي...اقول يالمعرس..ام المعرس تبيك تقولك عشــــــى ولو سمحت قوم بسرعه ابي آكل
فيصل وهو يحك ذقنه : خربت علي الجو الشاعري
يوسف : من الحين جو شاعري وخرابيطه..؟؟..حلمااااان وايد ياخي هذا وتوكم بس كلام
فيصل وهو يسكر المسجل : باذن الله الحلم في يوم من الايام بيصير واقع وحقيقه..
يوسف وهو يعد الثواني : ان شاءالله..فز يالله
فيصل : ههههههههههههههه حاس فيك والله ..الا اقوووول
يوسف وفي طريقه للباب مع اخوه : قووووول
فيصل : اسمع اصوات من وين.؟..لا يكون من بطنك
يوسف بصرخه : يمااااااااا لحقي علي ذبحتيني خليتيني اموووووووت جوعاً وفاصوليا مالتج حيه ترزق
فيصل : ههههههههههههههههههه مافاصوليا الا انت
يوسف : شتبين اخت فاصوليا ..؟؟..(بغرور)..انا جــــوزيف محد يقدر علي

-------------


وبدأت احزان قلبي بالانتقال من حزن لآخر..حزن ساره انتقل لنايف...ومن نايف لمن بينتقل...؟؟
اتمنـــى ان الجزئين نالوا على استحسانكم..وابي اشوف آرائكم وتعليقاتكم

[تكفيني الذكرى]

والله كلمة روعه ماتوفي الموضوع حقه والله ..
ابداع × ابداع اختي بنت الدوحه ..

تسلم يدج هلى هالقصه الطويله ..

صراحه يعطيج الف الف عافيه ..

مجهود عضلي وخرافي ..


تقبلي تحياتي

أخوج .. تكفيني الذكرى