[align=center]الدنيا من غير الربيع ميّته
ورقة شجر ضعفانه ومفتته
لا يا جدع غلطان تأمل وشوف
زهر الشتا طالع في عز الشتا
عجبي
*******
ياللي انت بيتك قش مفروش بريش
تقوى عليه الريح.. يصبح ما فيش
عجبي عليك حواليك مخالب كبار
و مالكش غير منقار وقادر تعيش
عجبي
*******
سمعت نقطة ميّه جوه المحيط
بتقول لنقطة ما تنزليش في الغويط
أخاف عليكي م الغرق.. قلت أنا
ده اللي يخاف م الوعد يبقي عبيط
عجبي
*******
بحر الحياة مليان بغرقى الحياه
صرخت خش الموج في حلقي ملاه
قارب نجاه.. صرخت قالوا مفيش
غير بس هو الحب قارب نجاه
عجبي
*******
النهد زي الفهد نط اندلع
قلبي انهبش بين الضلوع وانخلع
ياللي نهيت البنت عن فعلها
قول للطبيعة كمان تبطل دلع
عجبي
*******
صوتك يا بنت الإيه كأنه بدن
يرقص يزيح الهم يمحي الشجن
ياحلوتي وبدنك كأنه كلام
كلام فلاسفه سكروا نسيوا الزمن
عجبي
*******
كرباج سعادة وقلبي منه انجلد
رَمَح كأنه حصان ولف البلد
ورجع لي نصل الليل وسألني.. ليه
خجلان تقول انك سعيد يا ولد
عجبي
*******
مزيكة هادية الكون فيها انغمر
وصيف وليل وعقد فل وسمر
ياهلتري الناس كلهم مبسوطين
و ياهلتري شايفين جمال القمر؟
عجبي
*******
آه لو انا ومحبوب جزنا الفضا
في سفينة وحدينا.. وأشياء رضا
ساعة صفا تعجبنا نرجع لها
والهم قبل ما ييجي.. يبقى مضى
عجبي
*******
إنشد يا قلبي غنوتك للجمال
وارقص في صدري من اليمين للشمال
ما هوش بعيد تفضل لبكره سعيد
ده كل يوم فيه الف الف احتمال
عجبي[/align]
+ الرد على الموضوع
النتائج 1 إلى 1 من 1
الموضوع: من أشعار صلاح جاهين
-
27-10-08 10:14 PM #1
من أشعار صلاح جاهين
معلومات الموضوع
الأعضاء الذين يشاهدون هذا الموضوع
الذين يشاهدون الموضوع الآن: 1 (0 من الأعضاء و 1 زائر)
المواضيع المتشابهه
-
من رباعيات صلاح جاهيـــــــــــن
بواسطة kareem rashad في المنتدى دوحـة الشعــرمشاركات: 0آخر مشاركة: 15-10-08, 12:11 AM -
من أشعار فاروق جويدة
بواسطة kareem rashad في المنتدى دوحـة الشعــرمشاركات: 1آخر مشاركة: 06-07-08, 09:47 AM -
من رباعيـــــــــات صلاح جــــــــــاهين
بواسطة kareem rashad في المنتدى دوحـة الشعــرمشاركات: 0آخر مشاركة: 03-07-08, 12:51 AM -
أشعار فزاااااع..
بواسطة اخر العنقود في المنتدى دوحـة الشعــرمشاركات: 7آخر مشاركة: 26-11-06, 11:00 PM -
سلاح يهودى غريب ؟؟؟!!!!!
بواسطة زاجــ ZAJIL ــل في المنتدى الـدوحـة المـفـتـوحـةمشاركات: 3آخر مشاركة: 18-04-05, 05:36 PM