قصه قطريه في منتهى الروعه ((احزان قلبي))

[الأمورة]

ترى ما فيني شده أنطر نهايت القصة يلا كمليها ....

[الأمورة]

بنت الدوحة وينك كمليها يلا عاد

[تكفيني الذكرى]

القصه روعه قريت منها الي قدرت عليه

كل يوم بقرا شووي

صج تأثر


يسلمووو بنت الدوحه

والله جهد تشكرين عليه صراحه

يعطيج الف عافيه


أخوج ( مخاوي الليل )

[أخاطب القمر]

يعطيج العافيه اختي القصه لين الحين روعه وننتظر التكمله


ويعطيج العافيه على المجهود بس شدي حيلج وكملي لنا القصه

[bnt aldo7a]

فيصل اللي كان يدور في الشارع اللي كان عند الفندق بالضبط وهذا الشارع فيه عرب وفيه انجليز وفيهم بعد مطاعم عربيه..يعني الواحد مايحس انه في اوروبا بهالشارع والجو البارد اللي كان يطير خصلات شعره البنيه ويغزيها كان يفكر.. ذيج البنت شافها اليوم الصبح ومن بعد ذاك الموقف ماوده يشوفها.. بس غريبه !!.. صار له اسبوع وهو يمكن مايشوفها الا باللوبي في الفندق ولا بالصدفه في الشارع ..هي واخوها بس ابوها وينه؟؟؟ ماله شوفه ولا حس .. وساره دوم تطلع الصبح او الظهر وترد على المغرب ..في شي ؟؟؟؟ مايدري شسالفه وابعد افكاره عنه لانه شاف كشك في ورود وزهور اشكال والوان تفتح النفس.. وبعضها يدل على الرومنسيه والحب وبعضها يدل على الوفا وبعضها على الصداقه وفي منها على الصفاء والراحه..كلم المره اللي تشتغل وطلب منها تسوي له باقة ورد مكونه من وردتيت وحده حمره ووحده بيضه وتلفهم بطريقه حلوه وجذابه ..ولما انتهت خذ بطاقه وكتب عليها بيت من الشعر ..واخر شي توقيعه الا وهو اسمه ..وعطا فلوس حق المره واتجه للفندق ..

**********

على الساعه 8 نايف رد البيت وصل ساره وغير ملابسه وطلع وشرى له كم من جريده عشان يقراهم في المستشفى عند ابوه ..اليوم اخر يوم يبات بالمستشفى..هالمستشفى محد يقدر يرتاح لها وعيل شلون في المبيت ؟؟؟؟ بس لعيون
ابوه صار يعرف كل شي عن هالمستشفى اسبوع وهو هناك بقرب ابوه ..

ساره كانت في الفندق تتصفح المجله وتاكل التفاحه وتهزز ريلها.. وبهالمجله كانت في طرق تعليم الميك اب والازياء وساره تموت على هالاشيا بس ماقطع حبل افكارها الا رنين الجرس اللي ازعجها..خافت نايف موصيها انها ماتفج الباب بس الجرس مب راضي يسكت..مشت بخوف لين الباب وتسلل نظرها في (العدسه السحريه ) شافت بس مافي حد..
اكيد يهال يلعبون ولا احد مغلط ..ردت لمكانها وقعدت تقرا وتقرا وتقرا وصفحات المجله كانت ترد لورى ..بسبب الدريشه اللي فتحتها ساره عشان تهوي البيت وتجدد الهوى ..وخصلها اللي كانوا يتطايرون..

اندمجت مع المجله .. ليمااااا ازعجها الجرس مره ثانيه..لا هالمره لازم تلبس شيلتها وتطلع حق اللي عند الباب لو من يكون..شنو هالازعاج وين قاعدين احنا ؟؟؟ ..خذت شيلتها وحطتها على راسها ولفتها..وفتحت الباب بهدوء وبخوف ماشافت حد بس حست بشي تحت ريلها ..واول ماشافته لقت باقة ورد حلوه وشكلها جنااااااان ..وماهي الا ثواني وسمعت صوت باب يتسكر !!
يعني في حد دش شقته في هالطابق ..ورجعت للورده..
التفت يمين ويسار يمكن احد مغلط ولا ناسيها هني..اففففففف مافي حد..يعني من ذي اللي حاطها جدام شقتنا وجذي بعد بدون شي يوضح من يكون ؟؟ بس انتبهت لبطاقه كانت معلقه في الباقه ومكتوب عليها ( ان كــان بالغلا والاخلاص توفي لي .... اوعدك مااضيــع الاخــلاص واوفي لــك ..) وبالنهايه اسم المرسل ( فيصل )

دشت وسكرت الباب وراها والباقه في يدها.. فيصل.. ذاك الشاب اللي ساكن في هالطابق ودوم تشوفه ..هل يعقــــل ..هوووووو ؟؟؟ هو مبلى انا متاكده انه هو .. هالطابق مافيه عرب وايد ومااشوف احد في هالطابق غيره.. اي هو بس ليش مطرش هالباقه ؟؟..وباحساس غريب يسري فيها وهي تعيد الابيات اللي كاتبها..اللي كان فيها وصف للوفا والاخلاص.. ناظرت الورده البيضه كانت حلوه بشكل وتخلي القلب يبتسم لها لما تنشم ريحتها.. اللي كانت تدل للوفا ..
وفـــاا واخــلاص.. وفــا واخــلاص.. وفــا واخــلاص .. ..هالكلمات ترددت في بالها بقووووووه.. ليش ياربي اخلاص ووفا؟؟؟؟ .. .يمكن مايكون هو اللي في بالي ؟؟؟؟ بس احساسي يقولي انه هو ومحد غيره ..شسوي في الباقه ؟؟؟ وين اقطها ووين احطها..والله لو بيدي جان قطيتهم وبالزباله لانها من الحمار اللي مايستحي يطرش ورود بعد على باله بنعجب فيه والا بطلع له..... وسكتت.. بسبب الشعور اللي كان يمنعها من انها تزيد شتم فيه.. جنه لسانها انربط ومنعها من انها تزيد كلمه شينه عنه او فيه .. بس مايصير اقبل هالباقه وحرام اقطها هذي مخلوقات مثلي ومثل غيري..بس فيصل !! اوووووووه وردت تفكر مره ثانيه في هالانسان شالدافع انه يطرش لها ورود حمر وبيض واذا لهم مقصد.. شمعنى ؟؟؟ بس الســؤال ليـش مطـرش..

التفتت للدريشه اللي خلت الشقه متجمده من البرد وراحت صكرتها بكل هدوء بس برجفه..يمكن عشان البرد ؟؟ وردت مكانها وحطت الباقه جدامها على الطاوله..لمت نفسها ومسحت يدينها ببعض عشان تدفي نفسها من عقب هالبرد والمشاعر العاصفه.. وناظرت الباقه والغموض بعيونها.. والآف الاسئله تجول ببالها ..
ليش احس بهالاحاسيس اللي بتفجر قلبي وهي تدور بداخله..من يكون؟؟ من اللي لما دريت بسفرنا القريب ضاق صدري بسبته ؟؟؟ من هو فيصل ؟؟؟ من هالانسان اللي كل مااذكره انسى همي وحزني..من اللي يرجف جسمي بس بمجرد ذكر خياله ؟؟؟؟؟؟..


فيصل اللي كان متوتر بشكل فضيع ومحرج من اللي سواه ..شهالجرأه اللي طلعت..عمره ماكان متوقع انه يسوي هالشي ويطرش لها باقه.. مع بطاقه وفيها بيت من الشعر عن الوفا ولا بعد يقولها بوفيلج واسمه بعد..شهالحااااله شلون بقدر اشوفها مره ثانيه ؟؟؟؟ هذا اذا قبلتهاااااااا وماحذفتها في ويهي..

في البدايه كان معجب في جمالها وشكلها الملفت..لانها كانت تطلع بعبايتها مع انها تقدر تلبس شي محتشم بس طلعت بعبايتا..وبعدين صار يشوفها عدة مرات وفي كل مره يحس بشي ..مره في انها حلوه وجميله وماتحب تعطي ويه..مره في انها شي عادي ممكن يشوفها دوم وبالصدفه ولازم يتعود..مره في انها شي كبير ولازم الواحد يحافظ عليه ويقدره..مره في انها شي غالي وصارت من الاشيا اللي يفكر فيها يوميا .. والحين هالورود اللي مايدري شلون مشاعره قادته وخلته يودي لها هالباقه..فيصل صار مثل الذبان..يدور في الغرفه وفي كل زاويه وركن وهو يردد نفس السؤال يسال نفسه ويبي يلقى جواب عشان يرتاح ..

من هذي من هي؟؟؟.. من هالبنت اللي خلتني اصير حبيس الفندق بس عشان اشوفها.. من اللي خلتني اسير افكاري بسبتها.. من ؟؟؟؟؟؟؟..اللي خلته ينسى خيانة انسانه حبها بكل مافيه ومن الصعب نسيان اللي سوته معاه ..من ؟؟؟؟؟؟

[bnt aldo7a]

الجــــ السابع ــــــــــــــــــزء



عيون بو بدر اللي كان يراقب بوبابة القادمين في المطار.. شاف ولده بدر مع محمد واثنين من ربعه وبكل فرحه راح لولده ..

بدر اللي كان في قمة السعاده السبب الاول في سعادته والرئيسي .. انه رجع لاهله وربعه وديرته وشوفة ابوه في استقباله بحض حنون ومرحب في كل لحظه ..ومن عقب هالفرحه برجوع بدر اللي جنه مهاجر.. مب سفر ذي اسبوعين ومتوله على ولدك جذي يا بو بدر ؟؟؟؟


في بيت بو بدر .. ام بدر ماقعدت ثانيه من امس وهي تبخر البيت وتعدل غرفة بدر وتدعي ان الله يوصله بالسلامه..ماتنلام ماعندها غير بدر الله يحفظه.. الولد الوحيد بالاضافه لبناتها الله يخليهم .. ولما توجهت عقارب الساعه اللي كانت في الصاله.. الي الساعه 10
.. دخل بو بدر البيت ومعاه بدر ومحمد وكانت ام بدر تنتظرهم ..والتوام بغرفهم ينتظرون موعد العشا عشان يكونون متواجدين مع اخوهم ..

ام بدر وهي تحظن بدر : حمدلله على السلامه ياوليدي تو مانور البيت ..
بدر : منور بوجود اهله يا يمااا وحشتيييييييني .
ام بدر بشوق لولدها : وانا ولهانه عليك ليش تاخرت جذي ؟؟؟
بدر : وين تاخرت كلهم اسبوعين ورديت لج وبقعد على قلبج الصيف بطووله ..
ام بدر : ياقلبي والله (انتبهت لمحمد اللي كان واقف عند الباب ) هلا محمد تعال يمه ..
محمد بخجل مايدري شفيه اليوم : هلا فيج خالتي شلونج شخبارج ؟؟؟
ام بدر : بخير يما والله تولهنا عليك وعلى غشمرتك وسوالفك
محمد بفرحه وهو يسمع كلمة (( يما )) من مرت عمه ..فعلا هي كانت بحسبة امه والله يعلم غلاتها بقلبه وخصوصا انه مطيح كل يوم هني : وانا اكثر ياخالتي متوله على اليلسه معاكم وعلى الدوحه .
بو بدر : يالله عيل اخليكم لا تنزل دموعي الحين بروح اييب شناطكم ..
بدر : لا يباااا انا بروح اييبهم ..
محمد نط وبحروف متتاليه سريعه : عنكم انا بروح .. ولان شنطتي وشنطة بدر متشابهين اخاف تخربط بينهم وبعدين ارد البيت بثيابه ..
ام بدر : لا يما من قال انك بترد البيت ؟؟؟
محمد ونظرته تغيرت مع انه متعود يبات هني : عيل ؟؟؟؟؟
بو بدر : بتبات هني
بدر بفرحه : ايووووووووووووووه حموووووووووووووود
محمد وعيونه على بدر المتشقق ماوده الا كف يعوي حلجه : لا عمي مابي اثقل عليكم
بو بدر : بالعكس يا يبا انتونس اكثر بوجودك ..
محمد اللي يبي ينهي هالحوار لانه يدري عقب ثواني كل البيت بيحنون عليه وبحجه قال : الله يخليك عمي.. بروح اييب الشناط ..

واول ماطلع من الباب دشت دانه الصاله وشافت اخوها وفرحت وماكانت تدري ان محمد عندهم

دانه بخطوات سريعه راحت لاخوها بابتسامه وفرحه وهو وقف لها : حمدلله على سلامتك بدووووووووور ..
بدر : الله يسلمج دنوووووي اخبارج ؟؟؟
دانه : تمام ( وبخبث مبكر ) بس بصير تماااام التمااااااام اذا عطيتني صوغتي ..
بدر بنظرة احباط لدانه : ايا العياره يعني تبيني ارد بس عشان صوغتج ؟؟؟ الله يسامحج هذا وانا اخوج حبيبج ومشتااقلج ..
دانه : ووييييييييييه .. الا عاااد البدر لحد يقرب صووووبه فديت هالويه انااااا والله تولهناااا عليييك ..


المشكله او الفشيله او اللي يسمونها.. ان محمد دش الصاله بس مالاحظ وجود دانه واول ماشافها ولااا بدون شيله .. رد بخطوات سريعه وطلع مثل مادخل بس دانه اللي ماسكتت وباحراااااااج زايد قالت لاخوها ..


دانه بتهجم : انت شلون ماتقولي ان رفيجك هني ها يالثور ؟؟؟
بدر مسكين شذنبه : يالبقره والله نسيت من شفتج بس نسيت انه هني !!
دانه : مالت عليك وقت العبط الحين ..
بدر : انزين خلاص حصل خير ماصار شي ليش معصبه ؟؟؟
دانه بشرررر يشع من عيونها : انزين معلي !! حصل خير !!! روح عند رفيجك يالثوووور
وطلعت وهي مووووولعه .. بس معلي ثواني وكل شي يرد مثل ماكان عادي بالنسبه حق دانه هي الحين معصبه وتتحلف في بدر بس عقب ساعه بتكوووون راااايقه ..


بدر لحق على محمد لا ياخذ شنطته ويشرد عنه ..واول ماطلع شاف محمد بعيد واقف بزاويه ومستند عليها ومدنع راسه .. اكيد يفكر خل اشوفه اعرفه مايحب الفشيله هالريال ..

محمد اللي ماكان يعرف اي شي او بالاحرى .. ضاااايع ..اول مادخل ماشاف الا الويه البرونزي والشعر الكستنائي والضحكه اللي كانت تعلو ويه دانه قبل لا يدخل محمد.. ويسود الصمت .. في ذيج اللحظه درى محمد ان مكانه غلط ورد لورى بدون حاسيه ومشى بخطوات متوتره ليما ابتعد عن البيت ..لان بيت بو بدر صغير بس الحووووش كبير واللي يمشي فيه يضيع ..

ولما وصل بدر : محمد حياك داخل ؟؟
محمد رفع راسه : بروح البيت ؟؟
بدر : ليش ؟؟؟ اذا على زوجتي معلي ماصار شي يالله تعال خل نرد داخل بيحطون العشى ؟؟
رجع حق سالفة زوجته : اللي خذتها عرفي ...؟؟
بدر : هههههههههههههههه ايه هذي فديتها
محمد : عيل اخليك.. انت روح لها ولا تهدها مايصير جذي عيب بدووووور ..( كان يتكلم على اساس انها اخت بدر بس بدر حاط في باله ان محمد يتكلم على اساس انها مرته )
بدر باستغراب رفع حواجبه لفوق : شنو ؟؟؟ من صجك انت يالله تعال لا تذلني ..
محمد : لا مذله ولا شي .. يالله ( شل شنطته اللي كانت عند ريله ) تيك كير فديتك واسف والله ماكنت ادري ان مرتك داخل ..
بدر : معلي حصل خير اصلا انا الثور نسيت اقولها وهي بقره بعد شسوي ..
محمد بابتسامه يطمن بدر فيها : خير انشاءالله .. يالله عيل ولا تنسى باجر العصر تمرني اوكيه ؟؟؟
بدر : انشاءالله .. بس والله مب حلوه محمد تعال تعشى والله ابوي ناطرنا .. ؟؟؟
محمد مبتسم : سلم على ابوك وقوله محمد تعبان وبيرجع البيت يريح .. وانشاءالله مره ثانيه
بدر لما شاف ان محمد مشى عنه : مع السلامه ..
محمد : الله يسلمك ودير بالك على مرتك ..

محمد اللي راح عن بدر وخلاص في حيره .. دير بالك على مرتك ؟؟؟ شنو يعني ؟؟؟؟ دانه ؟؟؟؟؟ وهو يقصد شي ولا بس جذي يستعبط ؟؟؟؟ اوووووووووه صج اني غبي محمد مايفكر بهالطريقه والله اني ثووووووووووور بطنى اصواته من اليوع وصلت اخر الفريج وانا واقف هني افكر .. اروح عند ابوي لا يحط في باله ويحاتي ..

************

نرررررررد حق الاسئله اللي كانت تجول في بال كل من.. ساره وفيصل وكانت السبب الرئيسي للي صاير في قلب ساره وعقلها اللي توقف عن التفكير وعقل فيصل اللي ماتوقع هالجرأه منه عشان سالفة الباقه ..

اول شي بجاوب على اسئلتج ياساره .. شوفي
الاسم : فيصل بن حمد
العمر : 23
مجال الدراسه : انجليزي ..

هذا اللي تبينه ؟؟ هههههههههههههه .. لالا اتغشمر معاج !!.. شوفي .. فيصل اللي يوم من الايام كان يطق عليج الباب وكان يترنح وياه اخوج وادبه شوي وعطاه كم من كلمه .. قدر يوم من الايام انه يطق باب قلبج ويدخل فيه ويتغلغل باعماقه .. بدت تتوالى الصدف في انج تشوفينه وفي ايام قليله وكل مره تشوفينه فيه.. كان يشيل من الهم اللي حابسته في قلبج..قدر يراويج الحياه ويقولج ( الحياه حلوه ).. ويقولج هالعباره.. (ابتسم للحياه..الحياه تبتسم لك ) ..
يعني كل اللي عليج انج تفرحين وتنسين اللي مضى وتولين له ظهرج .. وتشوفين المستقبل وحياتج ..فيصل .. هالانسان قدر يسيطر على افكارج وياخذ كل اهتمامج .. قدر ياخذ قلبج الصغير..وامس سوى حركه يمكن تكووون جريئه زياده عن اللزوم .. الا انها يمكن قدرت توصل لج احساسه اتجاهج .. ورغبته في انج توفين له وتخلصين له .. وهو بالمقابل ماراح يضيع هالشي ابد ..


فــهــل تلـبــيـــن ..؟؟؟؟؟؟

ها فيصل شخبارك مع التوتر عسى بس راح عنك ؟؟؟ مثل مارديت على ساره راح ارد على اسئلتك اللي سالتها عن ساره وهي من تكون .. الظاهر او الواااااضح ان لها تاثير كبير عليك لانك كل ماتشوفها تتوتر وترتبك جنك داش في امتحان ومب دارس له .. ساره خلتك تقعد بالفندق وماتسوي شي غير انك تجلس في الكوفي تنتظر خيالها يمر جدامك .. ساره اللي استحوذت على افكارك وخلتك تنسى الخمر وهذاااا اهم شي.. وخلتك تشوف الدنيا بعين ثانيه .. خلتك تجابل صلاتك ..وتدعي ربك .. وبهالشي دخلت الفرحه لقلبك ونسيت اللي مابي اذكرك فيها ..

بس ياترى يافيصل .. هل انت راح تسوي الكلام اللي كتبته لها في الكارد ؟؟؟ وبتكون قده ؟؟؟؟؟

طل الصبح على لندن ودخلت خيوط الشمس في غرفة ساره ونورتها وانبأتها بيوم جديد .. يمكن يكون به فرح وآمال تنبني اكثر واكثر في قلب ساره الصغير .. وتكبر اكثر واكثر افكار واحاسيس جديده عليها .. وبعد.. مشاعر غريبه وعجيبه راح تكتسح قلبها اللي عمره ماعرف هالمشاعر .. له خيارين .. يتقبلها بكل هدوء وراحه وسعت صدر .. او .. مايتقبلها ويمكن اذا ماتقبلها ينعكس عليه التاثير السلبي ويشعل النار في الجوف .. ويبني افكار .. ويسيطر على المشاعر ويهدم اللي تكوَن بصعوبه في بال ساره واللي يمكن هي ليما الحين مافهمت هو شنو .. يمكن لانها اول مره تجربه ..

ساره اشك انها اليوم ماراح تقوم .. الساعه متاخره .. يمكن بالنسبه لكم مب متاخره بس بالنسبه لساره اللي كان تقوم كل يوم بعد شروق الشمس .. مانامت الا شوي .. او عيونها امتنعت من النوم واستسلمت حق الافكار والاحاسيس اللي كانت تسيطر عليها امس .. وزياده على الاسئله اللي حاولت تطلع لها اجوبه بس ماقدرت..وافكارها ماخلتها تفكر بشي ولا تسمح لاي شي بالدخول لعقلها او حتى التعرف على اللي يجول في بالها .. الا طبعا اللي سمحت له .. فيصـــل ..

نايف من نص ساعه وصل الشقه وترك ابوه في المستشفى.. يبي ياخذ له شور وياكل له لقمه ومن عقبها يودي ساره ويلفها شوي في السوق .. وبهدوء تام فتح نايف باب غرفة ساره .. ودخل على اصابع ريله ..وماطلع منه ولا نفس .. لا تحسبون انه مايبي يضايق ساره لاااااااااا شوفوا شبيسوي ..

نايف بهمس : سااااااااااره ..
وساره اللي ماسمعت همسه لانها كانت مغطيه نفسها من فوق لين تحت باللحاف تهربا من اشعة الشمس اللي ضايقت عيونها ..
نايف علا على صوته بشكل مززززعج : ساااااااااااااااااااااااااااروه خلصتي رقاد لندن قووووووووووووومي يالله ..
ساره اللي صوت نايف ازعج طبلت اذنها : اففففففففففففففففف
نايف يخشن على صوته ..مكرفون هالصوت ماشاءالله : افففففففففف يطيرج قووووووووومي يالله يالعنز ..
ساره شلت اللحاف من على ويهها : تدري ؟؟؟
نايف بابتسامه الصباح ويهه الحنطي مشرق : شنو ؟؟؟؟؟
ساره بنظره يمكن نايف تعود عليها لانه دوم يضايقها على الصبح : انك حمار وجليل حياااااااااااااااااااا !! ( وردت غطت وييها )
نايف : افاااااااااااا هذا وانا اخوج اللي اموت عليج ويايج من الصبح وحيلي منهد بس عشان اطلعج ..
ساره شلت الغطا مره ثانيه : ايـــه يالبرئ ؟؟؟ على مااظن هذا مو اسلوب حضاري تقومني فيه ... في طرق ثانيه وايد .. ويالله عطني مقفاك ولا تنسى تسكر الباب ..
نايف : اسلوب ثاني ؟؟؟ يعني اييب لج الطبل واسندر راسج فيه لين ما تقومين .. ولا اصب عليج قلاص ماي ثلج عشان تصحصين يابرنسيسه ؟؟؟
ساره ماردت بس نايف بيخليها تنقز الحين : ساره ماما تدرين ان الساعه 10 وابوي اليوم في الليل بيطلع وانتي لين الحين مارحتي تشترين خرابيطج ؟؟؟
ساره انقزت وعيونها مفتوحين ع الآخر : جذاااااااااااااب ؟؟
نايف ابتسم لها ابتسامه عريضه .. الا ساره قامت ولبست نعالتها ..: ماااااااااااااصليت الفير ..
نايف : ايه ياام كشه ماصليتي هاه ؟؟؟؟ يالله اشوف جدامي ع الحمام وبسرعه دقايق وابيج تكونين في الصاله زييييييين ؟؟
ساره اللي دخلت الحمام وتوضت والباب مفتوح : انجلع برع لو سمحت ..
نايف يحوس ببوزه .. مسكين يكسر الخاااااطر هالفقير محد معطيه ويه ومقدر اللي يسويه عشانهم : انشا ءالله على امرج

[bnt aldo7a]

من عقب ماصلت ودعت ربها ودعت للمسلمين والمسلمات بالمغفره ..طوت السجاده وحطتها على السرير ..راحت للكبت واول مافتحته تمت تناظر ملابسها وهي تحك راسها بحيره ..ماتدري شتلبس ..اليوم الجو مبين من الدريشه انه حلو ومافي غيوم ولا رياح بس بعد بااااااارد وانا مااقدر عليه ..اممممممممم.. بطلع بدون عبايه ..اليوم اخر يوم لي بلندن ابي استانس واطلع بدون عبايه .. وبجذي طلعت لها بنطلون رصاصي مخطط بالاسود ..وآندر وير رصاصي خفيف شوي.. وجاكيت طويل لين الركبه ..اسود وفيه حزام في الوسط ..لبست اللبسه وكانت راقيه وااااايد ..يعني هي هالمره مب لابسه سبورت كعادتها ولا جينز ولا شي دفش.. لابسه شي راااقي.. يااااااااعيني عليج ياسويره في الملابس محد قدج ..لبست على اللبسه بوت وكعبه ضعييييف وشيلتها السوده طبعا ..حطت لها كحل داخل العين وقلوس بني فاتح يلمع شفايفها ..وخذت شنطتها وشيلتها وطلعت لاخوها اللي لقته في الصاله ..

نايف اللي شاف ساره بدون عبايه بس ماعلق.. هي لابسه شي يحشم والوانه غامجه وماتلفت.. بس رقيها وكشختها يلفتون .. بس بعد .. نايف كان كاشخ هالمره واكيييييد مثل كل مره..كان لابس بنطلون بيج برمودا عليه بلوزه كحليه وكمها طويل وسويتر بيج .. وكااااب كحلي .. وجوتي رياضه طبعا عشان المشي ..

ساره اللي شافته من فوق لين تحت وهو يفرفر بقنوات التلفزيون : همممممممممم كليت ؟؟
نايف : اي الحمدلله سويت لي ساندويتش ع السريع
ساره حطت شنطتها ع الكرسي : زين عيل انا بسوي لي نسكافيه وتوست ..
نايف اللي ثبت على قناه : بسرعه الله يخليج ..

***********

في الكوفي اللي في الفندق كان هالشاب الوسيم بو نظرات وعيون خضر ..يشرب الكابتشينو على رواق ..وشوي رشفه من الكابتشينو و لقمه من السويت اللي طلبه .. وعيوونه على مجله شعر انجليزيه .. يحاول ينسى انه جرئ ..مااااااااااالت علي مابي اتذكر اللي صار جرئ وحمار صج مااستحي ..الحين شبتقول عني والله راسي بينفجر ..اااااخ من امس وانا بالي مب مرتاح ..شله عطيتها ويه اوووووووف .. يوم انسى البنات ارد افكر.. وفي من ..فيهااااا ..
والجو اللي حوله كان جمييييل والكوفي ممتلأ بالجنس اللطيف واغلبهم خليجيات طبعا .. وهالفيصل مايبي يتحرك من وسطهم .. مب عشااااااانهم لااااا هو كان يتنظر شوفة ساره .. بدون احساس كل يوم ايي الكوفي بهالوقت وساعات يشوفها .. وساعات لا ..

بس الحين ايه .. الحظ ابتسم له وشافها تمشي مع اخوها الظاهر واللي عرف ان اسمه نايف ..بس هي شسمها مايدري ..المهم .. مرت بطوات جنها اميره ..لمحته بالكافي وبعد لمحت عيونه اللي كان تراقبها بحذر من ورى المجله .. ماعطت اهميه لانها مانست اللي يواه امس ..مايستحي يبي وفا واخلاص اوريك الحين الحقراااان على اصوووله ..وشوري رفعت خشمها ومشت بغرور مع انها متواضعه ومو من صفاتها الشينه الغرور ابد .. بس ساعات الواحد يضطر يغتر ..ولو باصطناع الغرور ..
فيصل اللي كان محتررررق.. هالبقره تمشي جذي ..مالت عليها ليش ماطالعني .. لا والله اللي صار امس مو عذر ..مع انه عن ميت عذر بس يااااااناااااااس .. طالعه بدون عبايه من سمح لهااااااااااا ؟؟ وشلون ؟؟؟ خير يابنيه بتشوفين اليوم شبسوي ..

شناوي عليه فيصل ؟؟ شكله بدا يغاااار .. وغيرته مابتوصله للي يبيه ..

رن جوال فيصل .. طلعه من جيبه واول ماشف اسم المتصل ابتسم ورد ..فيصل :
HI ther ... تمام التمام ولله الحمد ... how about u ???...aha.... good...mmmmm..let me see
... ok at 9 ???... perfect..ok honny... see u too night ...

واغلق الهاتف الخلوي ..من كان يكلم ؟؟؟ ربع كلامه عربي وثلاثة ارباعه انجليزي !! ومن الشخص اللي بيلتقي فيه ؟؟؟؟ مايندرى شبتسوي يافيصل ؟؟؟

في قطر الساعه 2 .. في لندن 12 الظهـــــر

كان محمد قاعد في الصاله الفوقانيه والريموت بيده اليسار وعصير برتقاااال طبيعي ولا احلى بيده اليمين ..بروحه في البيت ..مسكين يكسر الخاطر محد عنده غير الخدم والهدوء يعم المكان والسكون يلفه والملل يحوطه .. مافي الا يتصل في بدور ويجدم موعد اللقاء بينهم واللي تحدد انه يكون العصر..

رفع السماعه واتصل على بيت عمه ورشف كم من رشفة من العصير ليما حد يرد ..

وردووووووووووواااااااا

دانه : الووووووو
محمد شرررق وقعد يكح .. حط العصير على الطاوله عشان يركز والكحه موجوووده ..
دانه اللي ماتدري من المتصل : صحه .. ؟؟
محمد وويهه محمر من الكحه : على قلبج ..(وبأدب غير طبيعي ) اختي بدر موجود ؟؟؟
دانه اللي تصرقعت اول ماسمعت صوته ..شفيه ذي انساااان غير طبيعي : اي اخوي لحظه ..

وبالصدفه بدر دش الصاله وعيونه منفخه ومن تاثير الرقاد مايعرف وين يمشي جنه سكران..

دانه اللي اشرت حق بدر بسماعة التلفون وقالت حق بدر : هلا والله.. شهالكشه العجيبه يااااااااعمري عليها والله افتقدتها ..
بدر اللي رد عليها ومحمد مستمع ومستمتع ايضا بسماع هالحديث..

بدر : والله كشتي بعد اشتاقت حق كشتج المنتفه من الصبح.. اللي جنها ريش دياي مع ويهج ..

وخذ السماعه وهو يتثاوب : الووووووو ..
محمد : ووووووع عليك جذي تكلم الناس الله ستر اني انا ؟؟؟
بدر يمسح عيونه : سامحني ياخي توني قاعد والله مادري بالدنيا تعبان هلكان ..
محمد : امممممممم بدور تقدر تروح تعدل كشتك وتكشخ واتي عندي ؟؟
بدر : ليش ؟؟؟؟
محمد : عازمك ع الغداااا !!!
بدر : على حسابك ؟؟؟؟؟
محمد : روح زين من صجك.. تعال عندي متملل ولاااااااا تخاف على بطنك الغدا زاهب بس انت تعال وطلعة العصر بنجدمها انشاءالله ..
بدر : خير انشاءالله .. مسافة الطريج وانا عندك ..
محمد بالمصري : ياحبيب البي واللهي ياقمر اقصد يابدر.. واللهي انا ماعرفش من غيرك كنت هاعمل ايه ؟؟؟؟ كنت حموت ؟؟؟؟ هاتصل فيا حاجه كده ولا كده .. ياحبيب البي يالله بسرعه جهز وتعال ..
بدر اللي مستغرب من محمد دوم يتحجى مصري : متأثر ؟؟؟؟
محمد : وااااايد والله .. يالله بسررررعه بدور ..
بدر : انشاءالله انشاءالله ..بااااي ..
محمد : باياااات ..

**********
ونطير الى عاصمة بريطانيا.. لنـــدن ..

ع الظهر نايف لف ساره ودورها في السوق وساره ماقصرت كسرت ظهره على قولتها هذا اخر يوم لهم بلندن ولازم تتدلع شوي .. ومن عقب السوق راحوا تغدوا بطعم ..فاست فود طبعا .. وع العصر راحوا عند بو محمد وقعدوا عنده ساعتين .. ولما نايف لاحظ ان ساره بدا الخمول يشتغل عندها وراسها شوي شوي يميل وبالنهايه يطيح قال لازم يرجعها الفندق .. كسرت خاطره ..والله انك طيب زياده عن اللزوووووم يانايف ..

ساره اللي نزلت من التاكسي اللي وصلهم من المستشفى لين الفندق .. وشي اكيد ان نايف قطها وراح عند ابوه لان بالليل بيرخصونه .. مشت ساره من البوابه وكل املها ان توصل حق الشقه وتفتح الباب وطيررررررااااان ع السرير.. صج لي قالوا.. النوم سلطااان.. وفي طريقها شافت ولد صغير .. مب غريب عليها تعرفه ..ملامحه تشبه احد ..ومجابلته بنت ..بس كانت معطى ساره ظهرها ..وساره ماتعرفت عليها ..بس لا ..الولد مو غريب .. واول ماراااح الولد عن البنت عرفت من ذي ..راااااشد اخوووو عاااشه ..

ساره من عقب ماشافت عاشه مايصير تروح بدون ماتسلم مب حلوه : احم ..عااشه ..
عاشه اللي التفتت يمين ويسار بس مالقت اللي تناديها ..
ساره : هني ..ورااا ..
والتفتت عاشه واول مالتفتت انرسمت على شفاتها ابتسامه فيها بعض من الاندهااش : هلاااا سرووووي اخبارج ؟؟
ساره بابتسامه ويدها تقطعت من الخرايط اللي بيدها : تمام الحمدلله ..انتي اخبارج ؟؟
عاشه : انااااا ؟؟ يالمختفيه مالج حس ولا خبر.. جذي عاد ؟؟ بنفس الفندق وجذي ؟؟؟؟
ساره المفتشله : والله عوووش ظروووووف ؟؟؟
عاشه ظيجت فتحة عيونها : مثل ؟؟؟ شي واحد يخليني اقتنع.. والمشكله التلفووون ياختي التلفووون مايبيله والله ..
ساره انحرجت اكثرر : ابوي كان في المستشفى وكنت اروح له من الصبح لين المغرب وارد وانا هلكانه وعلى طول ماشوف الا السرير ..
عاشه بغير تصديق : لااااااا ؟؟ في المستشفى ؟؟؟
ساره ماحزنت على طاري المستشفى وابوها بالعكس.. اليوم بيرجع وبينور الفندق : اي والله بس انشاءالله اليوم بيرخصونه ..
عاشه : سلامته انشاءالله .. مايشوف شر عمي عبدالله..
ساره بابتسامه : الشر مايجيج ..يالله عيل اخليج انا ؟؟
عاشه : وي من صجج ماصدقت اشوفج .. اقول سروي فديتج والله اذا فاضيه تعالي عندي ؟؟
ساره : اكيد فاضيه عيل وراي عيال وطباخ .. بس انتي تعالي ؟؟
عاشه تذكرت لما طاح فيهم اللفت : وييييييه الا اللفت تكفين .. حاله نفسيه صايدتني ..
ساره : هههههههههههههههههه..لين الحين ؟؟؟ خلاص ولا يهمج ربع ساعه وانا عندج
عاشه : اوكيييييك انتظرج ..

[bnt aldo7a]

في الفنـــدق
وبالتحديــد في الطابق الخامس عشر..
وبالضبط عند شقة ساره

كانت تدور هوشه او مصااارعه بالاحرى بين ساره ومفتاح الباب مووو راااضي يفتح الملعوووون ..جربت مره وطلع الليت الحمر ..بمعنى ان الباب مافتح..جربت مره ثانيه..بعد مافتح .. عااااد الحين بكسره ان مافتح ..وحطت الاكياس اللي كانت بيدها ع الارض وخذت نفس عمييييق عن لا تكسر الباب .. وجربت ..بعد مااااااافتح ..ههههههههههههههه .. ساااره ..حااااول مرررره اخررررى ..ههههههههههههههه .. حاولت مره اخرى ودخلت الكارد .. ونطرت شوي وطلعته مره ثانيه ونطرت الليت يولع .. بعد لااااااااااااا .. اللهم طولج ياروح ..وزفررررت ذييييج الزفررررره اللي خلت اللي كااان ولاااا زاااال يراقبها يكشر ..
وبنظرااات دقيقه ومتفحصه شافهاا .. شفيها هذي ؟؟؟ يعني عندها مشكله في الباب ؟؟؟؟ حرام مسكينه خل اروح لها محد بيساعدها ...

ساره اللي كانت مجابله الباب ومعطه ظهرها للي يمر ومتبهدله مع هالمفتاح يعله الكسر بس اقووووول ..

فيصل يحاول ويجاهد بس عشان يغير نبرة صوته ليما الحين معصب عليها بس بتشوف شبيسوي بعدين

can i help u ?? فيصل :
ساره التفتت وبلعت ريجهها : امممم ..ا.ا المفتاح مادري شفيه ؟؟؟
فيصل يتحاشى عيونها : حاولتي معاه ؟؟؟؟
ساره بقلبها .. الا تصااارعت معاه ..ورفعت الكارد بيدها بطريقه جنها اعلنت استسلامها : اي !!
فيصل : عطيني ياه ..
ساره ماترددت عطته ياه وهو حاول فيه بس بعد معاه كان يولع الليت الحمر .. يعني المشكله في المفتاح ..
فيصل : لحظه شوي ..
ساره اللي شافته يتوجه لاخر الممر ولا تعرف شيبي يسوي ..

ورد لها ومعاه الروم سيرفس والمره ماعطلت شافت رقم الغرفه وعلى طول راحت للغرفه المخصصه للروم سيرفس وردت بعد ثواني ..

1008 room..sir الروم سيرفس مدت يدها لفيصل وفيها المفتاح :
thank y lidy فيصل بابتسامه خلت المره تضيع :
any time المره بابتسامه مندهشه من جمال فيصل الاخاذ والانجليزي :

فيصل عطى ساره المفتاح وساره خذته برجفه ولا كانها موجوده معاه .. حاولت في المفتاح والحمدلله انه ماخيب ظنها .. كل اللي كانت تبيه انها تدخل وتسكر الباب ولا تشوفه

ساره بابتسامه شكر : مشكوووور اخوي
اخوووي ها ؟؟؟ اردها لج .. وبابتسامه عريضه فيها خبث وترقب لما سيحصل بعد دقايق معدوده : ولو اختــــي لاشكر على واااجب ..

ساره شلت الخرايط وكانه مب موجود دشت بهدوء وسكرت الباب وراها .. وفيصل من عقب الابتسامه ماحل مكانها الا نظرات كلها قهر بس اااااااخ يالقهر .. اول شي تطلع بدون عبايه وهذا شي انا مااتقبله ابدااا ابدا ..ثاني شي تسكر الباب في ويهي والله يستر من الجاااي .. معليه ياحلوه .. معلي اوريج ..بتشوفين شبسوي بعد شوي اذا طلعتي من هالشقه ..بس اذا ماطلعتي ماراح تشوفين ..ويستحسن انج تطلعين ..ان ماخليت قلبج يشتعل ونيرانه تعلى ..مااكون فيصـل ولد حـمد

امممممممم ..صدقوني فيصل مافي في باله اي شي ..وماخطط لاي شي هذا اللي يقوله كلام ..بس هل من الممكن يصير فعل ؟؟؟

*********

اوووووووه ياقلبي شفيني شفيني ينيييييت .. حالتي مب طبيعيه ؟؟؟؟
اول مادشت كل اللي سوته انها راحت غرفتها وقطت الاكياس وشلت الشيله ..ااااااه ياربي ..يعني لازم اشوفه كل مره لازززم ..الله يخليه لولاه ماكنت بقدر ادش كلش وكنت بتنقع عند الباب لين مايوصلون نيوف وابوي ..اوووه عوووش بغيت انسى .. قامت على حيلها وتنفسها كل ماله ويسرع ويتوالى ..وقلبها دقاته تزيد عن المعدل الطبيعي ..ماتدري ليش ؟؟
بدلت ملابسها ولبست لها لبسه خفيفه ..بنطلون جينز وبلوزه رياضيه .. تساعدها على التحرك وماتضايقها..وسحت شعرها ورفعته كله ..وسوته على طريقة ذيل الحصان وكان شعرها نازل بتموجات سوده فضيعه ..وزيدت من الكحل اللي كانت حاطته ..ولما بغت تطل من غرفتها ..مرت على الحمام ..ومالفت انتباهها الا الورده الحمره..وماننسى البيضه ..امس ماعرفت وين تحطهم مع ان ماكان ودها تقبلهم ..بس يعني بالله لو ردت الباقه عند الباب ..ممكن باي لحظه نايف ايي الفندق ويشوفها عند الباب ..ولا يعني تروح له بنفسها وترد له الباقه وتقوله ماتستحي على ويهك ؟؟؟

شتسوي يعني ابد ما يا على بالها غير انها تاخذ الورود وتحطهم في قلاص وتمليه ماي ..وتحطه في حمامها فوق المغسله ..وجدام المنظره ..هالشي اللي خلا الورود تنعكس ..ساره اول ماشافت الورود ابتسمت ..مالت عليه كلش الحين بيحرني ..اختي هااااا ؟؟؟ بس تراني رديت الصاع .. جزاه الله خير طلعني من ورطتي ولا انا شدخلني بالمفاتيح وسوالفهم .. (وتذكرت المره شلون كانت تطالعه لما عطته المفتاح ) ..جال بقلبها احساس غريب وشي كان يمر بخاطرها ويخليها تحس بالقهر ويمكن منه الغثيان ..بس ابتسمت ..(ابتسمتي ياساره وانتي ماتعرفين هالاحساس شمعناه بس صدقيني قريب بتعرفينه وبتذوقينه ) .. ساره دشت الحمام وتوضت عشان تصلي المغرب ..
صلت وقرت ورد ودعت ربها..ولما خلصت طلعت من غرفتها الى الصاله وهي تمشي بفرح وشعرها يتمايل مع مشيتها .. دام المره انعجبت في جماله مااقول الا ..الله يحفظه ويخليه حق امه وابوه ..

سوت لها نسكافيه ..ولما ضافت السكر للماي الحار والنسكافيه ظلت تناظر الدوامه ..لما خلطت النسكافيه والماي والسكر انتجت دوامه ..ظلت تناظرها بغمووووض كبير وتفكير عميق ..والدوامه تدور وتدور وتدور وحسست ساره بان هالفرحه ماراح تدوم ..هذي فرحه مؤقته ومردها بتنتهي ..ومازالت الدوامه تدور وتدور لين ما عيون ساره حولت ..هززت راسها هروبا من هالافكار والاحاسيس اللي تضايق فرحتها ..خذت كوب النسكافيه وراحت صوب الطاوله اللي عليها التلفزيون ..وفتحت الكبت وطلعت قلم وورقه .. وكتبت فيها كلام تطمن فيه اخوها وابوها لما يوصلون ومايلقونها ..طوت الورقه وحطتها فوق التلفزيون وحطت الريموت على الورقه ..شربت النسكافيه ع السريع وعقب لبست عبايتها وراحت على طول عند عاشه ..بدون ماتتلفت يمين ويسار ..ماودها تتلفت وتلقاه ..لانه يخليها تفررح وتستانس وتحس بالدنيا مو سايعتها من فرحتها ..ولانه يبعد عنها الظيج والهم ويخلي الابتسامه دومها على شفايفها ..

*********

ساره اللي وصلت عند عاشه بامان وسلام .. الحمدلله ماتعرضت لاي موقف حرج من بعض الناس ..

راشد اللي قعد في حجرة عاشه بالغصب وبطلعة روح دخل ..اكيد كل الخوات مايحبون اخوانهم او خواتهم الصغار يقعدون معاهم وخاصه لما عندهم ضيوف ..بس ذي طلع روحها واكيد خطيبته ساره موجوده طيبة القلب ورقيقة المشاعر لازم يدخل ..

راشد ماسك كروت الاونو بيده : يالله حبيبتي ساره دورج ؟؟
ساره لعبت .. وبعدها عاشه ..مسوين قعده ع الارض ومتربعين ويلعبون على شكل حلقه ..بس اللعب كان نار ومولع شوي دام ان الكبار ساره وعاشه خبيرات بس راشد مايقدرون عليه ..

عاشه : امممممممممم حمود (وحطت له درو تو ) امممممم شرايك ؟؟
راشد : مالت عليج على بالج مخرعتني وكلش بموت الا درو تو شوفي انزين ؟؟؟ (وحط حق ساره درو تووو يعني على ساره تسحب اربع )
سااره : رشووووود عمري خطيبي ليش جذي ؟؟؟
راشد : فديتج والله انا ليمن اعبر اعبر عن حبي لج بهالطريقه !!
ساره حطت درو تو حق دانه وكل واحد يسحب الثاني الله يعلم من بياكلها : وييييه ان جانك جذي اتعبر عن حبك عيل خله لك !!
راشد : افااااا جذي معلي ياعيوني بعد شوي بروايج شلون اعبر عن حبي الشدييييييد ..
عاشه : هههههههههههههههههههههههههههه..
ساره : مالت عليج تضحكين ها ؟؟ زين لعبي اشوف يالله ؟؟؟
عاشه حطت درو فور حق راشد
راشد : ول عليكم يالحمير تبون تسحبوني 10 مره وحده ..
ساره : هههههههههههههههه وناااسه ويووووو ..
عاشه تكلم ساره : اخذت بثأرك ياحبيبتي ..
راشد بو حدش سنه : ههههههههههااااي شقلتي لها ؟؟؟ سروي حبيبتي سمعي كلامي ترى اطلقج وبالثلاث واطيرج ..؟؟؟
ساره تطلع له لسانها : همممممم..همممممممممم اسحب اسحب ..
راشد اذا قال اعبر عن حبي يعني اعبر عن حبي ..وحط لها دروووو فااايف ..
ساره : روحوووا زين مااااابي العب (وفرت الكروت وتناثروا ع الارض ) ..
راشد : ههههههههههههههههههه ساره شفتي شلون اعبر ؟؟؟ فديتج والله يااحلى زوجه اموووت فيج ..
ساره : حبك بررررص
دانه : يالله رشود برع بسرعه ..
راشد قام : اصلا انا كنت بقوم لاني بروح اييب العشا
ساره : من صجك ياااهل وتروح في الشارع بروحك ؟؟؟
راشد تصنع العصبيه : هاااا شقلتي ؟؟؟ ياهل ؟؟؟؟
ساره : ههههههههههه لا شاب وسيم فديتك
راشد : اي عبالي
عاشه دزت راشد : يالله انجلع زين
راشد : شوي شوي يالدفشه

ودزته لين ماطلع برع الغرفه وسكرت الباب وقفلته بعد ..ووقفت وراه جنها خايفه احد يدش ..وساره طالعتها وعاشه تمت تناظرها وتبادلوا النظرات وعاشه بدت تضيج بعيونها عشان تفهم ساره شتبي تقول بالنظرات ..وساره رفعت حاجب جنها مستغربه ..وعقب عاشه عقدت حواجبها بحيره ..

وساره ماستحملت وضحكت على اشكالهم : هههههههههههههههههههههههههههههههه
عاشه راحت عند ساره وهي ميته من الضحك : ههههههههههههههههههه حمدلله ههههههه والشكر صج ميانين
ساره : هههههههههههههههه سكتي دموعي نزلت ..
عاشه وآثار الضحك : همممممممم وبعد شخبارج ؟؟؟
ساره : امممم تمام ..باجر مسافرين انشاءالله ..
عاشه : لااااااا ؟؟ ماستانسنا ولا تواعدنا ولا طلعنا ويا بعض ..
ساره : ايه والله انتي بعد ماستانستي في هالسفره ؟؟
عاشه : ويييييه شلون استانس وانا مع هالياهل وامي وخالتي كلهم مب من عمري (وتاشر وتحرك بيدها جنها في نشره جويه بطريقه مضحكه ) يعني تفكيرهم مو نفس تفكيري ..
ساره فابضه الضحكه : امممم تفكيرهم ..يعني ؟؟؟
عاشه : يعني (ووقت تحريك اليد لان ساره ضحكت بشكل غير طبيعي ) شفيج ؟؟؟
ساره : ههههههههههههههههههههههههه تضحكيييين عووووش ..
عاشه : ويا ويهج شقالولج ارقوز ؟؟
ساره : هههههههههههههههه معلق ريااااضي ..

عاشه خذت المخده اللي كانت وراها وطاحت في ساره ضرب وساره من الضحك بطنها عورها ..والثنتين ظلوا يطاردون بعض في الغرفه وكل وحده ماسكه مخده تركض ورا الثانيه تبي تاخذ ثأرها منها..طفوله جميله رائعه وعفويه ..ناعمه وبريئه ..بس يهال في اجسام كبار .. مردهم يكبرون ..مردهم يعيشون مرحلة الشباب ..مردهم بيطلعون من هالطفوله الشفافه ..لانها محطه من محطات الحياه ..

[bnt aldo7a]

محمد اللي وصل بدر البيت وسيارته دخلها داخل بيت عمه

بدر خذ الكيس ويستعد للنزول : تسلم حبيبي على هالطلعه الحلوه ..

محمد اللي شل الغتره وحطاها على السيت الوراني ومسح على شعره : الله يسلمك حياك الله ..

بدر : امممممم شعندك باجر ؟؟

محمد بتفكير : اممممممممم ماعندي شي ..ايه عندي (تذكر ان ابوه باجر بيرجع ) باجر العصر انا مب فااضي كلللش ..يعني بالليل ؟؟؟

بدر : في الليل عيل ..يالله مع السلامه وانا بمرك ..

محمد اللي شاف حد يمر من الدريشه اللي كانت في وضع مجابل للسياره بس في الطابق العلوي : اوكي ..

بدر قبل لا يصكر الباب : باااي ..

محمد وهو يضيج بعيونه اللي كانت تناظر فوق : بااايات

وظل يطالع فوق جنه يني يمر كل ثانيه ..ولما بين شوي من اللي مر ..فتح حلجه وعيونه وهو مستغرب ..نوروه وفجور ؟؟؟ ويمكن دانه ؟؟؟؟ مادري والله ..انا بحرك وماعلي منهم واول مابغى يرجع على ورى عشان يطلع ..عرف من اللي مر او بالاحرى مرت ..هذي دانه !!

دانه اللي على بالها اخوها بدر اللي وصل ولما سحبت الستاره الشفافه وطلت من الدريشه ..طلع محمد !! وجالت في خاطرها امنيه ..ليتك يانايف انت اللي بمكانه ليتك بس ليتك..وابتسمت لما تذكرت صوته وهو يقول حق ساره (من تكلمين ) فديته والله هالانسان اللي يخااف على اخته ..عمري والله بيردون جريب..ساره قالت لي جذي بس متى ماقالت ..هممممممممم وقعدت تفكر والستاره مفتوحه وهي تبين ..ياحلااااوه ..

محمد اللي كان يناظر دانه وهو يعقد حواجبه مره..ومره يضيج بعيونه بحيره ومره يفتحها باستغراب ..ولما اتكأت دانه على كرسي وحطت يدها على خدها وشكلها تفكر ..الاخ بعد بسط وماحرك سيارته شبر ..

دانه اللي طلعت من افكارها ودوامت التفكير اللي كانت ضايعه فيها بسبت محمد ..ابتسم لها ابتسامه كلها حنيه بس عريضه ..وعيونه كانت تتقرب ملامح دانه ..ولما ملامحها تغيرت سكرت الستاره الشفافه ولا بعد سكرت الستاره الغامجه ..معصبه يعني ..والله تحلم واحد يبتسم لها هالابتسامه الحنونه والعطوفه ..الحماره معلي يادانه ..وحرك السياره وطلع من البيت وقعد يفكر في السياره ..

حسبالج اني ماادري انج تحبينه ..حسبالج ثور انا مااعرف هالسوالف ..ومسوي نفسي روميو مادري الام الحنونه وقاعد ابتسم لج ..اقول مالت عليج خلينا نشوف نيوف شبيسوي لج عاااد ؟؟.. والله ان عطاج ويه بس تفلي بويهي ..اللهم السلام عليكم وعليكم السلام بعد مب من الخاطر ..الا عشان الادب والاحترام ..خير انشاءالله يادانه ..بس انا ناطر اللي بيسويه نايف عشانج ..وقوى من قبضة يده على السكان بعصبيه وهو ياخذ نفس وعيونه توسعت من الغضب وعروجه شوي وبتطلع ..

*********

ودعت رفيجتها اللي معاها من مرحلة الاعداديه ..والابتسامه مرسومه على شفاتها..وباجر بإذن الله بتكون عند بنت عمها ورفيجتها وحبيبتها ..دانه اللي كانت معاها من اول ماشافت الدنيا وراح تظل معاها ان شاء الله ..وتوسعت الابتسامه من الفرحه ...

وصلت للطابق وانفتح باب اللفت..ومشت بتروح الشقه..وفي الطريق كان باب شقة فيصل مفتوح ..واذا ساره تبي تمر لازم تمر على شقة فيصل ..مرت بهدوء ومالفت راسها ورفعت راسها فوق بدون اهتمام ..مرت من عند الشقه واللي وقفها لبرهه ..انها سمعت صوت انثوي صادر من الشقه ..التفتت عشان تتاكد ..انصعقت ..

بنت ويا فيصل !!

كان ويهه مجابل الباب والبنت اللي واضح انها انجليزيه..شعرها الاشقر وضحكتها ..وهووو..يضحك ولا تعب من الضحك .. رفع عيونه ولاحظها..لمحها ..بس بدووون اهتمام رجع يضحك !! ولا كانه شافها !! .. مااستحملت لا ادب ولا احترام والباب مشرع !! صج مايستحون ..بخطى غاضبه مشت لين الشقه وهي تضرب الارض بقوه وانفاسها شوي وبتطلع من القهر ..طلعت مفتاح الشقه من مخباة الجينز ..ودخلته في القفل ولفته بقووووووو ويدها ترتجف ..

دشت وراحت صوب غرفتها بس سمعت صوت..من غرفة ابوها ..راحت صوب الغرفه وفتحت الباب ولقت ابوها طالع من الحمام وهو يمشي على عكاز وظهره اللي تقوس شوي من التعب ..راحت له تساعده

ساره مسكته من يده .. ونبرة صوته ترتجف : يبا وين نايف عنك ؟؟؟

بو محمد : راح الصيدليه بييب الادويه وبعد قال بيشتري عشا ..

ساره ساعدته في القعده على السرير ومددته وعدلت المخده وراه..خلته يتسند عليها وباسته راسه..: حمدلله على السلامه يبا فديتك نووورت الفندق ..

بو محمد يأشر لها تقعد ع السرير : منور بوجودج يايبااا..وينج فيه ..جذي ارد ومالقاج ؟؟؟

ساره بقلبها..ياليتني ماطلعت ياليتني ذبحت روحي من الملل ولا طلعت : يبا مابغيت اقعد بروحي وشفت رفيجتي وقالت لي تعالي عندي ورحت عندها

بو محمد : عسى بس استانستوا ؟؟

ساره وهي تتذكر حركاتهم..ساعه ونص من الطفوله ويا عاشه : اي الحمدلله استانسنا..يالله يبا دقيقه بروح ابدل ملابسي وباييك

بو محمد : انا فيني النوده يابنتي.. برقد ولي رجع نايف وعوني ..

ساره : انشاءالله

راحت غرفتها وبدلت ملابسها..ووقفت في نص الغرفه تفكر ..كل الشباب جذي ..يلعبون وولا عليهم بس البنات المساكين ..عقب مافرحت وصرت ابتسم لكل شي اشوفه حتى بويه اللي اكرهه ..خليت الناس يلاحظون التغيير اللي مر علي..فضحت نفسي بفرحتي ..وبالنهايه شلقيت ؟؟

مشت بعصبيه لين الكرسي الهزاز اللي كان عند الدريشه ..وحطت ريلها عليه وهززته بسرعه فضيعه.((.يابنت الناس كرسي الفندق شوي شوي عليه ))..وهي تهززه كانت عيونها على المنظر اللي شافته ..عمارات وشركات وملاهي ولندن بكبرها شافتها ..وظلام دامس مامنوره اللي ليتات الشوارع والمباني ..انعكس المنظر في عيونها ..والنور اللي كان في الظلام انعكس بعيونها على شكل دمووووع ..بس مانزلتهم ..حبستهم وقد ماتقدر راح تحبسهم ..سبب تافه مايستاهل دموعها ..تنفست ووقفت ريلها عن اهتزاز الكرسي ..ورفعت راسها ..

طقات خفيفه على الباب خلتها توتعي وتنتفض ..

ساره : تفضل

انفتح الباب ودش نايف : يالله ساره ..عشى

ساره : مابي اتعشى

نايف : تعشيتي عند رفيجتج .؟؟ قريت الرساله ..

ساره تورطت شتقوله..وبدت تتحرك في الغرفه ونايف حافظ هالحركه ويعرف ساره متى تكون متوتره بسبتها ..

نايف : همممممممم ؟؟

ساره : ماابي

نايف حط يده على مقبض الباب : ليش ؟؟ يالله ساره تكفين تعالي تعشي باجر بنرد ..يالله بليززززز ..

ساره حكت راسها ..

نايف : شدعوه يبيله تفكير ؟؟ انزين عشر ثواني ..

ساره تفكر من صجها ..مالها نفس حق العشى ولا تبي تشوف الاكل ..

نايف : 10 ..

ساره : ..................

نايف : 9 ..8 ....7 ......6

ساره تحك ريلها في الارض وتسمره بمكانها ..

نايف : هممممممممم ..5 ..4 .....3 ..............2 ........1 وثلاثة ارباع ..

ساره ابتسمت

نايف رد بسرته الحنطيه بدت تنسد على ورى ..يعني ابتسم ..

نايف : ا ..

نايف قبل الصفر : ترى احلف اني ايرج من شعرج واخليه كشه ؟؟؟ والله ترى ؟؟؟

ساره ابتسمت له من القهر اللي فيها بس نايف فهم انها تبي تنرفزه ..

نايف : 0 ..

راح لهاااا وبعصبيه مصطنعه قرب منها وهي تضحك واول مابغى يلمس شعرها ..شردت منه وركضت الصاله وهي تصوت على ابوها ..

ونايف يضحك على اخته الحماره دوم تشرد منه ..بس اخته لو شنو يصير ..مايقدر يضربها ولا حتى بالخفيف ..الله يخليكم ويحفظكم ويعلكم السعاده وان شاءالله هالفرحه دوم تكون مبينكم يارب ..

[bnt aldo7a]

الجـــــــزء الثـــــامن
-----------------------


نايف قعد من النوم الفجر والي قومه هو..المنبه المزعج وحاطه بآخر الغرفه بالعمد عشان يقوم ..بدافع ..الصلاه طبعا ..هو وساره من عوايدهم انهم يقومون لصلاة الفجر ويأدونها بوقتها بس محمد..هالكسول يالله يالله يقوم ويصلي الفروض والحين يقوم عشان يصلي الفجر..لا مااظــن ..

عقب ماادى الفرض طلع من غرفته وشاف باب غرفة ساره مسكر بس نور خافت ظاهر من تحت الباب..حب يتفقد اخته اذا صلت ولا ؟؟ راح لها وفتح الباب بشويش..فتح عيونه بدهشه !! راقده !! غريبه !!

راح لها بهدوء ولما قرب منها عشان يوعيها شاف ملامحها منعفسه وحواجبها مشربكتهم وكانها متضايقه من شي ..هزها على خفيف ونادى على اسمها ..

نايف بهدوء عكس امس الصبح لما قومها وقلب الفندق عليها: ساره ؟؟؟؟ قومي.. يالله عشان تصلين ..

مافي اي جوااااااااب

حاول بعد مره.. مستحيل يكون قاعد ولا يوقظها حق الصلاه : ساره حبيبتي قومي ؟؟؟؟؟؟؟

ساره تحرك جسمها وفتحت عيونها شوي شوي ورمشت كم من مره محاوله للتعرف على هالشخص ..نايف ..شيبي ؟؟؟

ساره وصوتها مليان رقاد : خير نايف ؟؟ شصاير ابوي فيه شي ؟؟؟
نايف بابتسامه يطمن ساره : لا عمري ابوي مافيه شي ..بس قلت اقومج حق الصلاه ؟؟؟؟
ساره ساعدت جسمها الهلكان عشان تسنده على المخده : انشاءالله ..بقوم الحين
نايف اللي لاحظ ملامح ساره التعبانه وحواجبها اللي معقده وبقوه : شفيج ساره ؟؟؟ شي يعورج ؟؟؟
ساره امسكت راسها بيدينها وقالت : راسي مصدع ..
نايف اللي حاط في باله ان الصداع ياي من النوم متاخر بس السبب ثاني : باييب لج ادول

ساره اللي هزت راسها بايجاب ونايف راح غرفته ورجع حق ساره وحبة الادول في يده

نايف : هاج ..

خذت الحبه ويودت في يدها الثانيه قلاص الماي اللي كان عند راسها..من عادتها انها تنام والماي عندها ..

رفعت نظرها لاخوها بتعب : مشكوور ..
نايف : العفوو حبيبتي ..يالله قومي صلي وابيج تنامين عقب الصلاه على طول ترى موعد الطياره الصبح يعني مايمداج تبسطين وتنامين لين الظهر مثل كل مره ..
ساره بتعب : ههههههههه لا اكيد بقوم ..

نايف طلع من غرفة ساره وقبل لا يطلع ابتسم لها وهي ابتسمت له.. وطمنتها وريحتها ابتسامة اخوها بس مو كثر القهر والنار اللي فيها من امس ..واول ماتذكرت انمسحت الابتسامه وانعقدت الحواجب مره ثانيه .. والدمع بعيونها من امس بس ماراح تسكبه من عيونها ..لا..مابتستسلم بهالسهوله لهالانسان ..بتكافح وتحاول تتعدى الاحزان والدموع اللي راحت ولكنها موجوده لين الحين..بتتحدى اليأس بأمل جديد وبحــب جديد يملي حياتها فرح وسعاده ..ماراح تستسلم لليأس والاحباط

قامت على حيلها بتعب عشان تتوظا وتأدي الفرض وتنام من عقبها وتريح بالها.. ولو انها بتقوم من النوم وبتواجهه مره ثانيه ..بس الراحه مطلوبه..

********

دانه وبدر كانوا قاعدين في حديقة بيتهم الواسعه..اللي فيها طاوله وكراسي وقعده حلوه خاصه حق العصريه ..بس الحين الساعه 10 الصبح ..

بدر وهو يرشف رشفه من الجاي : عجبوج الشنط ؟؟
دانه اللي حاطه ريل على ريل ومستانسه على القعده : واااااايد فديتك ايننون (وبتفكير خبيث ) ان ماوريت بعض الناس ماكون دانــــه ..
بدر : من ؟؟؟
دانه في بالها ساره : محد ...(وقامت من مكانها صوب اخوها )هذي بوووووووسه عشان الماركات (وباسته وحمرت خدوده بشكل مضحك )
دانه بابتسامه : فلستك مووو ؟؟؟
بدر بابتسامه لاخته : لا والله ..ابد بس(يبي يحرها) مرتي انشاءالله بتكون احسن من جذي ..
دانه رجعت وقعدت على الكرسي : ويــــــــــــه الا بتفلسك وبتخلي جيوبك فاضيه يالغبي ..
بدر يبي يقهرها وبابتسامه تقهر موووت : امممممممم حتى لو تمون زوجت بدر ..مرت اخوج بتشتري كل ماركات العالم واللي تبيه على كيف كيفها وانا تحت امرها ..
دانه رفعت ريلها وحطتها على الطاوله وبغرور قالت : ايه بدينا بحركات زوجة الاخو القرعه هذي ..
بدر : كلوووو كوووووم وزوجتي كووووم ..(وحط عيونه على ريلها ودزها ) ونزلي ريلج لا اكسرها الحين ..
دانه بتالم مصطنع : آآآي يالحمـااار ..


بدر قام وراح صوب غرفة صغيره قريبه من الحديقه فيها شغلات حق تنظيف السياره..ودانه شافته لما طلع حامل بيده سطل فيه ماي ومنشفه ..

دانه سالته : بدور شتبي تسوي ؟؟
بدر بلعانه وهو يرفع جلابيته ويربطها عند خصره : بغسل ويهج بالماي ( وبطريقه تظاهر انه بيكت الماي عليها ) ..
دانه تخرعت وقامت وابعدت عن مكانها : ايااااا الحماااار صج انك حمااار ماعندك لا شغل ولا مشغله وياي عندي ..
بدر المسكين : شسويت لج الحين ؟؟ حرام العب معاج يعني ؟؟ وبعدين انا مب فاضي لج بس بغيت اغسل سيارتي ..

وراح صوب سيارته الفي اكس.. اللي كانت في القاراج الخـــاص حق سيارته فــقط.. وطلعها وخلاها برع القاراج ودانه راحت عنده ..

دانه رفعت يدها عند جبينها تحمي عيونها من اشعة الشمس القويه : وييييه وين ربعك عنك بتصير راجو اليوم ؟؟
بدر تنرفز اخس شي عنده لما حد يحرق اعصابه : والله العظيم ترى اكسرج ..يااااه لا تحريني ياختي اففففففففف ..
دانه : فديت اعصابك ..بس استغربت ربعك مب معاك اليوم ؟؟

بدر تذكر الموقف اللي صار امس وابتسم لما تذكر الوصيه من محمد الى زوجته الوهميه.. يمكن تكون واقعيه باخته ..

بدر وهو يعصر قطعة القماش اللي بيده من الماي : مشغولين شوي !! بشوفهم في الليل ..
دانه وحواجبها ارتفعت ومالت بشفايفها : اهاااااا ..جذي عيل !! كسرت خاطري فديتك جنك راعي الدكان كوماااار ..
بدر يطش الماي عليها : جبي جنج ميري خدامة بيت عمي عبدالله ..(بو محمد )

دانه ابتعدت عنه : مالت عليك كومار وصخت بيجامتي من باريــس ..
بدر طش الماي عليها مره ثانيه : كلش عااااد ماركه الحييين ..
دانه : ههههههههههههههههههههههههههه بعد حمار ..
بدر وهو يغسل السياره من جدام : حمااااار ريلـــــــج ..
دانه بصوت واطي : حمار ؟؟(وبخجل قالت بهمس ) فديت ريلي والله

********

عاصمــــة بريطانيا

الساعه 8 صباحاً ..

فيصل كان منسدح على سريره ومسند نص ظهره على المخده وعيونه نص مفتوحه..تاثيييير الرقاااد..وشعره البني ياحلوه من الصبح كااااش بطريقه حلوه..الغرفه كانت مظلمه شوي لانه مافتح الستاره بس اشعة الشمس تخللت منها ودشت وخلت الغرفه منوره شوي ..حاط يده على يده الثانيه ويطالع الفراغ اللي جدامه..بغباااااء ..

مب راضي يقوم..

مب راضي يغسل ويهه ويتنشط .

مب راضي ينشط جسمه ويحركه عن الكسل

بس راضي
يفكر فيــها ..

جسمه مب راضي يتحرك ..امس من عقب ماصلى الفير مارقد عدل ..تقريباً كل ساعتين يقوم واذا حاول يرقد يرقد بصعوبه .. كله منهااااا ..والله العظيم خربت رقادي ..مب بس امس.. واول امس واللي قبله واللي قبله.. من اسبوع ..اسبوعين ..بس معلي ..راضي اناااا والله راضي ..

امس شافتني معاها وقطت علي نظره وانا لقفتها..كلها غضب وحقد ..حقد علي انا بس ياربي ..ليش ؟؟ شذنبي ..والله ماكان ودي انها تشوف الموقف السخيف اللي بيني وبينها بس هي شافت.. واكيد حاطه في بالها اني واحد مغازلجي وماعندي لا شغل ولا مشغله عشان اطالع بنات الناس..بس لا..انا مب جذي يمكن كنت قبل بس الحين لا مالي خلق اعطي ويه ولا وحده لو تقط روحهاا علي الا (ابتسم ) هالملاك ..هذي اللي ماتحب كرماتها تنذل وكرامتها فوق كل شي ..هذي اللي لو تسفهني وتعتبرني ولاشي مجرد شخص عادي بالنسبه لها وآآآخر انسان تفكر فيه على هالكوكب ..الا هي ..انا رااااااضي والله


امممممممم تبون تعرفون من البنت اللي كانت مع فيصل امس ؟؟ وساره شافتهم يضحكون مع بعض ؟؟؟؟

من تتوقعونها ؟؟؟؟


ايماااااا صح ؟؟؟؟؟


لاااااااااااااااا مب ايماا !!


انا اقولكم شسالفه وليش فيصل معصب ومنقهر ويقول انه ماله ذنب في اللي صار ووده لو يفهم هالبنت (ساره ) ان البنت اللي معاه تكوووووون

اخته !!

واذا اتذكرون انه كان يكلم الشخص اللي اتصل له بالعربي والانجليزي .. شي اكيد لانها اخته

كل اللي صار ان ميريام اخت فيصل اتصلت له وبما انها في لندن مع ريلها..حبت تزور اخوها قبل لا يرد قطر وتسلم عليه ..لانها نادر ماتشوفها ..خصوصا ان فيصل يدرس في مدينه وهي مع ريلها في مدينه ثانيه ولما تروح تزور اهلها في قطر تقعد فتره اخوها مايكون موجود فيها ..

وراحت حق اخوها وبالصدفه فيصل طلب من عاملة الروم سيرفس انها تنظف الغرفه قبل لا توصل اخته بس المشكلــه ..ان اخته وصلت قبل الموعد المحدد واللي كان الساعه تسع ..وصلت قبل الموعد بنص ساعه ..وفي الوقت اللي كانت العامله تنظف الغرفه فيها كانت تحتاج تفتح الباب عشان تطلع وتجيب اغراضها للتنظيف .. وفي نفس الوقت ميريام اخت فيصل فصخت الشيله وبين شعرها ..الاشقر ..هالشي اللي خلى ساره تكون واثقه انها وحده من رفيجاته الانجليزيات ..

..فـصار اللي صار وساره مرت وشافت فيصل يضحك مع البنت ..للاسف بنت افكار وافكار في راسها لا يمكن احد يقدر يهدمها ويعيد بنائها بطريقه احسن غير الشخص نفسه ..فيصل ..بس شلون ؟؟؟؟

[bnt aldo7a]

الساعه 8:30

ساره طلعت للصاله وهي تجر شنطتها بيد وماسكه عباتها بيد ثانيه .. حطتها عند المطبخ احذا شنط ابوها واخوها اللي كانوا هناك .. وراحت صوب الثلاجه وفتحتها وهي تتأفف من التعب ..قامت الصبح ورتبت شنطتها ع السريع وماتدري شحطت وشماحطت .. خذت العصير وشربته على طلعة نايف من غرفته .

نايف وهو مشغول في الجوازات اللي بيده والتذاكر : جهزتي ؟؟؟
ساره : ايه
نايف رفع نظره لها : مانسيتي شي ؟؟
ساره : لا

نايف : يالله عيل خليج مع ابوي في غرفته واهتمي فيه ليما ارد ( وراح عنها )

بس قبل لا يروح ساره ستوقفته : ناااااااايف وين بتروح ؟؟

نايف التفت : وين بروح بعد الله يهداج ؟؟ بروح السوق ؟؟؟ بروح ادور ليموزين من اللي تحت واول مااتصل انتوا نزلوا وماعليكم من الشنط بطرش بورتير وبياخذهم .
ساره : اوووكي لا تحاتي


نزل نايف وكلم احد الموظفين وقالهم يطلبون له ليموزين يوصلهم لمطار هيثرو .. وفيصل اللي تنشط وقام من مكانه ونزل يشوف الرايح والجاي ..فاااضي ادري ..بس احسن من ما اني افكر فيها واحرق اعصابي ..

فيصل لمح هالشاب..الطويل الاسمراني ..يعرفه نايف بن عبدالله ..اللي يشوفه دوم مع ساره .. كان متابع تحركاته وهو مستغرب .. لا لالا ..جوازات بيده ؟؟؟ شنو يعني ؟؟؟؟ خلاص ؟؟ ..لعب الشك بقلبه ويخالج الشك شعور بالخوف والتفاجأ..نظراته اللي على الجوازات كلها حيره وخوف.. بتسافر ؟؟؟ كل شي بينتهي ؟؟

في لحظــه ؟؟ لاااااا مستحيل !!

وبخوف يمنع عقله من التفكير قال في خاطره ..شنو الشي اللي يقدر يسويه عشان يمنع هالسفر اللي بينهي حياته ان صار ..توها ابتدت من يديد وتنتهي ..شنو الشي اللي ممكن يسويه عشان يفهم شاللي قاعد يصير من حوله .. بدال مايوقف مثل الضايع ومايعرف باللي قاعد يصير ويحط يده على خده ويفكر .. لاااا لا مستحيل تروح من يده بهالسهوله .. لازم يتحرك يسوي شي .. يفهم شسالفه

نايف عقب مالقى ليموزين على طول اتصل في ساره عشان تنزل ويا بو محمد ومانسى البورتير ..طرشه عشان الشنط .. مابقى الا ساعتين على موعد الطياره .. يعني اول مايوصلون المطار سيده على الطياره ..

وصلت ساره ويا ابوها اللي كانت تساعده في المشي ..يعني تمسك يده اذا فقد توازنه او شي .. وشافت نايف يقرب من صوبهم .. اه ياخوي اول مره اشوفك جذي ..مسؤول عن كل شي وكل شي فوق راسك ..متقمص شخصية الابو بصوره صحيحه ..

نايف : يالله ساره مانبي نتاخر اكثر من جذي
بو محمد اللي تظايق من قلق نايف : يانايف شفيك يايبا ؟؟ هد والوضع بيمشي
نايف وهو يحوس ببوزه : شاهدي يايبا .. مابقا الا ساعتين والله ان مانتفت شعري ولا ذبحت عمري مادري شبيصير ..
ساره : اووووه قاعد يتحرطم ومابقى الا ساعتين ويسولف !! صج انك بايخ
نايف : هات يدك يبا انا بساعدك ( يكلم ساره ) انتي وخري عن ابوي وامشي ورى ..بس بسرعه

فيصل اللي مب عارف شسالفه .. اكيد بيسافرون اكيد ..عيل الجوازات شله في يد هالنايف ؟؟ لعب هو ؟؟ لالا بتروح ..بتبعد ..بتسافر عنه .. وهو هني !! ماقدر يمسك نفسه وهو يشوفها تبتعد عن البقعه اللي كانت فيها ..راح وراها بحيره وعيون مب مصدقه اللي تشوفه ..مب مصدقه ان اللي صار في ظرف اسبوعين كان شي مؤقت ومن الاحلام الحلوه اللي مسرع مايقوم الواحد من النوم ويلقاها .. مجرد وهـــــم


.. هم طلعوا من البوابه بس بعدهم جدام الفندق وليما الحين ماركبوا السياره ..لان نايف والريال اللي بيوديهم كانوا يدخلون الشنط .. وهي التفتت بعيونها .. ومر شريط يمكن يكون قصير ..بس ممتع ..يفرح وييحزن ..يريــح ويقهر ..(ارفعت عيونها وشافت الفندق على طوله وبنظرة الوداع كملت ) حب وخــيانه .. وفا وغـدر .. جروح وابتسامه ..

حزن في عيونه وفي عيوني

جرت نفسها بحزن للسياره بنداء من اخوها ونست العزيمه اللي كانت فيها امس .. دشت السياره وسكرت الباب وعيونها مغرقه بالدموع .. رغم كل شي .. لازالت تحس بشي اتجاهه .. حرام يختفي هالشي وهالفرحه ماتدوم ..شافت فيصل وهو طالع من الفندق جنه يبي يمسك شي ..اذا بعد نظره عنه ..بيظيــع منه..

تحركت السياره ببطئ لانها في شارع مب رئيسي ومليان ناس .. مشت السياره وفيصل كان يمشي معاها ..كان يتوسل هالانسانه ويقول بصوت واطي اشبه بالهمس..( خلج لا تبعدين .. تكفين..ابيج..لاتروحين عني)
..وساره اللي ماتحملت تشوف انسان يمشي وراها بوسط الناس وليش ؟؟ بس عشانها .. نزلت دموعها على خسارة فرحتها.. وتغشت عن لا يلاحظ ابوها او نايف دموعها ..

نزلت دموعها بــحراره .. بــمراره .. بــندم .. بــحسره .. بــقهر .. بــألم .. بخوووف من اللي فات ومن اللي بيصير


فيصل اللي ماقدر يواصل المشي لان السياره ابتعدت بكثير .. وقف على الرصيف وكل قهر الدنيا في قلبه اللي عانى مرتين وبنفس الطريقه.. الطرف الثاني ابتعد .. ليش ياربي ؟؟ ليش بعدت عني ؟؟ بدون سابق انذار ..جذي كل شي صار فجأه ..رحيلها عني بخلسه.. وقلبي شبيسوي بدونها بهالدنيه ..وعيوني اللي تعودت على شوفتها .. بترد وحيده وحزينه ؟؟؟


من القهر اللي فيه شات قوطي بيبسي فارغ كان طايح جدامه .. شاته ..وجنه بهالشوته..كان وده يطلع روحه ..مثل ماطلع قهره .. ولسانه بدا يلفظ كلمات انجليزيه .. متتاليه .. وسريـعه ( من عادة فيصل اذا عصب واذا ضاع مثل هالوضع اللي هو فيه الحين ..تتغير لهجته وتصير انجليزيه ) ..

******



مرت السبع ساعات على ساره ببطئ في الطياره..ابوها واخوها كانوا قاعدين في درجه اولى عشان بو محمد..اهم شي راحته عقب الفتره اللي تعب فيها وكان لازم نايف يقعد معه .. وخلوا ساره تقعد ورا في درجه ثانيه..مانامت لحظه وحده ..كل ماتنام تتذكر اللي صار وشفاة فيصل اللي كانت تهمس بشي مافهمته ..تمنت لو ظلت بحزنها سنين وسنين ولا تذوق طعم الفرحه ..على انها تذوقها وتهجرها من جديد ..كل شي انتهى ..راح وتلاشى

في الدوحه غابت الشمس اول ماحطت الطياره على ارض الدوحه..محد كان مستانس كثر نايف ..اكيد ساره وبو محمد مستانسين على وصولهم بالسلامه ورجعتهم للبلاد بس مب كثر نايف اللي مايحب بلاد غير قطر ..يحب يكون بين ربعه وناسه ..وطني الحبيب ..

محمد اللي استقبلهم بحراره وشوق..صج البيت بليا هله مايسوى ..محمد متعود على الحشره وهاليومين اللي قعد فيهم في البيت بروحه ..مل وطقت جبده .. يحب نصايح ابوه ..ومعجب بحنة ساره..ومينون عصبية نايف ..

***

عقب ماصلت المغرب ..وطوت السجاده وسبحت ربها..تلفتت بعيونها على غرفتها..قبل السفره ..سافرت والحزن فيها ومعاها من سنين وهناك ..قابلت ناس فرحوا قلبها الصغير ..وعاشت باحلام على ان الفرحه تدوم معاها ..بس لما رجعت ..رجعت باحزانها القديمه واحزان جديده زادت على قلبها ..

التفت للرفوف اللي كانت عليها الكتب ..كتب علميه ..ثقافيه ..دينيه بس اغلبها قصص ..ولكتاب معروفين

خذت كتاب لاجاثا كريستي..قصه بوليسيه ..تحب القصص البوليسيه ..قعدت على الكرسي الطويل وبدت تقراها ..
ثواني ولا انفج عليها الباب فجأه

كلمته بخوف ..: بسم الله ..صج انك حمار
محمد بنظره تفحصيه : ليش قاعده بروحج ؟؟ شتسوين ؟؟ هاااااا ؟؟ اعترفي !! احسن لج ترى
ساره باستغراب : شفيك حمود ؟؟
محمد تقدم لها : شنو اللي في يدج ؟؟
ساره المسكينه خافت : كتاب !!
محمد يضيج بعيونه وبنبره غريبه : كتاب شفيه ؟؟؟؟
ساره ..: كتاب ....
وقاطعها محمد بعصبيه هزتها : شنوووووووووووو
ساره بخوووف : قصه بوليسيه

محمد الشيطان ..النظره العصبيه اللي في عيونه تحولت لابتسامه على شفايفه

محمد : هااااااااااا شفتي شلون ؟؟ قدرت اخرعج ؟؟؟
ساره : شنو ؟؟ يعني تجذب علي ؟؟

محمد يهز راسه مثل اليهال وبابتسامه تذووووووب

ساره ماسكه اعصابها : زين ..محمد
محمد : عيووووووون محمد ..
ساره بابتسامه على هالياهل الكبير يعرف ينرفز بس عند قوه انه يخلي الشخص فرحان عقب مايعصبه : بطلب منك طلب ؟؟
محمد قعد عندها : أأأأأممري ..عيوني لج
ساره : تسلم عيونك ..توديني بيت عمي
محمد تذكر الدانه : هم مايدرون انكم وصلتوا
ساره هدت الكتاب : ادررري ..من جذي ابي اسوي سيبراااااايس حق دنوي
محمد حس بغصه : الله والسيبرايس ..
ساره : شفيها ملامحك تغيرت ..(وافتحت عيونها ) اهاااااااااااااا اذا على البترول ..نو بروبلم ماي دير آي ويل باي ذا بيترول
محمد : وخرووووو عنها العنجريزيه
ساره : يالله خلصني بتوديني ولا ..
محمد اللي ماوده يروح الا عشان يقط على دانه ذيج النظرات : اوديج ياعمري
ساره : اووووه ماي براذير..فيو مينت آند آي ويل بي بااااااك

[bnt aldo7a]

نزل محمد واخته من السياره..وكـــله امل انه يدش البيت ويلقاها جدامه..ان ماوراها الاحتقار شلون بيكون ..بس بالنظرات مافي داعي للكلام ..

دشوا البيت ولقوا ام محمد اللي ماكانت تدري بوصولهم

محمد + ساره : السلام عليكم
ام بدر تهللت اساريرها : وعليكم السلام والرحمه ..هلا يما شهالمفاجاه الحلوه
ساره وهي تسلم على مرت عمها : هلا يما ..شلونج عساج بخير ؟؟
ام بدر : بخير بشوفتج ..الحمدلله على سلامتكم ..والله فشله ليش ماخبرتونا كنا بنستقبلكم ..
ساره بخجل : شاستقباله خالتي ..محمد خذانا من المطار
ام بدر شافت محمد : هلا محمد شفيك واقف عند الباب ..حياك تفضل
محمد راح سلم عليها : شخبارج مرت عمي ..تمام انشاءالله ؟؟
ام بدر : تمام ياوليدي ..جذي ماتقولينا عن ردة الاهل ؟؟
محمد اللي بيمجع شعر ساروه الحين : والله خالتني انا امس دريت انهم بيوصلون اليوم ..وبعدين مابي اتعبكم
ام بدر : تعبك رااااحه
ساره تخاف ان دانه تنزل في اي لحظه وتخرب المفاجأه : خالتي وينها دنوي ؟؟
ام بدر : بعد وينها ؟؟ بدارها
ساره استأذنت : عيل اخليكم ..بروح لها ..وطااااااارت وخلت محمد يحترق..كيفه والله محد قاله تعال نرفز دانه ..عاد في الاخير انت افتشلت ..

محمد : وينه بدر ؟؟
ام بدر : طلع من نص ساعه
محمد بتفكير : امممممممممممم بيتاخر ؟
ام بدر : مادري والله ..رايح عند ربعه
محمد واخيييييييييييراً : خلاص عيل ..انا استأذن
ام بدر : وين الله يهدااك ؟؟
محمد : بروح عند بدر اكيد في الميلس عند الشباب
ام بدر : خلاص عيل براحتك يايما ..

محمد قام ..

ام بدر رافقته للباب : مع السلامه
محمد : الله يسلمج خالتي

******

كانت دانه مثل اليهال معجفه شعرها الكستنائي ومخليته على صوب..والمصاص بيدها واليد الثانيه حاطتها على خاصرتها.. ومجابله الكبت وتجول بعيونها..عشان تطلع لها لبسه ماتعرف شتلبس ؟؟

ساره اللي تبي تسوي سبرايس حق الدانه..لما ركبت الدري وراح صوب غرفة دانه لقت الباب مفتوح ..طلت براسها عشان تتاكد اذا دانه موجوده ولا ..ولقتها على ذيج الحاله ..مسكت الكيس اللي في يدها عدل (فيه هديه حق دانه وحق التوم..فجر ونوره ) ورفعت العبايه شوي..ومسكت نفسها ومشت على اطراف اصابعها بهدوووووووء ..

ليما وصلت حق دانه اللي ماكانت تدري انهم في الدوحه ..طلعت من ساره ذيج الــ بخ

ساره من ورى دانه : بوووووووووووووو ..
دانه طاح قلبها في بطنها : وي بسم الله الرحمن (والتفتت واهني الصاعقه ) الر..رحيــ..ــيم ..
ساره ابتسمت بشووووووووق حق دانه الزعلانه عليها من اول ماسافروا ..

دانه الزعلانه والمتفاجئه : انتي ؟؟؟
ساره تشوف حولها وترد نظرها لنفسها : من ؟؟ انا ؟؟
دانه بغير تصديق : ساره ؟؟
ساره : آمرررري
دانه بلعت ريجها وبدت تتصنع الامبالا : رديتوا ؟؟
ساره : اي ردينا ..
دانه : ....................
ساره تبي تزيح هالجفاف من دانه وتخليه على جنب : عمري دنووووي وحشتيني ..
دانه بتكشيره : الحين ؟؟
ساره تنهدت : آآآآآآآه يادنوي والله حرااام عليج انتي نصي الثاني شلون ماشتاق لج ..
دانه باعتراض والفرح اللي في قلبها مابين على ملامحها ..عندها كونترول هالبنت : بس
ساره قاطعتها : لا تقعدين اتبسبسين لي الحين ..خلاص دنوي اسفه والله اسفه انا غلطت وانتي بعد غلطتي والانسان مب معصوم عن الخطأ ..خلاص فديتج ؟؟

دانه رفعت حاجب مسح كلام ساره اللي قالته كله ..وراحت قعدت على سريرها وماده البرطم شبرين

ساره تعرف نقطة ضعف دانه ورفعت الجيسه وحطتها على السرير ..وقعدت حذاها : بعد مافي الحمدلله على السلامه ؟
دانه لانت : الحمدلله على السلامه
ساره بابتسامه : الله يسلمج ..
بعد لحظات ..
ساره : شخبارج ؟؟
دانه : اففففففففففف زفت
ساره اللي بتفلع الكيس على دانه الحين : عسى ماشر ؟؟
دانه بمرح قامت من مكانها : ماشر ..بس بنت عمي وحشتني مووووت وانا صراحه مب متعوده على فراقها

ساره اللي ماصدقت ركضت بفرح وبضحكه خلت الحياه تتجدد بروحها الشبه ميته ..وضمة دانه من ورا وضحكوا الثنتين بوناسه ..مهما يبتعدون ..او يفترقون ..ايام ولا سنين ..مردهم يجتمعون ..

*****

ساعتين قضتهم ساره في بيت عمها ..من عقب الرده تعبوا ولازم يريحون ..الراحه مطلوبه ..

بهالوقت نايف وساره قاعدين على طاولة الطعام وهمهم الاول والاخير ..ياكلون وسيده ع الفرااااش ..عكس محمد اللي مب راضي يهد ابوه ..قاعد عنده على السرير ومسوي له اكل خاااص ويأكله ..بعد يحق له ابوه ومريض ..من له في هالدنيا غير ابوه ؟؟

تعشوا وراحوا يسلمون على ابوهم قبل لايرقدون ..واول مادشووواااا ..

ساره فاتحه عيونها : حمووووود شتسوي ؟؟؟
محمد اللي منسدح عند ابوه ويشربه من الشوربه : شتشوفين ؟؟ احلق ولا اخيط ؟؟
ساره : لا تأكل ؟؟؟
محمد المستعجب من ساره هالشي ..عادي ولد وابوه : ياااااااااااه شفيكم يعني حرام الواحد يهتم في ابوه ويتونس معاه شوي ..كفاااايه خذتوه مني اسبوووعين ..(وبدلع البكر ) سرقتووووه ..
نايف المتسند على الباب : شوي شوي لا تطيح دموعك عااااد
محمد : جب انت

رن التلفوووووووووون ..ورن معاه البيت بكبره ..نايف وساره ومحمد وب محمد اختضوا من هالرنه .. وعلى طووول محمد وساره عند التلفون اللي في غرفة بو محمد ..

محمد اللي رد قبل ساره : الووووووووووو
وصوووت دانه يقول : الو السلام عليكم ؟؟
محمد خذ نفس ورد له القهر اللي فيه عليها وده يحرقها ويحرق الكتله البارده العصبيه (نايف)وياها : عليكم السلام
دانه : ساره موجوده ؟؟
ساره تجر سماعة التلفون من محمد بس محمد ابد ماتحرك وقالها : من اقولها ؟؟؟
دانه بقهرها هالثانيه : الدانـــه ..
محمد على طول عطا السماعه حق ساره وساره خذتها ..والكلام اللي سمعه محمد : (( هلا والله بالداااانه ..تمام الله يسلمج وانتي علومج ؟؟...باجر( وهني ساره علقت عيونها على نايف اللي كان مسلم نفسه حق النوم بس متسند على الباب ..وهالشي اللي خلا قهر محمد يغلي ) ؟؟؟ اهااااا ؟؟؟ اوكي عيل انتظرج ..بااااي )) ..

محمد طلع من الغرفه ..ولما مر عند نايف ضرب جتفه في جتف نايف وقام نايف وراح غرفته دون وعي وهو دااايخ ..مر بيوم طويل ..تعب فيه وتعب في الايام اللي فاتت ..كل شي كان على راسه وآخر اسبوع مانام شي ولو يجمع الساعات على بعض مابيون 6 ساعات ؟؟.. رجال والنعم فيك يانايف ..

ساره طلعت ادوية ابوها وعطتهم اياه ورتبت الادويه حق باجر بانتظام ..بعد هي مسؤوله على هالشي ..باست ابوها على راسه وراحت صوب الباب ..عاااااااااد محمد في ويهها ولابس جلابية النوم وماسك اللحاف في يده ومخدته ..

ساره : هههههههههههههههههههه ..
محمد : شله تضحكين ؟؟ فيني شي غلط ؟؟؟
ساره بهمس لان بو محمد رقد : ههههههههههه متأكد عمرك 24 ؟؟ مو 4 ؟؟؟؟
محمد تنهد : يااااااااهالبلشه وبعدين معاكم ..انزين احب امي وابي حرام انام عند ابوي ليله وحده ؟؟ واهتم فيه ؟؟
ساره حست بغصه في قلبها لما قال (احب امي )..حنان الام الكل مفتقده بهالبيت حتى بو محمد.. وقالت له بحنان وهي تكش شعره الاسود : لا حلال فديتك ..
محمد يمسح على شعره وهو نعسان : هدي شعري هديه ..روحي لعبي في شعر نايف ..
ساره رفعت حاجب وانرسمت الابتسامه : ليش ؟؟ شفيه نيوف ؟؟
محمد زل لسانه ..شفيه مب على بعضه هالايام يعني دانوه الزعطوطه بتقلب مخه الحين : ولا شي ..روحي يالله خلينا نرقد ..

انسحبت من الغرفه اللي فيها الابو والولد ..هالاخووو الحبووووب ياعمري عليه بس شفيه على نيوف على باله بقره انا مااعرف شيدور في مخه ؟؟ يمكن نايف مايفهم بس تراني اصيدها وهي طايره ومعلي ياحمووود باجر دنوي عندنا وبشوف شبتسوي ؟؟

[bnt aldo7a]

يمكن يضيع الشوق في داخل انسان
ويمكن يضيع انسان من كثرة الشوق
الشوق لوعه وانتظار وحرمـــان
وآهات ليل ودمع واحساس مخنوق
كم من خليل يشتكي فراق خلان
وقلبه على فرقى المواليف محروق
تلعب به الدنيا على كف الاحــزان
والنوم بعيونه من الهــم ..مسروق
وكم خافق من حرقة الشوق ضميان
ماكن له حس ونبضات وعروق
ماعاد له في عالم الحــب سلوان
وماضنتي من عقب..( محبــوبه).. ايروق
وكم من عيون بالهوى شانها شان
يسوقها ليل السهر والألم.. سوق
تسابقت عبراتها فوق الاوجان
دمع حداه الحزن من محجر الموق
الناس تتعبها العواطف والأشجان
وماكل عاشق بالهوى صار معشوق
أحد شكى همه على فلان وفلان
وأحد يعاني مادرى فيه مخلـــوق
هذي حياة الناس رابح وخسران
ولا غاب برق بالسمــاء لاحت بروق

خذت قلاص حليب من المطبخ اللي في الطابق العلوي وراحت غرفتها..كانت وجهتها للسريررررر ..تثاوبت بتعب ومدت جسمها المتهالك على السرير..جنها تقط من عقلها افكارها اللي متعبتها..ولا جنها تحذف حزن قديم ومغبر من قلبها..وبدا الحزن الجديد يعمر في جوفها..ياترى شيسوي فيصل الحين ؟؟ هل هو متضايق ولا حزين ولا..فرحان ومو سايعته الدنيا ؟؟ ولا شنو ؟؟ طلعت الآآآآآهه منهاااا بقووو وكانها مندفنه في اعماقها من سنين طويله ..تنهدت وحطت راسها ع المخده وغمضت جفنها عشان يرتاح.. ماودها اتعبه مثل ماهي متعبه قلبها الصغير ..

*******

يوم الجمعــــه ..العصر

في صالة بيت بو محمد كانت دانه تنطر ساره الشيخه الاميره الملكه البرنسيسه عشان تنزل لها وتهد المنظره ..مادري على بالها بتقابل ملكة بريطانيا الا انا الدانه ..

وصوت نقزها من وراها .. تتوقعون منوووووووو ؟؟

محمد ..؟؟؟

نايف : السلام عليكم
دق قلبها : وعليكم السلام ..هلا نــ..ايف
نايف موطي راسه : شخبارج دانه ؟
والله وحشتني يالحمار بس انت حياوي على الاقل عبرني وجامل هالقلب العاشق : تمام الحمدلله وانت شخبارك ؟؟

نزل من الدري محمد وسرعته مثل البررررق ..وصوت الثوب ومفاتيح السياره اللي في يده ماكانت تكفي القهر اللي من امس فيه ..شسببه مايدري ؟؟

نايف مارد على سؤال دانه الا بكلمه تدل عن حاله (بخير) واستأذن من عقبها وطلع..هي طمنت قلب ساره بس الحبيب محمد حسباله لا..

محمد بابتسامه ساخره على حال دانه ونايف البارد معاها : شفتي ؟؟؟
دانه بقرف وضيج : شنو ؟؟؟
محمد يصحح ويرقع : شفتي ساره ؟؟
دانه باتسامه : لا والله الاميره مشغوله في التعدل شوي ..
محمد اللي رد الابتسامه بدون وعي من تأثيرها عليه : امممممممم
دانه : يالله عيل بروح لها ..
محمد : لا ..
دانه ماودها الا بالشنطه على خد محمد ..افففففف شكثر ينرفزها مو مثل الوسيم الحياوي نايف
دانه : خير ؟؟؟؟
محمد مايحب حد يرد عليه بهالكلمه (خير) مهما يكون معناها طيب.. لها معنى ثاني وهو الاصح بالنسبه له ..الاشمئزاز والضيج
ورد عليها وعيونه على البرواز اللي فوق التلفزيون ..فيه صورة نايف وعمره تقريباً 15 : الخير بويهج (وبنظره دانه فهمتهاااااا ..يعني الحمار بيفهم ..عيونه على الصوره وكلامه يقزز ) ..

دانه رفعت حاااااجب خلا التحدي اللي بين محمد ودانه على (نايف ) حشى حرب البسوس ..تقوى وتكبر ..شوي من دانه وشوي من محمد ليما يولعونها ..

محمد رد على الحاجب اللي رفعته : اللي على راســه بطـحه يحسس عليها ..

دانه المنافسه قوت عندها وهي من النوع الجرئ مب مثل ساره ..خوافه ..

دانه بنظره حرقت محمد وخلته مايسوى ..عشان يعرف ان اللقــــافه شيـــــــــنه ..

دانه : كل يرى الناس بعين طبعـــه ..

الطرفين (ساره ومحمد ) ظمنوا ان الحرب بعدها مابدت وبتبتدي بلقااافه محمد ..وبعنااااد دانه ..

طلع محمد من البيت وهو معصب..يمكن بعصبيته كان وده يكسر الباب اللي مسكه وفتحه بهدوء بدل مايجلعه ويمر بهدوء .. ..عيل على آخر عمره اتي دانه وتقوله هالحجي ..لا والله ماعرفتني عدل ..ماعرفت محمـــد من يكون ..هين يادانه في طرق ثانيه واااايد ..غير العناد والهواش ..انا متأكد انها بتخليج تعرفين محمد عدل ..دخل السويج بعصبيه ويده ترتجف ..حتى ماخلى السياره تسخن وشخط فيها ..وماترك وراه غير الغبار ..ودخان السياره يطير في الهوا الى ان يتلاشا ..


دانه اللي من حرتها على هالريال..حفرت المكان اللي واقفه فيه من كثر ماتضرب ريلها على الارض ..معصبه ودانه معروفه انها تعصب بس على خفيف شفيها اليوم ..صارت فحم !! جبريت !! ..ولعت بس لا لازم تثقل اكثر المره اليايه ..وتكون احسن وتسكت عن اللي ينقال لها ..بالكلام ولا بالــ(نغزات والامثال ) ..

نزلت بطلتنا ساره من على الدري وجنها اميره وذيل تنورتها الحلوه البسيطه يزحف على الدري بجمال الكون كله ..تزينت ساره وحطت شدو فاتح لايق على لبستها ..كانت لابسه قميص وردي عليه ورود صغيره والورود شفافه ..وتنوره سوده فرنسيه تجنن ..وكانت حاطه شال وردي مائل الى البيج ورابطته حول رقبتها بطريقه خلتها تبين منزلتها في المجتمع الراقي..وشعرها المموج رافعته على طريقة ذيل الحصان وحاطته على جنب ..وشوي من القلوس والشغاب الصغير الحلو ..كمل الـــحلا ..

سلمت على دانه وهي مستغربه من احمرار ويها ..شفيها : دانه شصاير ؟؟؟
دانه وهي تطرقع اصابعها : شصاااير بعد ؟؟
ساره ابتسمت : ايييييييه شفتي روميووووو ؟؟ مادري عريس المستقبل ؟؟؟
دانه : عريس ؟؟ نايف ؟؟ آآآمييييين من بؤك لباب السمااااا ..
ساره : هههههههههههههههههه ماصدقت ..
دانه تضايقت مره ثانيه : بس لا مب نايف ..
ساره استغربت وتوسعت عيونها الاخاذه : ها عيل ؟ نيوف ولا حمود ؟؟؟
دانه : نايف فديته وينه ووين هالسوايا
ساره : لااااااااااا لا تقولين !! محمد ؟
دانه انفجرت : اخوج الحمار نرفزني ياب لي القرحه يبي يتحداني وفي شنو ..على شي انا ماافكر اني اتراجع عنه ..بس مادري شيبي مني اخوج هذا التافه الحقير الواطي اللي مايستحي ..صج مافيه ذرة حيا ..
ساره : جب بس جب سمحت لج تغلطين على اخوي وااايد ..انزين ..قبل لا يخترب مزاجج قوليلي شسالفه (خذت يد دانه وركبوا الدري ) قوليلي على روااااق معى ذاك الميلك شيك اللي بينسيج حمود ونيوف ..

دانه ماتبي تعرف الا شي واحد ..يكون سبب مقنع ويبرر لها حركة محمد ..شفيه عليها شسوت له ..كلت حلاله ؟؟
مايصير يقط نغزه قويه ونظرات جهنميه وعيونه على نايف بدون سبب ..اهو لاحظ شي ؟؟ الله يستر ..بس ترى والله اللقافه شينه وانا مابسكت عنه اذا قال شي انا بازيده ..بخليه يكره اليوم اللي فكر فيه ان يحط راســه براسي ..

اممممم شمخبيه الايام للإخوان (محمد ونايف ) وشمخبيه لعيال العم ( محمد , نايف ودانه ) الله يعلم شبيصير في الايام اليايه والحرب وين بتوصل ؟؟ ومتى بتنتهي ؟؟ وهل بتبتدي فعلاً ؟؟؟ ومن الراااااابـــــح ومن الخســــران ..


********
سوري شباب وشابات بس يمكن اتأخر في الجزء الياي(ضروف)
يتبـــــــــــــــــــــــــــــع

[أخاطب القمر]

تعبنا واحنا نقرى شكلها القصه مب مخلصه ههههههه



يعطيج العافيه اختي ومقدرين التعب ومعذوره

[الأمورة]

والله يا بنت الدوحة عزرك مقبول بس ها لطولين علينا .. علشان ما ننسى ونرد نقرى من الأول ترى عيوني راحت فيها وأنا أقرى